ವಿಶ್ವಕಪ್​ ಗೆಲುವಿನ ಬೆನ್ನಲ್ಲೇ ಐಸಿಸಿ ಟಿ20 ರ‍್ಯಾಂಕಿಂಗ್​ನಲ್ಲಿ ವಿಶ್ವ ನಂ. 1 ಪಟ್ಟಕ್ಕೇರಿದ ಹಾರ್ದಿಕ್​ ಪಾಂಡ್ಯ!

ನವದೆಹಲಿ: ಟಿ20 ವಿಶ್ವಕಪ್​ ಗೆಲುವಿನಲ್ಲಿ ಮಹತ್ವದ ಪಾತ್ರ ವಹಿಸಿದ ಟೀಮ್​ ಇಂಡಿಯಾದ ಉಪನಾಯಕ ಹಾರ್ದಿಕ್​ ಪಾಂಡ್ಯ ಬುಧವಾರ ಪ್ರಕಟಗೊಂಡ ಪರಿಷತ ಐಸಿಸಿ ಟಿ20 ರ‍್ಯಾಂಕಿಂಗ್​ನ ಆಲ್ರೌಂಡರ್ಸ್​ ವಿಭಾಗದಲ್ಲಿ ಅಗ್ರಸ್ಥಾನಕ್ಕೇರಿದ್ದಾರೆ. ಅವರು ಈ ಸಾಧನೆ ಮಾಡಿದ ಮೊದಲ ಭಾರತೀಯರೆನಿಸಿದ್ದಾರೆ.

30 ವರ್ಷದ ಹಾರ್ದಿಕ್​ ಕಳೆದ ಶನಿವಾರ ಬ್ರಿಜ್​ಟೌನ್​ನಲ್ಲಿ ನಡೆದ ದಕ್ಷಿಣ ಆಫ್ರಿಕಾ ವಿರುದ್ಧದ ಫೈನಲ್​ ಪಂದ್ಯದಲ್ಲಿ ಅಮೂಲ್ಯವಾದ ಹೆನ್ರಿಕ್​ ಕ್ಲಾಸೆನ್​ ಮತ್ತು ಡೇವಿಡ್​ ಮಿಲ್ಲರ್​ ವಿಕೆಟ್​ ಕಬಳಿಸಿದ್ದರು. ಜತೆಗೆ ಅಂತಿಮ ಓವರ್​ನಲ್ಲಿ 16 ರನ್​ ಬೇಕಾಗಿದ್ದಾಗ ಕೇವಲ 8 ರನ್​ ಬಿಟ್ಟುಕೊಟ್ಟು ಗೆಲುವಿನ ರೂವಾರಿ ಎನಿಸಿದ್ದರು. ವಿಶ್ವಕಪ್​ನಲ್ಲಿ ಅವರು 1 ಅರ್ಧಶತಕ ಸಹಿತ 144 ರನ್​ ಬಾರಿಸಿದ್ದರು. ಜತೆಗೆ 11 ವಿಕೆಟ್​ ಕಬಳಿಸಿದ್ದರು. ಶ್ರೀಲಂಕಾದ ವಾನಿಂದು ಹಸರಂಗ ಅವರನ್ನು ಹಿಂದಿಕ್ಕಿ ಹಾರ್ದಿಕ್​ ಪಾಂಡ್ಯ ವಿಶ್ವ ನಂ. 1 ಪಟ್ಟಕ್ಕೇರಿದ್ದಾರೆ.

ಐಪಿಎಲ್​ನಲ್ಲಿ ಮುಂಬೈ ಇಂಡಿಯನ್ಸ್​ ನಾಯಕರಾಗಿ ವೈಲ್ಯ ಕಂಡ ಬಳಿಕ ಕ್ರಿಕೆಟ್​ ಪ್ರೇಮಿಗಳಿಂದ ತೀವ್ರ ನಿಂದನೆಗಳನ್ನು ಎದುರಿಸಿದ್ದ ಹಾರ್ದಿಕ್​ ಇದೀಗ ಟಿ20 ವಿಶ್ವಕಪ್​ ಯಶಸ್ಸಿನೊಂದಿಗೆ ಎಲ್ಲರಿಗೂ ದಿಟ್ಟ ಉತ್ತರವನ್ನೇ ನೀಡಿದಂತಾಗಿದೆ.

ಆಲ್ರೌಂಡರ್ ರ‍್ಯಾಂಕಿಂಗ್​ನಲ್ಲಿ ಮಾರ್ಕಸ್​ ಸ್ಟೋಯಿನಿಸ್​, ಸಿಕಂದರ್​ ರಾಜಾ, ಶಕೀಬ್​ ಅಲ್​ ಹಸನ್​ ಕೂಡ ತಲಾ 1 ಸ್ಥಾನ ಮೇಲೇರಿ ಕ್ರಮವಾಗಿ 3, 4, 5ನೇ ಸ್ಥಾನಕ್ಕೇರಿದ್ದರೆ, ವಿಶ್ವಕಪ್​ಗೆ ಮುನ್ನ ಅಗ್ರಸ್ಥಾನದಲ್ಲಿದ್ದ ಮೊಹಮದ್​ ನಬಿ 6ನೇ ಸ್ಥಾನಕ್ಕೆ ಕುಸಿದಿದ್ದಾರೆ.

ಟಿ20 ಬ್ಯಾಟಿಂಗ್​ ರ‍್ಯಾಂಕಿಂಗ್​ನಲ್ಲಿ ಹೆಚ್ಚಿನ ಏರುಪೇರಾಗಿಲ್ಲ. ಟ್ರಾವಿಸ್​ ಹೆಡ್​ ಮತ್ತು ಸೂರ್ಯಕುಮಾರ್​ ಯಾದವ್​ ಮೊದಲ 2 ಸ್ಥಾನಗಳಲ್ಲಿ ಮುಂದುವರಿದಿದ್ದಾರೆ. ಯಶಸ್ವಿ ಜೈಸ್ವಾಲ್​ 7ನೇ ಸ್ಥಾನದಲ್ಲೇ ಉಳಿದಿದ್ದಾರೆ. ರೋಹಿತ್​ ಶರ್ಮ ಮತ್ತು ವಿರಾಟ್​ ಕೊಹ್ಲಿ ಕ್ರಮವಾಗಿ 36 ಮತ್ತು 40ನೇ ಸ್ಥಾನದೊಂದಿಗೆ ಟಿ20 ಕ್ರಿಕೆಟ್​ನಿಂದ ನಿರ್ಗಮಿಸಿದಂತಾಗಿದೆ.

ಬುಮ್ರಾಗೆ ಭಾರಿ ಬಡ್ತಿ

ಐಸಿಸಿ ಟಿ20 ಬೌಲಿಂಗ್​ ರ‍್ಯಾಂಕಿಂಗ್​ನಲ್ಲಿ ಜಸ್​ಪ್ರೀತ್​ ಬುಮ್ರಾ ಭಾರಿ ಪ್ರಗತಿ ಕಂಡಿದ್ದಾರೆ. ಒಟ್ಟು 15 ವಿಕೆಟ್​ ಕಬಳಿಸುವ ಮೂಲಕ ಸರಣಿಶ್ರೇಷ್ಠ ಪ್ರಶಸ್ತಿಗೂ ಭಾಜನರಾದ ಬುಮ್ರಾ 12 ಸ್ಥಾನಕ್ಕೇರಿ ಅಗ್ರ 10ರ ಸನಿಹ ತಲುಪಿದ್ದಾರೆ. ಟೂರ್ನಿಗೆ ಮುನ್ನ ಅವರು ಅಗ್ರ 40ರಿಂದಲೂ ಹೊರಗಿದ್ದರು. ಇಂಗ್ಲೆಂಡ್​ನ ಆದಿಲ್​ ರಶೀದ್​ ಈಗಲೂ ನಂ. 1 ಬೌಲರ್​ ಆಗಿದ್ದರೆ, ದಣ ಆಫ್ರಿಕಾದ ವೇಗಿ ಅನ್ರಿಚ್​ ನೋಕಿಯಾ ಬರೋಬ್ಬರಿ 7 ಸ್ಥಾನ ಬಡ್ತಿ ಪಡೆದು 2ನೇ ಸ್ಥಾನಕ್ಕೇರಿದ್ದಾರೆ. 7ನೇ ಸ್ಥಾನದಲ್ಲಿರುವ ಅಕ್ಷರ್​ ಪಟೇಲ್​ ಟಿ20ಯಲ್ಲಿ ಅಗ್ರ ಶ್ರೇಯಾಂಕಿತ ಭಾರತೀಯ ಬೌಲರ್​ ಆಗಿದ್ದಾರೆ. ಕುಲದೀಪ್​ ಯಾದವ್​ ಜಂಟಿ 8ನೇ ಸ್ಥಾನದಲ್ಲಿದ್ದಾರೆ. ಅರ್ಷದೀಪ್​ ಸಿಂಗ್​ 13ನೇ ಸ್ಥಾನದಲ್ಲಿದ್ದಾರೆ.

ಭಾರತದ 3ನೇ ವಿಶ್ವ ನಂ.1

ಹಾರ್ದಿಕ್​ ಪಾಂಡ್ಯ ಹಾಲಿ ಐಸಿಸಿ ರ‍್ಯಾಂಕಿಂಗ್​ನಲ್ಲಿ ವಿಶ್ವ ನಂ. 1 ಪಟ್ಟ ಅಲಂಕರಿಸಿರುವ 3ನೇ ಭಾರತೀಯರಾಗಿದ್ದಾರೆ. ಟೆಸ್ಟ್​ ಆಲ್ರೌಂಡರ್​ ರ‍್ಯಾಂಕಿಂಗ್​ನಲ್ಲಿ ರವೀಂದ್ರ ಜಡೇಜಾ ಮತ್ತು ಟೆಸ್ಟ್​ ಬೌಲಿಂಗ್​ ರ‍್ಯಾಂಕಿಂಗ್​ನಲ್ಲಿ ಆರ್​. ಅಶ್ವಿನ್​ ಈಗಾಗಲೆ ನಂ. 1 ಪಟ್ಟದಲ್ಲಿದ್ದಾರೆ. ಟಿ20 ಬ್ಯಾಟಿಂಗ್​ ರ‍್ಯಾಂಕಿಂಗ್​ನಲ್ಲಿ ಸೂರ್ಯಕುಮಾರ್​ ಇತ್ತೀಚೆಗಷ್ಟೇ ನಂ. 1 ಪಟ್ಟ ಕಳೆದುಕೊಂಡಿದ್ದರೆ, ಶುಭಮಾನ್​ ಗಿಲ್​ ಏಕದಿನ ಬ್ಯಾಟಿಂಗ್​ ರ‍್ಯಾಂಕಿಂಗ್​ನಲ್ಲಿ ಅಗ್ರಸ್ಥಾನದ ಸನಿಹ 2ನೇ ಸ್ಥಾನದಲ್ಲಿದ್ದಾರೆ. ಭಾರತ ತಂಡ ಏಕದಿನ ಮತ್ತು ಟಿ20 ರ‍್ಯಾಂಕಿಂಗ್​ನಲ್ಲಿ ಅಗ್ರಸ್ಥಾನದಲ್ಲಿದೆ.

https://www.vijayavani.net/karnataka-wrote-history-in-south-india-wrestling-championship