ASIAN GAMES: ರಜತಕ್ಕೆ ಗುರಿಯಿಟ್ಟ ಈಶಾ; ಪದಕವಿಲ್ಲದೆ ಬರಿಗೈಯಲ್ಲಿ ಮರಳಿದ ಮನು ಭಾಕರ್​!

ಐಚಿ-ನಗೋಯಾ: ಹೈದರಾಬಾದ್​ನ ಈಶಾ ಸಿಂಗ್ ಏಷ್ಯಾಡ್​​ ಮಹಿಳೆಯರ 25 ಮೀ. ಪಿಸ್ತೂಲ್​ ಶೂಟಿಂಗ್​ ವೈಯಕ್ತಿಕ ವಿಭಾಗದಲ್ಲಿ ರಜತ ಪದಕಕ್ಕೆ ಕೊರಳೊಡ್ಡಿದರು. ಸತತ 2 ದಿನಗಳ ಶೂಟಿಂಗ್​ನಿಂದ ತೋಳು ಮತ್ತು ಭುಜ ನೋಯುತ್ತಿದ್ದ ಮತ್ತು ಸುಸ್ತಾಗಿದ್ದ ನಡುವೆ 21 ವರ್ಷದ ಈಶಾ ಸಿಂಗ್​, 5 ಶೂಟ್​-ಆಫ್​​ಗಳಲ್ಲಿ ರೋಚಕ ಸೋಲು ಅನುಭವಿಸಿ ಚಿನ್ನದ ಪದಕದಿಂದ ವಂಚಿತರಾದರು. ಹಾಲಿ ವಿಶ್ವ ನಂ.1 ಆಗಿರುವ ಈಶಾ, ಫೈನಲ್​ನಲ್ಲಿ ಚೀನಾದ ಕ್ಸಿಯಾವೊ ಜಿಯಾರುಕ್ಸಿಯನ್​ ವಿರುದ್ಧ ಕೊನೇ ಸುತ್ತಿನಲ್ಲಿ 38 ಅಂಕಗಳ ಸಮಬಲ ಸಾಧಿಸಿದರು. ಬಳಿಕ ಶೂಟ್​-ಆಫ್​ನಲ್ಲಿ ಕೊನೇ ಹಂತದಲ್ಲಿ ಲಯ ತಪ್ಪಿದರು. ಉತ್ತರ ಕೊರಿಯಾದ ಕಿಮ್​ ಹ್ಯೋನ್​ ಸುಕ್​ (34) ಕಂಚು ಜಯಿಸಿದರು. ಈಶಾ ಇದಕ್ಕೆ ಮುನ್ನ ಅರ್ಹತಾ ಸುತ್ತಿನಲ್ಲಿ 580 ಅಂಕ ಗಳಿಸಿ ಫೈನಲ್​ಗೇರಿದ್ದರು.

ಮನು ಭಾಕರ್​ಗೆ ಪದಕವಿಲ್ಲ!

ಒಲಿಂಪಿಕ್ಸ್​ ಅವಳಿ ಕಂಚಿನ ಪದಕ ವಿಜೇತೆ ಮನು ಭಾಕರ್​ 10 ಮೀ. ಬಳಿಕ 25 ಮೀ. ಪಿಸ್ತೂಲ್​ ವಿಭಾಗದಲ್ಲೂ ತಂಡ ಮತ್ತು ವೈಯಕ್ತಿಕವಾಗಿ ಪದಕ ಗೆಲ್ಲದೆ ನಿರಾಸೆ ಅನುಭವಿಸಿದರು. 25 ಮೀ. ಪಿಸ್ತೂಲ್​ನ ವೈಯಕ್ತಿಕ ವಿಭಾಗದಲ್ಲಿ ಅವರು ಫೈನಲ್​ಗೇರಲು ಕೂಡ ವಿಫಲರಾದರು. 2 ದಿನಗಳ ಶೂಟಿಂಗ್​ ಬಳಿಕ 579 ಅಂಕ ಗಳಿಸಿದ ಅವರು 11ನೇ ಸ್ಥಾನಕ್ಕೆ ತೃಪ್ತಿಪಟ್ಟರು. ಅವರು 2023ರ ಏಷ್ಯಾಡ್​ನಲ್ಲಿ 1 ಚಿನ್ನ ಗೆದ್ದಿದ್ದರು.

ಗುರಿ ತಪ್ಪಿದ ರಾಹಿ, ಕೈಜಾರಿದ ಪದಕ!

ಮಹಿಳೆಯರ 25 ಮೀ. ಪಿಸ್ತೂಲ್​ ತಂಡ ವಿಭಾಗದಲ್ಲಿ ರಾಹಿ ಸನೋರ್ಬತ್​ ನಿರ್ಣಾಯಕ ಘಟ್ಟದ ಒಂದು ಶೂಟ್​ನಲ್ಲಿ ಗುರಿ ತಪ್ಪಿದ್ದರಿಂದ ಭಾರತ ತಂಡ ಪದಕ ಗೆಲುವಿನಿಂದ ವಂಚಿತವಾಯಿತು. ಮಹಾರಾಷ್ಟ್ರದ 35 ವರ್ಷದ ರಾಹಿ 5 ಶೂಟ್​ ಒಳಗೊಂಡ 4ನೇ ಸರಣಿಯಲ್ಲಿ 39 ಅಂಕಗಳನ್ನಷ್ಟೇ ಗಳಿಸಿದರು. ಅವರ ಒಂದು ಶೂಟ್​ ಟಾರ್ಗೆಟ್​ನಿಂದ ಹೊರಬಿದ್ದಿದೆ ಎಂದು ಪರಿಗಣಿಸಿದ ರೆಫ್ರಿ ಒಂದೂ ಅಂಕವನ್ನು ನೀಡಲಿಲ್ಲ. ಇದರಿಂದ ರಾಹಿ 568 ಅಂಕದೊಂದಿಗೆ 30ನೇ ಸ್ಥಾನಕ್ಕೆ ತೃಪ್ತಿಪಟ್ಟರು. ಇದರಿಂದ ಭಾರತ ತಂಡ ಒಟ್ಟು 1,727 ಅಂಕಗಳೊಂದಿಗೆ 5ನೇ ಸ್ಥಾನಕ್ಕೆ ತೃಪ್ತಿಪಟ್ಟಿತು. ರಾಹಿ ಆ ಶೂಟ್​ನಲ್ಲಿ ಕನಿಷ್ಠ 9 ಅಂಕ ಗಳಿಸಿದರೂ ಭಾರತಕ್ಕೆ ರಜತ ಪದಕ ಜಯಿಸುವ ಅವಕಾಶವಿತ್ತು. ಚೀನಾ (1,743) ಚಿನ್ನ ಗೆದ್ದರೆ, ದಣ ಕೊರಿಯಾ (1735) ಬೆಳ್ಳಿ, ಚೀನಾ ತೈಪೆ (1734) ಕಂಚು ಜಯಿಸಿತು.