ಇಂದಿನಿಂದ ಹಾಕಿ ಲೀಗ್

ಮಂಗಳೂರು: ಸೂಕ್ತ ಮೈದಾನದ ಕೊರತೆ ನಡುವೆಯೇ ‘ಹಾಕಿ ದಕ್ಷಿಣ ಕನ್ನಡ’ ಈ ಬಾರಿಯ ಜಿಲ್ಲಾಮಟ್ಟದ ಮುಕ್ತ ಲೀಗ್ ಹಾಕಿ ಟೂರ್ನಿಗೆ ಸಿದ್ಧತೆ ನಡೆಸಿದೆ. ಫೆ.19ರಿಂದ 21ರವರೆಗೆ ಹಾಕಿ ಟೂರ್ನಿ ಆಯೋಜಿಸಲಾಗಿದ್ದು, ಈ ಬಾರಿ ದಾಖಲೆ ಸಂಖ್ಯೆಯ ಮಹಿಳಾ ಮತ್ತು ಪುರುಷ ತಂಡಗಳು ಭಾಗವಹಿಸುತ್ತಿವೆ.

ಈ ಬಾರಿಯೂ ಖಾಸಗಿಯವರ ಮೊರೆ ಹೋಗಿರುವ ‘ಹಾಕಿ ದಕ್ಷಿಣ ಕನ್ನಡ’ ಅತ್ತಾವರ ಕೆಎಂಸಿಯ ಮರೆನಾ ಗ್ರೀನ್ಸ್ ಹಾಕಿ ಮೈದಾನದಲ್ಲಿ ಟೂರ್ನಿ ಆಯೋಜಿಸಿದೆ. ಕಳೆದ ವರ್ಷವೂ ಇದೇ ಮೈದಾನದಲ್ಲಿ ಆಯೋಜಿಸಲಾಗಿತ್ತು. 2011ರಿಂದ ಸತತವಾಗಿ ಹಾಕಿ ಟೂರ್ಇ ಆಯೋಜಿಸುತ್ತಿದ್ದರೂ, ಸ್ವಂತ ಮೈದಾನದ ಬೇಡಿಕೆ ಇನ್ನೂ ಈಡೇರಿಲ್ಲ ಎನ್ನುತ್ತಾರೆ ‘ಹಾಕಿ ದಕ್ಷಿಣ ಕನ್ನಡ’ ಪದಾಧಿಕಾರಿಗಳು.

ತಂಡಗಳ ಸಂಖ್ಯೆಯಲ್ಲಿ ಹೆಚ್ಚಳ: ಹಿಂದಿನ ವರ್ಷಗಳಿಗೆ ಹೋಲಿಸಿದರೆ ಟೂರ್ನಿಯಲ್ಲಿ ಭಾಗವಹಿಸುತ್ತಿರುವ ತಂಡಗಳ ಸಂಖ್ಯೆ ಹೆಚ್ಚಾಗಿದೆ. ಪುರುಷರ ವಿಭಾಗದಲ್ಲಿ 10 ತಂಡಗಳು ಹಾಗೂ ಮಹಿಳಾ ವಿಭಾಗದಲ್ಲಿ ಈ ಬಾರಿ 6 ತಂಡಗಳು ಭಾಗವಹಿಸುತ್ತಿವೆ. ಪುರುಷರ ವಿಭಾಗದಲ್ಲಿ ಸಂತ ಅಲೋಶಿಯಸ್ ಕಾಲೇಜು, ಮಂಗಳೂರು ವಿವಿ ಹಾಕಿ ಕ್ಲಬ್, ಎನ್‌ಐಟಿಕೆ ಸುರತ್ಕಲ್, ಕೆಎಂಸಿ ಮಂಗಳೂರು, ಧವಳಾ ಕಾಲೇಜು, ಪುತ್ತೂರು ಸಂತ ಫಿಲೋಮಿನಾ ಕಾಲೇಜು, ಕೆನರಾ ಕಾಲೇಜು, ವಾಮಂಜೂರು ಸಂತ ಜೋಸೆಫ್ ಇಂಜಿನಿಯರಿಂಗ್ ಕಾಲೇಜು, ಸಹ್ಯಾದ್ರಿ ಇಂಜಿನಿಯರಿಂಗ್ ಕಾಲೇಜು ಹಾಗೂ ಆಳ್ವಾಸ್ ಕಾಲೇಜು. ಮಹಿಳಾ ವಿಭಾಗದಲ್ಲಿ ಹಳೆಯಂಗಡಿ ಸರ್ಕಾರಿ ಪ್ರಥಮದರ್ಜೆ ಕಾಲೇಜು, ಮಂಗಳೂರು ವಿವಿ ಹಾಕಿ ಕ್ಲಬ್, ಸಂತ ಅಲೋಶಿಯಸ್, ಆಳ್ವಾಸ್ ಕಾಲೇಜು, ಸಂತ ಜೋಸೆಫ್ ಇಂಜಿನಿಯರಿಂಗ್ ಕಾಲೇಜು ಹಾಗೂ ಧವಳಾ ಕಾಲೇಜು ತಂಡಗಳು ಭಾಗವಹಿಸಲಿವೆ.

ಹಾಕಿ ಫೆಡರೇಶನ್ ನಿಯಮಾವಳಿ: ಮೂರು ದಿನಗಳ ಟೂರ್ನಿ ಭಾರತೀಯ ಹಾಕಿ ಫೆಡರೇಶನ್ ನಿಯಮಾವಳಿ ಪ್ರಕಾರವೇ ನಡೆಯಲಿದೆ. ಕೆಎಂಸಿ ಮೈದಾನ ಹುಲ್ಲಿನ ಮೈದಾನವಾಗಿದ್ದು, ಇದು ಮಣ್ಣಿನ ಮೈದಾನದಲ್ಲಿ ಆಡುವುದಕ್ಕಿಂತ ಹೆಚ್ಚು ಆರಾಮದಾಯಕ. ಒಂದು ಪಂದ್ಯ 45 ನಿಮಿಷ ಜರುಗಲಿದ್ದು, ಮೊದಲಾರ್ಧ 20 ನಿಮಿಷ, ಬಳಿಕ 5 ನಿಮಿಷ ವಿರಾಮ, ದ್ವಿತೀಯಾರ್ಧ 20 ನಿಮಿಷ. ಪ್ರತಿ ಪಂದ್ಯದ ವಿಜೇತ ತಂಡಕ್ಕೆ 3 ಅಂಕ, ಪಂದ್ಯ ಡ್ರಾ ಆದಲ್ಲಿ ತಲಾ 1 ಅಂಕ ದೊರೆಯಲಿದೆ. ವಿಜೇತರಿಗೆ ಬೆಂಜಮಿನ್ ಡಿಸೋಜ ಸ್ಮರಣಾರ್ಥ ಟ್ರೋಫಿ ಹಾಗೂ ನಗದು ಬಹುಮಾನ ದೊರೆಯಲಿದೆ.

ಭರತ್ ಶೆಟ್ಟಿಗಾರ್