ಟಿ20 ವಿಶ್ವಕಪ್​ನಲ್ಲಿ ಭಾರತ ಅಥವಾ ದಕ್ಷಿಣ ಆಫ್ರಿಕಾ ಗೆದ್ದರೆ ಬರೆಯಬಹುದಾದ ದಾಖಲೆಗಳು ಇಲ್ಲಿವೆ...

ಬ್ರಿಜ್​ಟೌನ್​: ಕಳೆದ ಒಂದು ದಶಕದಿಂದ ಸತತ 5 ಐಸಿಸಿ ಫೈನಲ್​ಗಳಲ್ಲಿ ಸೋತಿರುವ ಭಾರತ ಮತ್ತು ಕಳೆದ 3 ದಶಕಗಳಿಂದ ಐಸಿಸಿ ವಿಶ್ವಕಪ್​ಗಳಲ್ಲಿ ನಾಕೌಟ್​ ಹಂತದಲ್ಲಿ ಮುಗ್ಗರಿಸಿರುವ ದಕ್ಷಿಣ ಆಫ್ರಿಕಾ ತಂಡಗಳು ಇದೀಗ 9ನೇ ಆವೃತ್ತಿಯ ಟಿ20 ವಿಶ್ವಕಪ್​ ಟೂರ್ನಿಯಲ್ಲಿ ಅಜೇಯವಾಗಿ ಪ್ರಶಸ್ತಿ ಸುತ್ತಿಗೇರಿವೆ. ಕೆರಿಬಿಯನ್​ ನೆಲದಲ್ಲಿ ಶನಿವಾರ ನಡೆಯಲಿರುವ ಫೈನಲ್​ ಪಂದ್ಯದಲ್ಲಿ ಉಭಯ ತಂಡಗಳ ಪೈಕಿ ಒಂದು ಮಾತ್ರ, ಬಹುಕಾಲದ ಕನಸು ನನಸಾಗಿಸಿಕೊಳ್ಳಲಿದೆ. ಭಾರತ ತಂಡ 17 ವರ್ಷಗಳ ಬಳಿಕ ಮತ್ತು ಎರಡನೇ ಬಾರಿಗೆ ಟಿ20 ವಿಶ್ವಕಪ್​ ಜಯಿಸುವ ಉತ್ಸಾಹದಲ್ಲಿದ್ದರೆ, ದ. ಆಫ್ರಿಕಾ ಚೊಚ್ಚಲ ಐಸಿಸಿ ವಿಶ್ವಕಪ್​ ಗೆಲುವಿನ ಹಂಬಲದಲ್ಲಿದೆ. ಉಭಯ ತಂಡಗಳು ಫೈನಲ್ ಗೆದ್ದರೆ ಬರೆಯಬಹುದಾದ ದಾಖಲೆಗಳು ಇಲ್ಲಿವೆ...

ಭಾರತ ಗೆದ್ದರೆ...

*ಎರಡನೇ ಬಾರಿ ಮತ್ತು 17 ವರ್ಷಗಳ ಬಳಿಕ ಟಿ20 ವಿಶ್ವ ಚಾಂಪಿಯನ್​.

*11 ವರ್ಷಗಳ ಐಸಿಸಿ ಟ್ರೋಫಿ, 13 ವರ್ಷಗಳ ಐಸಿಸಿ ವಿಶ್ವಕಪ್​ ಬರ ನೀಗಲಿದೆ.

*ವೆಸ್ಟ್​ ಇಂಡೀಸ್​, ಇಂಗ್ಲೆಂಡ್​ ನಂತರ ಭಾರತ 2 ಟಿ20 ವಿಶ್ವಕಪ್​ ಗೆದ್ದ 3ನೇ ತಂಡ.

*ಭಾರತ 4ನೇ ಐಸಿಸಿ ವಿಶ್ವಕಪ್​ (2 ಏಕದಿನ, 2 ಟಿ20) ಗೆಲುವಿನ ಸಾಧನೆ.

*ಧೋನಿ ನಂತರ ಟಿ20 ವಿಶ್ವಕಪ್​ ಗೆದ್ದ 2ನೇ ನಾಯಕ ರೋಹಿತ್​ ಶರ್ಮ.

*ರೋಹಿತ್​ ಶರ್ಮ 2 ಟಿ20 ವಿಶ್ವಕಪ್​ ಗೆದ್ದ ಮೊದಲ ಭಾರತೀಯ.

*ಕಪಿಲ್ ದೇವ್​, ಸೌರವ್​ ಗಂಗೂಲಿ, ಧೋನಿ ಬಳಿಕ ರೋಹಿತ್ ಐಸಿಸಿ ಟ್ರೋಫಿ ಗೆದ್ದ 4ನೇ ಭಾರತೀಯ ನಾಯಕ.

*ವಿರಾಟ್​ ಕೊಹ್ಲಿ ಏಕದಿನ-ಟಿ20 ವಿಶ್ವಕಪ್​ ಗೆಲುವಿನ ಸಾಧನೆ.

*ಮುಖ್ಯ ಕೋಚ್​ ರಾಹುಲ್​ ದ್ರಾವಿಡ್​ಗೆ ಗೆಲುವಿನ ವಿದಾಯ.

*ದ್ರಾವಿಡ್​ ಕೋಚ್​ ಆಗಿ ಜೂನಿಯರ್​&ಸೀನಿಯರ್​ ವಿಭಾಗದಲ್ಲಿ ಐಸಿಸಿ ಟ್ರೋಫಿ ಗೆಲುವು.

*ಸತತ 5 ಐಸಿಸಿ ಟೂರ್ನಿಗಳ ಫೈನಲ್​ ಸೋಲಿನ ಬಳಿಕ ಗೆಲುವಿನ ಸಾಧನೆ.

ದಕ್ಷಿಣ ಆಫ್ರಿಕಾ ಗೆದ್ದರೆ...

*ಚೊಚ್ಚಲ ಐಸಿಸಿ ವಿಶ್ವಕಪ್​ ಗೆಲುವಿನ ಸಾಧನೆ.

*ಟಿ20 ವಿಶ್ವಕಪ್​ ಗೆದ್ದ 7ನೇ ತಂಡವೆನಿಸಲಿದೆ.

*1998ರ ನಾಕೌಟ್​ ಟ್ರೋಫಿ ಬಳಿಕ 2ನೇ ಐಸಿಸಿ ಪ್ರಶಸ್ತಿ ಜಯ.

*ಏಡನ್​ ಮಾರ್ಕ್ರಮ್​ ಕಿರಿಯರ-ಹಿರಿಯರ ಐಸಿಸಿ ವಿಶ್ವಕಪ್​ ಗೆದ್ದ ನಾಯಕ.

*ಸತತ 9ನೇ ಜಯದೊಂದಿಗೆ ಅಜೇಯವಾಗಿ ಚಾಂಪಿಯನ್​ ಪಟ್ಟದ ಸಾಧನೆ.

*ಅಜೇಯವಾಗಿ ಟಿ20 ವಿಶ್ವಕಪ್​ ಗೆದ್ದ ಮೊದಲ ತಂಡವೆನಿಸಲಿದೆ.

*ನಾಕೌಟ್​ನಲ್ಲಿ ಸೋಲುವುದಕ್ಕೆ ಅಂಟಿರುವ "ಚೋಕರ್ಸ್​' ಹಣೆಪಟ್ಟಿ ಕಳಚಲಿದೆ.

ಮುರಿಯುವುದೇ ಫೈನಲ್​ ಸೋಲಿನ ಸರಣಿ?

ಭಾರತ ತಂಡ 2013ರ ಚಾಂಪಿಯನ್ಸ್​ ಟ್ರೋಫಿ ಗೆಲುವಿನ ಬಳಿಕ ಯಾವುದೇ ಐಸಿಸಿ ಟ್ರೋಫಿ ಗೆದ್ದಿಲ್ಲ. ನಂತರದಲ್ಲಿ 5 ಬಾರಿ ಐಸಿಸಿ ಟೂರ್ನಿಯ ಫೈನಲ್​ಗೇರಿದರೂ ನಿರಾಸೆ ಅನುಭವಿಸಿದೆ. 2014ರ ಟಿ20 ವಿಶ್ವಕಪ್​, 2017ರ ಚಾಂಪಿಯನ್ಸ್​ ಟ್ರೋಫಿ, 2021 ಮತ್ತು 2023ರ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​, 2023ರ ಏಕದಿನ ವಿಶ್ವಕಪ್ ಫೈನಲ್​ಗಳಲ್ಲಿ ಭಾರತ ತಂಡ ಮುಗ್ಗರಿಸಿತ್ತು. ಈ ಫೈನಲ್​ ಸೋಲಿನ ಸರಪಳಿ ಮುರಿಯಲು ಇದು ಉತ್ತಮ ಅವಕಾಶವೆನಿಸಿದೆ.

https://www.vijayavani.net/swimmers-srihari-nataraj-dhinidhi-desinghu-to-compete-at-olympics-through-universality-quota