ಬೆಂಗಳೂರನ್ನು ದೇಶದ ಕ್ಯೂ-ಸ್ಪೋರ್ಟ್ಸ್ ಹಬ್ ಮಾಡಲು ಮುಂದಾದ ಹೇಬಾಲ್ ಅಕಾಡೆಮಿ ಮತ್ತು ಕ್ರಿಸ್ ಹೆನ್ರಿ

ವಿಶ್ವವಿಖ್ಯಾತ ತರಬೇತುದಾರ ಕ್ರಿಸ್ ಹೆನ್ರಿ ಅವರು ಅಧಿಕೃತ ಕೋಚಿಂಗ್ ಗಾಗಿ ಮೊದಲ ಬಾರಿಗೆ ಭಾರತಕ್ಕೆ ಭೇಟಿ ನೀಡಿದರು. ದೇಶದಾದ್ಯಂತ ಇರುವ ತರಬೇತುದಾರರು, ಅಕಾಡೆಮಿ ಮಾಲೀಕರು ಮತ್ತು ವೃತ್ತಿಪರ ಆಟಗಾರರನ್ನು ಒಂದು ವೇದಿಕೆಗೆ ತರಲಾಯಿತು. ಅಂತಾರಾಷ್ಟ್ರೀಯ ಮಟ್ಟದ ಕೋಚಿಂಗ್ ಮತ್ತು ಪ್ರದರ್ಶನ ವ್ಯವಸ್ಥೆಯನ್ನು ಪರಿಚಯಿಸುವ ಮೂಲಕ ವೃತ್ತಿಪರ ಕ್ಯೂ-ಸ್ಪೋರ್ಟ್ಸ್ ಕೋಚಿಂಗ್ ಶಿಕ್ಷಣದಲ್ಲಿ ಈ ಭೇಟಿ ಪ್ರಮುಖ ಮೈಲಿಗಲ್ಲಾಗಿದೆ.

ಉದ್ಘಾಟನಾ ಕೋರ್ಸ್ ಗೆ ಅಭೂತಪೂರ್ವ ಪ್ರತಿಕ್ರಿಯೆ ವ್ಯಕ್ತವಾಯಿತು ಮತ್ತು ನಿಗದಿತ ಸೀಟುಗಳು ಭರ್ತಿಯಾದವು. ದೇಶದ ವಿವಿಧ ಭಾಗಗಳಿಂದ ಆಟಗಾರರು ಮತ್ತು ತರಬೇತುದಾರರು ಬೆಂಗಳೂರಿಗೆ ಆಗಮಿಸಿದರು. ಜೊತೆಗೆ ಆಟಗಾರರು ಮತ್ತು ಜೂನಿಯರ್ ಆಟಗಾರರ ತರಬೇತಿ ಕಾರ್ಯಕ್ರಮಗಳು ನಡೆದವು.

ವಿಶ್ವದ ಅಗ್ರಗಣ್ಯ ಸ್ನೂಕರ್ ಕೋಚ್​ಗಳಲ್ಲಿ ಒಬ್ಬರೆಂದು ಗುರುತಿಸಲ್ಪಟ್ಟಿರುವ ಕ್ರಿಸ್ ಹೆನ್ರಿ ಅವರೇ ಸ್ವತಃ ಈ ತರಬೇತಿಯನ್ನು ನಡೆಸಿಕೊಟ್ಟರು. ಅವರು ಮಾರ್ಕ್ ಸೆಲ್ಬಿ, ಶಾನ್ ಮರ್ಫಿ, ಲುಕಾ ಬ್ರೆಸೆಲ್ ಮತ್ತು ಸ್ಟೀಫನ್ ಹೆಂಡ್ರಿ ಸೇರಿದಂತೆ ಹಲವು ವಿಶ್ವ ಚಾಂಪಿಯನ್ಸ್ ಮತ್ತು ಗಣ್ಯ ವೃತ್ತಿಪರ ಆಟಗಾರರಿಗೆ ತರಬೇತಿ ನೀಡಿದ ಅನುಭವ ಹೊಂದಿದ್ದಾರೆ. ಯುಕೆ-ಪ್ರಮಾಣಿತ ಲೆವೆಲ್ 2 ತರಬೇತುದಾರ ಹಾಗೂ ಹೇಬಾಲ್ ಅಕಾಡೆಮಿ ಬೆಂಗಳೂರಿನ ಸಂಸ್ಥಾಪಕರಾದ ಪ್ರಣೀತ್ ಜೆ. ರಾಮಚಂದಾನಿ ಅವರು ಕ್ರಿಸ್ ಹೆನ್ರಿ ಅವರೊಂದಿಗೆ ಜಂಟಿಯಾಗಿ ಈ ಕಾರ್ಯಕ್ರಮವನ್ನು ನಡೆಸಿಕೊಟ್ಟರು.

ಈ ಕುರಿತು ಹೇಬಾಲ್ ಅಕಾಡೆಮಿಯ ಸಂಸ್ಥಾಪಕರಾದ ಪ್ರಣೀತ್ ಜೆ. ರಾಮಚಂದಾನಿ ಅವರು, "ಭಾರತದಲ್ಲಿ ಕ್ಯೂ-ಸ್ಪೋರ್ಟ್ಸ್ಗಾಗಿ ಬಲವಾದ ಕೋಚಿಂಗ್ ವ್ಯವಸ್ಥೆಯನ್ನು ನಿರ್ಮಿಸುವುದು ನಮ್ಮ ಆಶಯವಾಗಿದೆ. ಈ ಸರ್ಟಿಫಿಕೇಷನ್ ಕೋರ್ಸ್ ಆಧುನಿಕ ಪದ್ಧತಿಗಳು ಮತ್ತು ಅಂತಾರಾಷ್ಟ್ರೀಯ ಗುಣಮಟ್ಟವನ್ನು ಪರಿಚಯಿಸಲಿದ್ದು, ಇದು ತರಬೇತುದಾರರು ಮತ್ತು ಆಟಗಾರರ ಬೆಳವಣಿಗೆಗೆ ನಿಜಕ್ಕೂ ಸಹಕಾರಿಯಾಗಿದೆ. ಇದರಿಂದ ರಾಷ್ಟ್ರೀಯ ಮಟ್ಟದಲ್ಲಿ ಪ್ರದರ್ಶನದ ಗುಣಮಟ್ಟ ಹೆಚ್ಚಲಿದ್ದು, ಜಾಗತಿಕ ವೇದಿಕೆಗಳಲ್ಲಿ ಭಾರತವನ್ನು ಬಲಿಷ್ಠ ಶಕ್ತಿಯಾಗಿ ಬಿಂಬಿಸಲು ಸಾಧ್ಯವಾಗುತ್ತದೆ" ಎಂದು ಹೇಳಿದರು.

ಜಾಗತಿಕ ಸ್ನೂಕರ್ ಕೋಚ್ ಆಗಿರುವ ಕ್ರಿಸ್ ಹೆನ್ರಿ ಅವರು ಮಾತನಾಡಿ, "ಭಾರತದಲ್ಲಿ ಕ್ಯೂ-ಸ್ಪೋರ್ಟ್ಸ್ ಗೆ ಅಪಾರ ಅವಕಾಶಗಳಿವೆ. ನರವಿಜ್ಞಾನ ಆಧಾರಿತ ವ್ಯವಸ್ಥಿತ ಶಿಕ್ಷಣ ಮತ್ತು ಆಧುನಿಕ ತರಬೇತಿ ಪದ್ಧತಿಗಳನ್ನು ವಿಸ್ತರಿಸುವ ಮೂಲಕ, ನಾವು ಮುಂದಿನ ಪೀಳಿಗೆಯ ಉನ್ನತ ಮಟ್ಟದ ತರಬೇತುದಾರರು ಮತ್ತು ಆಟಗಾರರನ್ನು ಸೃಷ್ಟಿಸಬಹುದು. ಇದು ಜಾಗತಿಕ ಮಟ್ಟದಲ್ಲಿ ನಿರಂತರ ಯಶಸ್ಸನ್ನು ಸಾಧಿಸಲು ವೇಗವರ್ಧಕವಾಗಿ ಕೆಲಸ ಮಾಡುತ್ತದೆ" ಎಂದರು.

ಪ್ರಸ್ತುತ, ಹೇಬಾಲ್ ಅಕಾಡೆಮಿ ಬೆಂಗಳೂರು ತನ್ನ ವ್ಯವಸ್ಥಿತ ಹೈ-ಪರ್ಫಾರ್ಮೆನ್ಸ್ ತರಬೇತಿ ಕಾರ್ಯಕ್ರಮಗಳ ಮೂಲಕ ದೇಶದಾದ್ಯಂತದ 20 ಕ್ಕೂ ಹೆಚ್ಚು ವೃತ್ತಿಪರ ಆಟಗಾರರಿಗೆ ಮತ್ತು 10 ಜೂನಿಯರ್ ಕ್ರೀಡಾಪಟುಗಳಿಗೆ ತರಬೇತಿ ನೀಡುತ್ತಿದೆ. ಮೇ 29–30 ಪ್ಲೇಯರ್ ಇಂಟೆನ್ಸಿವ್ ಟ್ರೈನಿಂಗ್ ಪ್ರೋಗ್ರಾಂ, ಮೇ 31 ಜೂನಿಯರ್ ಇಂಟೆನ್ಸಿವ್ ಟ್ರೈನಿಂಗ್ ಪ್ರೋಗ್ರಾಂ ನಡೆಯಲಿದೆ.