ನ್ಯೂಜೆರ್ಸಿ: ದಕ್ಷಿಣ ಆಫ್ರಿಕಾದ ಆತಿಥ್ಯದಲ್ಲಿ ನಡೆದ 2010ರ ಫಿಫಾ ವಿಶ್ವಕಪ್ ವೇಳೆ ಪರಾಗ್ವೆ ರೂಪದರ್ಶಿ ಲಾರಿಸ್ಸಾ ರಿಕೆಲ್ಮೆ (Larissa Riquelme) ತನ್ನ ದೇಶ ಪ್ರಶಸ್ತಿ ಗೆದ್ದರೆ ಬತ್ತಲೆಯಾಗಿ ಬೀದಿಯಲ್ಲಿ ತಿರುಗುವೆ ಎಂಬ ಹೇಳಿಕೆ ಮತ್ತು ಎದೆ ಸಂಧಿಯಲ್ಲಿ ನೋಕಿಯಾ ಮೊಬೈಲ್ ಇಟ್ಟುಕೊಂಡ ಹೊಸ ಸ್ಟೈಲ್ನಿಂದ ವಿಶ್ವದೆಲ್ಲೆಡೆ ಸುದ್ದಿಯಾಗಿದ್ದರು.ಇದೀಗ ಉತ್ತರ ಅಮೆರಿಕದ ವಿಶ್ವಕಪ್ ವೇಳೆ ಅವರು 16 ವರ್ಷಗಳ ಬಳಿಕ ಹೊಸ ಪಾತ್ರದೊಂದಿಗೆ ಮರುಪ್ರವೇಶ ಪಡೆದಿದ್ದಾರೆ.
ವಿಶ್ವಕಪ್ನಲ್ಲಿ ಗ್ಲಾಮರಸ್ ಸೂಪರ್ಫ್ಯಾನ್ ಆಗಿಯೂ ವೈರಲ್ ಆಗಿದ್ದ ಅವರು ಬಳಿಕ ರೂಪದರ್ಶಿಯಾಗಿ ಭಾರಿ ಬೇಡಿಕೆ ಪಡೆದಿದ್ದರು. "ಪ್ಲೇಬಾಯ್' ಮ್ಯಾಗಜಿನ್ ಮುಖಪುಟದಲ್ಲೂ ಕಾಣಿಸಿಕೊಂಡಿದ್ದರು. ಈ ಜನಪ್ರಿಯತೆಯಿಂದ ಅವರು ಪರಾಗ್ವೆಯ ನಂ. 1 ರೂಪದರ್ಶಿ ಎನಿಸಿದ್ದರು ಮತ್ತು ಅವರ ಬದುಕು ಬದಲಾಗಿತ್ತು.
ಇದೀಗ ಪರಾಗ್ವೆ ತಂಡ 16 ವರ್ಷಗಳ ಬಳಿಕ ಫಿಫಾ ವಿಶ್ವಕಪ್ಗೆ ಮರುಪ್ರವೇಶ ಪಡೆದಿರುವ ಸಮಯದಲ್ಲಿ ಲಾರಿಸ್ಸಾ ಕೂಡ ಮರಳಿದ್ದಾರೆ. ಈ ಬಾರಿ ಅವರು ಕಾಮೆಂಟೇಟರ್ ಕೆಲಸದ ಜವಾಬ್ದಾರಿಯೊಂದಿಗೆ ಆಗಮಿಸಿದ್ದಾರೆ. 3 ವರ್ಷಗಳ ಕಾಲ ವೀಕ್ಷಕವಿವರಣೆಗಾಗಿ ಪತ್ರಿಕೋದ್ಯಮದ ತರಬೇತಿ ಪಡೆದಿರುವ 41 ವರ್ಷದ ಲಾರಿಸ್ಸಾ, ಕಳೆದ ಸೆಪ್ಟೆಂಬರ್ನಲ್ಲಿ ಪರಾಗ್ವೆಯ ವಿಶ್ವಕಪ್ ಅರ್ಹತಾ ಪಂದ್ಯದ ವೇಳೆ ವೀಕ್ಷಕ ವಿವರಣೆಗೆ ಪದಾರ್ಪಣೆಯನ್ನೂ ಮಾಡಿದ್ದರು.
