ಜೂನಿಯರ್​ ಪುರುಷರ ಹಾಕಿ ವಿಶ್ವಕಪ್: ಕ್ವಾರ್ಟರ್​ಫೈನಲ್​ಗೇರಿದ ಭಾರತ

ಮಧುರೈ: ಆತಿಥೇಯ ಭಾರತ ತಂಡ ಗೋಲುಗಳ ಅಬ್ಬರವನ್ನು ಮುಂದುವರಿಸುವ ಮೂಲಕ ಜೂನಿಯರ್​ ಪುರುಷರ ಹಾಕಿ ವಿಶ್ವಕಪ್​ (FIH Men''''s World Cup) ಟೂರ್ನಿಯಲ್ಲಿ ಅಜೇಯವಾಗಿ ಕ್ವಾರ್ಟರ್​ಫೈನಲ್​ ಪ್ರವೇಶಿಸಿದೆ. ಭಾರತ ತಂಡ ಮಂಗಳವಾರ ನಡೆದ ತನ್ನ 3ನೇ ಹಾಗೂ ಅಂತಿಮ ಲೀಗ್​ ಪಂದ್ಯದಲ್ಲಿ ಸ್ವಿರ್ಜಲೆಂಡ್​ ವಿರುದ್ಧ 5-0 ಗೋಲುಗಳಿಂದ ಭರ್ಜರಿ ಗೆಲುವು ದಾಖಲಿಸಿತು. ಈ ಮೂಲಕ ರೋಹಿತ್​ ಯಾದವ್​ ಪಡೆ ತಂಡ ಬಿ ಗುಂಪಿನ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಭದ್ರಪಡಿಸಿಕೊಂಡಿತು.

ಮಧುರೈ ಅಂತಾರಾಷ್ಟ್ರೀಯ ಹಾಕಿ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ, ಮಾಜಿ ಗೋಲು ಕೀಪರ್​ ಪಿಆರ್​ ಶ್ರೀಜೇಶ್​ ತರಬೇತಿಯ ಭಾರತ ತಂಡ ಮೊದಲಾರ್ಧದಲ್ಲೇ 4-0 ಅಂತರದಿಂದ ಮುನ್ನಡೆ ಸಾಧಿಸಿತು. ಮನ್​ಮೀತ್​ ಸಿಂಗ್​ (2 ಮತ್ತು 11ನೇ ನಿಮಿಷ) 9 ನಿಮಿಷಗಳ ಅಂತರದಲ್ಲಿ 2 ಗೋಲು ಬಾರಿಸಿ ಭಾರತಕ್ಕೆ ಆರಂಭಿಕ ಮುನ್ನಡೆ ಒದಗಿಸಿದರು. ಬಳಿಕ ಶಾರ್ದಾನಂದ ತಿವಾರಿ (13, 54) ಎರಡು ಮತ್ತು ಅರ್ಷದೀಪ್​ ಸಿಂಗ್​ (28) ಒಂದು ಗೋಲು ಬಾರಿಸಿ ಮುನ್ನಡೆಯನ್ನು ಹಿಗ್ಗಿಸಿದರು. ಭಾರತ ತಂಡ ಮೊದಲೆರಡು ಪಂದ್ಯಗಳಲ್ಲಿ ಚಿಲಿ (7-0) ಮತ್ತು ಓಮನ್​ (17-0) ವಿರುದ್ಧ ಭರ್ಜರಿ ಗೆಲುವು ಸಾಧಿಸಿತ್ತು.

ಡಿಸೆಂಬರ್​ 5ರಂದು ಕ್ವಾರ್ಟರ್​ಫೈನಲ್​ ಪಂದ್ಯಗಳು ನಡೆಯಲಿದ್ದು, ಭಾರತ ತಂಡ ಡಿ ಗುಂಪಿನ ದ್ವೀತಿಯ ಸ್ಥಾನಿ ಬೆಲ್ಜಿಯಂ ತಂಡವನ್ನು ಎದುರಿಸಲಿದೆ.