ಕಿಸ್​ ಮಾಡಿ ಡೋಪಿಂಗ್​ನಲ್ಲಿ ಸಿಕ್ಕಿಬಿದ್ದಿದ್ದ ಕತ್ತಿವರಸೆ ತಾರೆ ಶಿಕ್ಷೆಯಿಂದ ಪಾರು!

ಲೌಸನ್ನೆ: ತನ್ನ ಅಮೆರಿಕನ್​ ಬಾಯ್​ಫ್ರೆಂಡ್​ಗೆ 9 ದಿನಗಳ ಕಾಲ ನಿರಂತರ ಕಿಸ್​ ನೀಡಿದ ಪರಿಣಾಮ ಫ್ರಾನ್ಸ್​ನ ಒಲಿಂಪಿಯನ್​ ಕತ್ತಿವರಸೆ ಪಟು ಯಸೋರಾ ಥಿಬಸ್​ ಉದ್ದೀಪನ ಪರೀಕ್ಷೆಯಲ್ಲಿ ಸಿಕ್ಕಿಬಿದ್ದಿದ್ದರು. ಆದರೆ ಇದೀಗ, ತಾನು ಡೋಪಿಂಗ್​ನಲ್ಲಿ ಹೇಗೆ ಸಿಕ್ಕಿಬಿದ್ದೆ ಎಂದು ಅವರು ನೀಡಿರುವ ಈ ವಿವರಣೆಯನ್ನು ಕ್ರೀಡಾ ಮಧ್ಯಸ್ಥಿಕೆ ನ್ಯಾಯಾಲಯ (ಸಿಎಎಸ್​) ಒಪ್ಪಿಕೊಂಡಿದ್ದು, ಅವರನ್ನು ದೋಷಮುಕ್ತಗೊಳಿಸಿ ಶಿಕ್ಷೆಯಿಂದಲೂ ಪಾರು ಮಾಡಿದೆ. ಈ ಪ್ರಕರಣದಲ್ಲಿ ವಾಡಾ, ಥಿಬಸ್​ಗೆ 4 ವರ್ಷ ನಿಷೇಧ ಶಿಕ್ಷೆಯನ್ನೂ ನೀಡಿತ್ತು.

ಆದರೆ, ನಿಷೇಧಿತ ಉದ್ದೀಪನವನ್ನು ಬಳಸುತ್ತಿದ್ದ ಬಾಯ್​ಫ್ರೆಂಡ್ಗೆ ಕಿಸ್​ ನೀಡಿದ್ದರಿಂದ ಥಿಬಸ್​ ದೇಹಕ್ಕೂ ಗೊತ್ತಿಲ್ಲದೆ ಅದು ಬಂದಿರುವುದರಿಂದ ಅವರನ್ನು ತಪ್ಪಿತಸ್ಥರೆಂದು ಪರಿಗಣಿಸಲು ಸಿಎಎಸ್​ ನಿರಾಕರಿಸಿದೆ. ಅಲ್ಲದೆ 2009ರಲ್ಲಿ ಟೆನಿಸ್​ ಆಟಗಾರ ರಿಚರ್ಡ್​ ಗಾಸ್ಕೆಟ್​ ಕೂಡ ಕೊಕೇನ್​ ಸೇವಿಸಿದ ಗೆಳತಿಗೆ ಕಿಸ್​ ನೀಡಿ ಡೋಪಿಂಗ್​ನಲ್ಲಿ ಸಿಕ್ಕಿಬಿದ್ದಾಗ ಶಿಕ್ಷೆಯಿಂದ ಪಾರಾದ ದೃಷ್ಟಾಂತವನ್ನು ಪರಿಗಣಿಸಲಾಗಿದೆ. ಥಿಬಸ್​ 2021ರ ಟೋಕಿಯೊ ಒಲಿಂಪಿಕ್ಸ್​ನಲ್ಲಿ ರಜತ ಗೆದ್ದಿದ್ದರೆ, 2024ರ ಪ್ಯಾರಿಸ್​ ಒಲಿಂಪಿಕ್ಸ್​ನಲ್ಲಿ 5ನೇ ಸ್ಥಾನ ಪಡೆದಿದ್ದರು.