ಲೀಡ್ಸ್​ನ ಹಸಿರು ಪಿಚ್​ನಲ್ಲಿ ಗಿಲ್ ಬಳಗದ ಮೊದಲ ಟೆಸ್ಟ್: ಕ್ರಿಕೆಟಿಗರಿಗೆ ಕೊಹ್ಲಿಯ ಲಂಡನ್​ ಮನೆಯಲ್ಲಿ ಆತಿಥ್ಯ

ಲಂಡನ್: ಭಾರತ ಮತ್ತು ಆತಿಥೇಯ ಇಂಗ್ಲೆಂಡ್​ ನಡುವಿನ ಟೆಸ್ಟ್​ ಸರಣಿಯ ಮೊದಲ ಪಂದ್ಯಕ್ಕೆ ಲೀಡ್ಸ್​ನ ಹೆಡಿಂಗ್ಲೆ ಸ್ಟೇಡಿಯಂನಲ್ಲಿ ಸಂಪೂರ್ಣ ಹಸಿರಾಗಿರುವ ಪಿಚ್​ ಸಿದ್ಧಗೊಂಡಿದೆ. ಪಿಚ್​ ಕ್ಯುರೇಟರ್​ ರಿಚರ್ಡ್​ ರಾಬಿನ್​ಸನ್​, ಪಂದ್ಯಕ್ಕೆ ಪಿಚ್​ನಲ್ಲಿ ಗಣನೀಯ ಪ್ರಮಾಣದ ಹಸಿರು ಹುಲ್ಲು ಉಳಿಸಿಕೊಳ್ಳುವ ಯೋಚನೆಯನ್ನು ಹೊಂದಿದ್ದಾರೆ. ಜತೆಗೆ ಪಂದ್ಯದ ಮೊದಲ ಇನಿಂಗ್ಸ್​ನಲ್ಲಿ 300 ರನ್​ ಬಂದರೆ ಅದು ಉತ್ತಮ ಮೊತ್ತವೇ ಆಗಿರಲಿದೆ ಎಂದು ಅಭಿಪ್ರಾಯ ಪಟ್ಟಿದ್ದಾರೆ.

ಹಾಲಿ ವರ್ಷ ಲೀಡ್ಸ್​ನಲ್ಲಿ ಹೆಚ್ಚಿನ ಮಳೆ ಬಿದ್ದಿಲ್ಲ. ಪಂದ್ಯಕ್ಕೆ ಮುನ್ನ 20-25 ಡಿಗ್ರಿ ಉಷ್ಣಾಂಶವಿದೆ. ಹೀಗಾಗಿ ಪಿಚ್​ ಮೇಲೆ ಸರಿಯಾದ ಪ್ರಮಾಣದಲ್ಲಿ ತೇವಾಂಶ ಮತ್ತು ಹಸಿರು ಹುಲ್ಲು ಉಳಿಸಿ ಸ್ಪರ್ಧಾತ್ಮಕ ಪಿಚ್​ ರೂಪಿಸುವುದು ಸವಾಲೆನಿಸಿದೆ. ಪಂದ್ಯ 3 ದಿನದಲ್ಲೇ ಮುಗಿಯದೆ 5ನೇ ದಿನದವರೆಗೆ ಆಟ ನಡೆಯುವಂತೆ ಮಾಡುವ ವಿಶ್ವಾಸವನ್ನು ರಾಬಿನ್​ಸನ್​ ಹೊಂದಿದ್ದಾರೆ. ಇಲ್ಲಿ ಈ ಹಿಂದೆ ನಡೆದ 84 ಟೆಸ್ಟ್​ಗಳಲ್ಲಿ ಮೊದಲ ಇನಿಂಗ್ಸ್​ನ ಸರಾಸರಿ ಮೊತ್ತ 298 ರನ್​. ಈ ಸಲದ ಪಿಚ್​ ಕೂಡ ಬಹುತೇಕ ಅದೇ ರೀತಿಯಾಗಿರಲಿದೆ ಎಂದು ರಾಬಿನ್​ಸನ್​ ತಿಳಿಸಿದ್ದಾರೆ.

ಇತ್ತೀಚೆಗೆ ಕ್ರಿಕೆಟ್​ನಿಂದ ದೂರವಿರುವ ಸಮಯದಲ್ಲಿ ಕುಟುಂಬದೊಂದಿಗೆ ಲಂಡನ್​ನಲ್ಲಿ ನೆಲೆಸಿರುವ ಸ್ಟಾರ್​ ಬ್ಯಾಟರ್​ ವಿರಾಟ್​ ಕೊಹ್ಲಿ, ಇಂಗ್ಲೆಂಡ್​ ವಿರುದ್ಧದ ಮೊದಲ ಟೆಸ್ಟ್​ ಪಂದ್ಯಕ್ಕೆ ಪೂರ್ವಭಾವಿಯಾಗಿ ಭಾರತ ತಂಡದ ಆಟಗಾರರಾದ ಶುಭಮಾನ್​ ಗಿಲ್​, ರಿಷಭ್​ ಪಂತ್​, ಮೊಹಮದ್​ ಸಿರಾಜ್​ಗೆ ಆತಿಥ್ಯ ನೀಡಿದ್ದಾರೆ. ಲಂಡನ್​ನ ತನ್ನ ಮನೆಗೆ ಈ ಆಟಗಾರರನ್ನು ಕರೆಸಿಕೊಂಡು ಕೊಹ್ಲಿ ಔತಣ ನೀಡಿದ್ದಾರೆ ಎನ್ನಲಾಗಿದೆ. ಕೊಹ್ಲಿ ಇಂಗ್ಲೆಂಡ್​ ಪ್ರವಾಸಕ್ಕೆ ಭಾರತ ತಂಡ ಪ್ರಕಟಗೊಳ್ಳುವುದಕ್ಕೆ ಮುನ್ನವೇ ಟೆಸ್ಟ್​ ಕ್ರಿಕೆಟ್​ಗೆ ವಿದಾಯ ಘೋಷಿಸಿದ್ದರು.