ಭಾರತ ಟೆಸ್ಟ್​ ತಂಡದ ಆಯ್ಕೆಗೆ ಐಪಿಎಲ್​ ನಿರ್ವಹಣೆ ಮಾನದಂಡ; ಮಾಜಿ ಕ್ರಿಕೆಟಿಗರ ಕಿಡಿ

ನವದೆಹಲಿ: ಭಾರತ ಟೆಸ್ಟ್​ ತಂಡದ ಆಯ್ಕೆಯ ವೇಳೆ ರಣಜಿ ಟ್ರೋಫಿಯಲ್ಲಿ ಆಟಗಾರರು ತೋರಿರುವ ನಿರ್ವಹಣೆಗೆ ಬದಲಾಗಿ ಐಪಿಎಲ್​ನಲ್ಲಿ ನೀಡಿರುವ ಪ್ರದರ್ಶನವನ್ನು ಪರಿಗಣಿಸಿರುವ ಬಗ್ಗೆ ಸುನೀಲ್​ ಗಾವಸ್ಕರ್​, ರವಿಶಾಸ್ತ್ರಿ, ದೊಡ್ಡ ಗಣೇಶ್​ ಸಹಿತ ಕೆಲ ಮಾಜಿ ಕ್ರಿಕೆಟಿಗರು ಕಟುವಾಗಿ ಟೀಕಿಸಿದ್ದಾರೆ.

ದೇಶೀಯ ಕ್ರಿಕೆಟ್​ನಲ್ಲಿ ಕಳೆದ 3 ವರ್ಷಗಳಲ್ಲಿ 37 ಪ್ರಥಮ ದರ್ಜೆ ಪಂದ್ಯಗಳಲ್ಲಿ 13 ಶತಕಗಳ ಸಹಿತ 79.65ರ ಸರಾಸರಿಯಲ್ಲಿ 3,505 ರನ್​ ಸಿಡಿಸಿರುವ ಸರ್ಫ್ರಾಜ್​ ಖಾನ್​ ಜತೆಗೆ ಪ್ರಿಯಾಂಕ್​ ಪಾಂಚಾಲ್​, ಅಭಿಮನ್ಯು ಈಶ್ವರನ್​ ಮುಂತಾದ ಬ್ಯಾಟರ್​ಗಳ ನಿರ್ವಹಣೆಯನ್ನು ಪರಿಗಣಿಸದೆ ಐಪಿಎಲ್​ನಲ್ಲಿ ಸಿಎಸ್​ಕೆ ಪರ ಮಿಂಚಿದ ಋತುರಾಜ್​ ಗಾಯಕ್ವಾಡ್​ರನ್ನು ಆರಿಸಿರುವ ಬಗ್ಗೆ ಅವರು ಟೀಕಿಸಿದ್ದಾರೆ. ಋತುರಾಜ್​ ಕಳೆದ ರಣಜಿ ಟ್ರೋಫಿಯಲ್ಲಿ ಮಹಾರಾಷ್ಟ್ರ ತಂಡದಲ್ಲೇ 5 ಗರಿಷ್ಠ ರನ್​ಸ್ಕೋರರ್​ ಆಗಿದ್ದರು.

ನೆಟ್ಸ್​ನಲ್ಲಿ ಪೂಜಾರ ಅಭ್ಯಾಸ

ಭಾರತ ಟೆಸ್ಟ್​ ತಂಡದಿಂದ ಹೊರಬಿದ್ದಿರುವ ನಡುವೆ, ಇದರಿಂದ ವಿಚಲಿತರಾಗದಿರುವ ಸೌರಾಷ್ಟ್ರ ಬ್ಯಾಟ್ಸ್​ಮನ್​ ಚೇತೇಶ್ವರ ಪೂಜಾರ, ಶನಿವಾರ ನೆಟ್ಸ್​ನಲ್ಲಿ ಬ್ಯಾಟಿಂಗ್​ ಅಭ್ಯಾಸ ನಡೆಸಿದ್ದಾರೆ. ಪೂಜಾರ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ 9 ಸೆಕೆಂಡ್​ಗಳ ಈ ವಿಡಿಯೋ ವೈರಲ್​ ಆಗಿದೆ. ಪೂಜಾರ ರಾಷ್ಟ್ರೀಯ ತಂಡಕ್ಕೆ ಮರಳುವ ವಿಶ್ವಾಸ ಹೊಂದಿದ್ದಾರೆ ಎಂದು ಅವರ ತಂದೆ ಅರವಿಂದ್​ ತಿಳಿಸಿದ್ದಾರೆ. 35 ವರ್ಷದ ಪೂಜಾರ ಇನ್ನು ಜೂನ್​ 28ರಿಂದ ಬೆಂಗಳೂರಿನಲ್ಲಿ ನಡೆಯಲಿರುವ ದುಲೀಪ್​ ಟ್ರೋಫಿಯಲ್ಲಿ ಪಶ್ಚಿಮ ವಲಯ ಪರ ಕಣಕ್ಕಿಳಿಯಲಿದ್ದಾರೆ.

https://www.vijayavani.net/cheteshwar-pujara-scapegoat-angers-sunil-gavaskar