ಹಾಕಿ ವಿಶ್ವಕಪ್: ಹರ್ಮಾನ್‌ಪ್ರೀತ್ ಪಡೆ 8ನೇ ಸ್ಥಾನಕ್ಕೆ ತೃಪ್ತಿ

ವಾವ್ರೆ: ಎಫ್​ಐಎಚ್ ಹಾಕಿ ವಿಶ್ವಕಪ್‌ನಲ್ಲಿ ಭಾರತ ಪುರುಷರ ತಂಡ 8ನೇ ಸ್ಥಾನದೊಂದಿಗೆ ತನ್ನ ಅಭಿಯಾನ ಮುಗಿಸಿತು. 7-8ನೇ ಸ್ಥಾನದ ಪ್ಲೇಆ್ ಪಂದ್ಯದಲ್ಲಿ ಹರ್ಮಾನ್‌ಪ್ರೀತ್ ಕೌರ್ ಪಡೆ ಪೆನಾಲ್ಟಿ ಶೂಟೌಟ್‌ನಲ್ಲಿ 4-3 ಅಂತರದಿಂದ ಸಹ ಆತಿಥೇಯ ಬೆಲ್ಜಿಯಂ ಎದುರು ಸೋಲು ಅನುಭವಿಸಿತು. ನಿಗದಿತ ಅವಧಿಯಲ್ಲಿ ಪಂದ್ಯ 3-3 ರಿಂದ ಸಮಬಲಗೊಂಡಿತ್ತು. 1994ರಲ್ಲಿ ಕೊನೆಯದಾಗಿ ಅಗ್ರ 5ರೊಳಗೆ ಸ್ಥಾನ ಪಡೆದಿದ್ದ ಭಾರತಕ್ಕೆ

ಕಳೆದ ಆವೃತ್ತಿಗಿಂತ ಒಂದು ಸ್ಥಾನ ಉತ್ತಮಪಡಿಸಿಕೊಂಡ ಸಮಾಧಾನವಷ್ಟೇ ದೊರೆಯಿತು. 1975ರಲ್ಲಿ ಕೊನೆಯದಾಗಿ ಪ್ರಶಸ್ತಿ ಜಯಿಸಿತ್ತು.

ಶುಕ್ರವಾರ ನಡೆದ ಪಂದ್ಯದಲ್ಲಿ ಭಾರತ ಆರಂಭಿಕ ಮುನ್ನಡೆ ಕಾಯ್ದುಕೊಳ್ಳುವಲ್ಲಿ ಎಡವಿತು. ಆರನೇ ನಿಮಿಷದಲ್ಲಿ ಅಭಿಷೇಕ್ ಭಾರತ ಪರ ಗೋಲಿನ ಖಾತೆ ತೆರೆದರು. ಆದರೆ, ಔಟ್ ಫೀಲ್ಡ್‌ನಲ್ಲಿ 10ರ ಬದಲಿಗೆ 11 ಆಟಗಾರರೊಂದಿಗೆ ಆಡಿದ ಕಾರಣಕ್ಕೆ ಭಾರತದ ನಾಯಕ ಹರ್ಮಾನ್‌ಪ್ರೀತ್ ಸಿಂಗ್ ಹಳದಿ ಕಾರ್ಡ್ ನೀಡಲಾಯಿತು.ಇದರೊಂದಿಗೆ ಅವರು ಐದು ನಿಮಿಷ ಆಟದಿಂದ ಹೊರಗುಳಿಯಬೇಕಾಯಿತು.

ಎರಡು ನಿಮಿಷಗಳ ಅಂತರದಲ್ಲಿ ಎರಡು ಗೋಲು ಬಿಟ್ಟುಕೊಟ್ಟ ಭಾರತ ಹಿನ್ನಡೆ ಎದುರಿಸಿತು. ರೋಮನ್ ಡುವೆಕೋಟ್ (22) ಹಾಗೂ ಹ್ಯೂಗೊ ಲಾಬೌಚೆರ್ (23) ವಿಶ್ವ ನಂ.2 ಬೆಲ್ಜಿಯಂ ತಂಡಕ್ಕೆ ಮುನ್ನಡೆ ನೀಡಿದರು. ಮೊದಲಾರ್ಧದಲ್ಲಿ ಬೆಲ್ಜಿಯಂಗೆ 7 ಪೆನಾಲ್ಟಿ ಕಾರ್ನರ್ ಅವಕಾಶ ದೊರೆಯಿತು. ದ್ವಿತೀಯಾರ್ಧದ ಆರಂಭಿಕ ನಿಮಿಷದಲ್ಲಿ ದೊರೆತ ಪೆನಾಲ್ಟಿ ಕಾರ್ನರ್ ಅನ್ನು ಗೋಲಾಗಿಸಿ ಹರ್ಮಾನ್‌ಪ್ರೀತ್ ಪಂದ್ಯ ಸಮಬಲಗೊಳಿಸಿದರು.

ಈ ನಡುವೆ ಅನುಭವಿ ಮನ್‌ಪ್ರೀತ್ ಸಿಂಗ್ ಮುಖಕ್ಕೆ ಪೆಟ್ಟು ಮಾಡಿಕೊಂಡು ಅಂಗಣ ತೊರೆದರು. 47ನೇ ನಿಮಿಷದಲ್ಲಿ ಆರ್ಥರ್ ಡಿ ಸ್ಲೋವರ್ ಫೀಲ್ಡ್ ಗೋಲಿನೊಂದಿಗೆ ಆತಿಥೇಯರಿಗೆ ಮೇಲುಗೈ ಒದಗಿಸಿದರು. ಆದರೆ, ಕೊನೇ ನಿಮಿಷದಲ್ಲಿ ಸಿಕ್ಕ ಪೆನಾಲ್ಟಿ ಕಾರ್ನರ್‌ನಲ್ಲಿ ಗೋಲು ಬಾರಿಸುವಲ್ಲಿ ಯಶಸ್ವಿಯಾದ ಹರ್ಮಾನ್‌ಪ್ರೀತ್ ಪಂದ್ಯವನ್ನು ಪೆನಾಲ್ಟಿ ಶೂಟೌಟ್‌ಗೆ ವಿಸ್ತರಿಸಿದರು.