ಕರೊನಾ ಭೀತಿ ನಡುವೆ ಬೆಂಗಳೂರಿನ ಫ್ರೀಸ್ಟೈಲ್ ಫುಟ್ಬಾಲ್ ತಾರೆ ಸಾಯಿ ತೇಜಸ್ ಗಮನಾರ್ಹ ಸಾಧನೆ ಮಾಡಿದ್ದಾರೆ. ಫುಟ್ಬಾಲ್ ಫ್ರೀಸ್ಟೈಲ್ ಕಲಾವಿದನಾಗಿರುವ ತೇಜಸ್, ಏಕಕಾಲದಲ್ಲಿ 8 ಚೆಂಡುಗಳನ್ನು ತಿರುಗಿಸುವ ಕಲೆ ಹೊಂದಿದ್ದಾರೆ. ಪ್ರತಿಭಾನ್ವಿತ ತೇಜಸ್ ತಮ್ಮ ಕಲೆಯಿಂದಾಗಿ ಈಗ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಗಮನಸೆಳೆಯುತ್ತಿದ್ದಾರೆ. ವಿಶ್ವದಾದ್ಯಂತ 5 ದಶಲಕ್ಷ ಹಿಂಬಾಲಕರನ್ನು ಹೊಂದಿರುವ ಯೆಸ್ ಥಿಯೆರಿ ಅವರ ಲಿವಿಂಗ್ ರೂಮ್ಸ್ ಗಾಟ್ ಟ್ಯಾಲೆಂಟ್ ಚಾಲೆಂಜ್ ಸ್ಪರ್ಧೆಯಲ್ಲಿ ಅಗ್ರ 7ರೊಳಗೆ ಸ್ಥಾನ ಪಡೆದಿದ್ದಾರೆ. ಇದೇ ವೇಳೆ ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದರ ಬಗ್ಗೆಯೂ ಸಂದೇಶ ರವಾನಿಸಿದ್ದಾರೆ. ಇಂಗ್ಲೆಂಡ್, ಕೊಲಂಬಿಯಾ, ಯುಎಸ್ಎ ಸೇರಿದಂತೆ ಹಲವು ದೇಶಗಳಿಂದ ಸಾವಿರಾರು ಸ್ಪರ್ಧಿಗಳು ಈ ಸ್ಪರ್ಧೆಯಲ್ಲಿ ಭಾಗವಹಿಸಿದ್ದರು. ಒಂದು ನಿಮಿಷ ಮೀರದ ವಿಡಿಯೋ ಪ್ರದರ್ಶನ ನೀಡಲಾಯಿತು.
