ಡಬ್ಲ್ಯುಪಿಎಲ್​ನಲ್ಲಿ ಯುಪಿ ವಾರಿಯರ್ಸ್​ಗೆ ಸತತ 2ನೇ ಜಯ; ಮಿಂಚಿದ ಎಕ್ಲಸ್ಟೋನ್​, ಗ್ರೇಸ್​ ಹ್ಯಾರಿಸ್​

ಬೆಂಗಳೂರು: ಸೋಫಿ ಎಕ್ಲೆಸ್ಟೋನ್​ (20ಕ್ಕೆ 3) ಬಿಗಿ ಸ್ಪಿನ್​ ದಾಳಿ ಮತ್ತು ಗ್ರೇಸ್​ ಹ್ಯಾರಿಸ್​ (60*ರನ್​, 33 ಎಸೆತ, 9 ಬೌಂಡರಿ, 2 ಸಿಕ್ಸರ್​) ಬಿರುಸಿನ ಅರ್ಧಶತಕದ ಬಲದಿಂದ ಯುಪಿ ವಾರಿಯರ್ಸ್​ ತಂಡ ವುಮೆನ್ಸ್​ ಪ್ರೀಮಿಯರ್​ ಲೀಗ್​ (ಡಬ್ಲ್ಯುಪಿಎಲ್​) 2ನೇ ಆವೃತ್ತಿಯಲ್ಲಿ ಗುಜರಾತ್​ ಜೈಂಟ್ಸ್​ ಎದುರು 6 ವಿಕೆಟ್​ಗಳಿಂದ ಗೆಲುವು ದಾಖಲಿಸಿದೆ. ಅಲಿಸ್ಸಾ ಹೀಲಿ ಬಳಗ ಸತತ 2ನೇ ಗೆಲುವು ದಾಖಲಿಸಿ ಅಂಕಪಟ್ಟಿಯಲ್ಲಿ 3ನೇ ಸ್ಥಾನಕ್ಕೇರಿದ್ದರೆ, ಗುಜರಾತ್​ ಜೈಂಟ್ಸ್​ ಸತತ 3ನೇ ಸೋಲಿನೊಂದಿಗೆ ಕೊನೇ ಸ್ಥಾನದಲ್ಲೇ ಉಳಿದಿದೆ.

ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಶುಕ್ರವಾರ ನಡೆದ ಪಂದ್ಯದಲ್ಲಿ ಟಾಸ್​ ಸೋತು ಮೊದಲು ಬ್ಯಾಟಿಂಗ್​ಗೆ ಇಳಿದ ಗುಜರಾತ್​ ತಂಡ 5 ವಿಕೆಟ್​ಗೆ 142 ರನ್​ ಪೇರಿಸಿತು. ಪ್ರತಿಯಾಗಿ ಯುಪಿ ತಂಡ ಗ್ರೇಸ್​ ಹ್ಯಾರಿಸ್​ ಆಸರೆಯಲ್ಲಿ 15.4 ಓವರ್​ಗಳಲ್ಲಿ 4 ವಿಕೆಟ್​ಗೆ 143 ರನ್​ ಗಳಿಸಿ ಗೆಲುವಿನ ದಡ ಸೇರಿತು. ನಾಯಕಿ ಅಲಿಸ್ಸಾ ಹೀಲಿ (33) ಯುಪಿಗೆ ಉತ್ತಮ ಆರಂಭ ಒದಗಿಸಿದರು.

ಜೈಂಟ್ಸ್​ಗೆ ಎಕ್ಲೆಸ್ಟೋನ್​ ಕಡಿವಾಣ

ನಾಯಕಿ ಬೆತ್​ ಮೂನಿ (16) ಮತ್ತು ಲೌರಾ ವೊಲ್ವಾರ್ಡ್​ (28) ಮೊದಲ ವಿಕೆಟ್​ಗೆ 32 ಎಸೆತಗಳಲ್ಲಿ 40 ರನ್​ ಸೇರಿಸುವ ಮೂಲಕ ಗುಜರಾತ್​ಗೆ ಬಿರುಸಿನ ಆರಂಭ ಒದಗಿಸಿದರು. ಪಂದ್ಯದ 6ನೇ ಓವರ್​ನಲ್ಲಿ ಈ ಜೋಡಿಯನ್ನು ಬೇಧಿಸಿದ ಎಡಗೈ ಸ್ಪಿನ್ನರ್​ ಸೋಫಿ ಎಕ್ಲೆಸ್ಟೋನ್​ ಗುಜರಾತ್​ ರನ್​ಗತಿಗೂ ಬ್ರೇಕ್​ ಹಾಕಿದರು. ಹರ್ಲೀನ್​ ಡಿಯೋಲ್​ (18) ಕನ್ನಡತಿ ರಾಜೇಶ್ವರಿ ಗಾಯಕ್ವಾಡ್​ಗೆ ವಿಕೆಟ್​ ಒಪ್ಪಿಸಿದರು. ನಂತರದಲ್ಲಿ ೋಬ್​ ಲಿಚ್​ಫೀಲ್ಡ್​ (35) ಮತ್ತು ಆಶ್ಲೆ ಗಾರ್ಡ್​ನರ್​ (30) 4ನೇ ವಿಕೆಟ್​ಗೆ 31 ಎಸೆತಗಳಲ್ಲಿ 52 ರನ್​ ಸೇರಿಸುವ ಮೂಲಕ ಗುಜರಾತ್​ ತಂಡವನ್ನು ಸ್ಪರ್ಧಾತ್ಮಕ ಮೊತ್ತದತ್ತ ಮುನ್ನಡೆಸಿದರು. ಈ ಜೋಡಿಯನ್ನು ಮತ್ತೆ ಎಕ್ಲೆಸ್ಟೋನ್​ ಬೇರ್ಪಡಿಸಿದರು.

ಗುಜರಾತ್​ ಜೈಂಟ್ಸ್​: 5 ವಿಕೆಟ್​ಗೆ 142 (ವೊಲ್ವಾರ್ಡ್​ 28, ಮೂನಿ 16, ಹರ್ಲೀನ್​ 18, ಲಿಚ್​ಫೀಲ್ಡ್​ 35, ಗಾರ್ಡ್​ನರ್​ 30, ಎಕ್ಲೆಸ್ಟೋನ್​ 20ಕ್ಕೆ 3, ರಾಜೇಶ್ವರಿ ಗಾಯಕ್ವಾಡ್​ 33ಕ್ಕೆ 1). ಯುಪಿ ವಾರಿಯರ್ಸ್​: 15.4 ಓವರ್​ಗಳಲ್ಲಿ 4 ವಿಕೆಟ್​ಗೆ 143 (ಅಲಿಸ್ಸಾ 33, ಚಾಮರಿ 17, ಗ್ರೇಸ್​ ಹ್ಯಾರಿಸ್​ 60*, ದೀಪ್ತಿ 17*, ತನುಜಾ 23ಕ್ಕೆ 2, ಮೇನಾ 39ಕ್ಕೆ 1).

https://www.vijayavani.net/puneri-paltan-win-maiden-pkl-title