ಪ್ಯಾರಿಸ್: ಭರ್ಜರಿ ಗೆಲುವಿನ ಲಯ ಮುಂದುವರಿಸಿದ ವಿಶ್ವ ನಂ.1 ತಾರೆ ಇಗಾ ಸ್ವಿಯಾಟೆಕ್ ಎರಡನೇ ಬಾರಿಗೆ ಪ್ರತಿಷ್ಠಿತ ಫ್ರೆಂಚ್ ಓಪನ್ ಗ್ರಾಂಡ್ ಸ್ಲಾಂ ಗೆದ್ದುಕೊಂಡರು. ರೋಲ್ಯಾಂಡ್ ಗ್ಯಾರಸ್ನಲ್ಲಿ ಶನಿವಾರ ನಡೆದ ಮಹಿಳೆಯರ ಸಿಂಗಲ್ಸ್ ವಿಭಾಗದ ಪ್ರಶಸ್ತಿ ಸುತ್ತಿನ ಹೋರಾಟದಲ್ಲಿ ಪೋಲೆಂಡ್ ಆಟಗಾರ್ತಿ ಸ್ವಿಯಾಟೆಕ್ 6-1, 6-3 ನೇರ ಸೆಟ್ಗಳಿಂದ ಅಮೆರಿಕದ ಯುವತಾರೆ ಕೋಕೋ ಗೌಫ್ ಎದುರು ಕೇವಲ 68 ನಿಮಿಷಗಳಲ್ಲಿ ಗೆಲುವು ದಾಖಲಿಸಿದರು. ಸತತ 35ನೇ ಗೆಲುವು ದಾಖಲಿಸುವ ಮೂಲಕ ಸ್ವಿಯಾಟೆಕ್, ಅಮೆರಿಕದ ವೀನಸ್ ವಿಲಿಯಮ್ಸ್ ದಾಖಲೆಯನ್ನು ಸರಿಗಟ್ಟಿದರು. 2020ರಲ್ಲಿ ಕಡೇ ಬಾರಿಗೆ ಪ್ರಶಸ್ತಿ ಜಯಿಸಿದ್ದ ಸ್ವಿಯಾಟೆಕ್, ಮುಕ್ತಯುಗದಲ್ಲಿ 2 ಬಾರಿ ಬಾರಿ ಫ್ರೆಂಚ್ ಓಪನ್ ಜಯಿಸಿದ 10ನೇ ಆಟಗಾರ್ತಿ ಎನಿಸಿದ್ದಾರೆ.
