ಈ ಬಾರಿ ಫಿಫಾ ವಿಶ್ವಕಪ್​ ಪಂದ್ಯಗಳಲ್ಲಿ ಬಳಸುವ ಮುನ್ನ ಚಾರ್ಜ್​ ಮಾಡಬೇಕಿದೆ ಕಾಲ್ಚೆಂಡು!

ಫಿಫಾ ವಿಶ್ವಕಪ್​ನಲ್ಲಿ 1970ರಿಂದಲೂ ಕ್ರೀಡಾ ಉಡುಪುಗಳ ದೈತ್ಯ ಕಂಪನಿ "ಅಡಿಡಾಸ್​' ಸಿದ್ಧಪಡಿಸುವ ಚೆಂಡುಗಳನ್ನೇ ಬಳಸಲಾಗುತ್ತದೆ. ಈ ಬಾರಿ ಬಳಲಾಗುವ ಚೆಂಡು ಬರೀ ಫುಟ್​ಬಾಲ್​ ಅಲ್ಲ. ಅದು ಆಧುನಿಕ ತಂತ್ರಜ್ಞಾನಗಳಿಂದ ಕೂಡಿರುವ ಚೆಂಡಾಗಿದೆ. ಇದರಿಂದ ಚೆಂಡನ್ನು ಆಟಗಾರ ಸ್ಪರ್ಶಿಸಿರುವನೇ, ಇಲ್ಲವೇ ಎಂಬುದು ಸ್ಪಷ್ಟವಾಗುತ್ತದೆ. ಆಫ್​ಸೈಡ್​-ಹ್ಯಾಂಡ್​ಬಾಲ್​ನಂಥ ನಿರ್ಧಾರದ ವೇಳೆ ವಿಎಆರ್​ ಸಿಸ್ಟಮ್​ಗೆ ನಿಖರ ತೀರ್ಪು ನೀಡಲು ನೆರವಾಗಲಿದೆ.

ಟೂರ್ನಿಯಲ್ಲಿ ಪ್ರತಿ ಆಟಗಾರನನ್ನೂ ಡಿಜಿಟಲ್​ ಸ್ಕ್ಯಾನ್​​ ಮೂಲಕ ಕೃತಕ ಬುದ್ದಿಮತ್ತೆ (ಎಐ) ಸಕ್ರಿಯಗೊಳಿಸಿದ 3ಡಿ ಅವತಾರವನ್ನು ರಚಿಸಲಾಗುತ್ತದೆ. ಇದು ನಿಕಟ ನಿರ್ಧಾರಗಳ ಸ್ಪಷ್ಟ ದೃಶ್ಯೀಕರಣವನ್ನು ಒದಗಿಸುತ್ತದೆ ಮತ್ತು ಇದನ್ನು ಅಭಿಮಾನಿಗಳು ಸುಲಭವಾಗಿ ಅರ್ಥಮಾಡಿಕೊಳ್ಳಬಹುದಾಗಿದೆ ಎಂದು ಫಿಫಾ ತಿಳಿಸಿದೆ. 

ಈ ಸಲದ ಫುಟ್​ಬಾಲ್​, ಸ್ಮಾರ್ಟ್​ಬಾಲ್​ ತಂತ್ರಜ್ಞಾನವನ್ನು ಒಳಗೊಂಡಿದ್ದು, ಇದರ ಹೃದಯ ಭಾಗದಲ್ಲಿ 14 ಗ್ರಾಮ್​ನ ಮೋಷನ್​ ಸೆನ್ಸರ್​ ಚಿಪ್​ ಮತ್ತು ಬ್ಯಾಟರಿ ಕೂಡ ಇದೆ. ಇದು ಚೆಂಡಿನ ಚಲನೆ, ವೇಗ, ತಿರುವು ಮತ್ತು ಸ್ಥಾನವನ್ನು ಟ್ರ್ಯಾಕ್​ ಮಾಡುತ್ತಿರುತ್ತದೆ. ಪ್ರತಿ ಸೆಕೆಂಡ್​ಗೆ 500 ಬಾರಿ ಡೇಟಾವನ್ನು ವಿಎಆರ್​ ಸಿಸ್ಟಮ್​ಗೆ ರವಾನಿಸುತ್ತಿರುತ್ತದೆ. ಚೆಂಡನ್ನು ಒಮ್ಮೆ ಪೂರ್ಣ ಚಾರ್ಜ್​ ಮಾಡಿದರೆ 6 ಗಂಟೆಗಳ ಕಾಲ ನಿರಂತರವಾಗಿ ಬಳಸಬಹುದಾಗಿರುತ್ತದೆ. ಇದರಿಂದ ಪೂರ್ಣ ಪಂದ್ಯ, ಹೆಚ್ಚುವರಿ ಅವಧಿ ಮತ್ತು ಪೆನಾಲ್ಟಿ ಶೂಟೌಟ್​ನಲ್ಲೂ ಒಂದೇ ಚೆಂಡು ಬಳಸಬಹುದಾಗಿರುತ್ತದೆ. ಚೆಂಡು ಒಮ್ಮೆಗೆ ಪೂರ್ಣ ಚಾರ್ಜ್​ ಆಗಲು 90 ನಿಮಿಷ ಬೇಕಾಗುತ್ತದೆ. 

ಪ್ರತಿ ಆವೃತ್ತಿಯ ಫಿಫಾ ವಿಶ್ವಕಪ್​ನಲ್ಲಿ ಬಳಸಲಾಗುವ ಚೆಂಡಿಗೂ ಭಿನ್ನವಾದ ಹೆಸರು ಇಡಲಾಗುತ್ತದೆ. ಈ ಬಾರಿಯ ಚೆಂಡಿಗೆ "ಟ್ರಿಯೋಂಡಾ' ಎಂದು ನಾಮಕರಣ ಮಾಡಲಾಗಿದೆ. ಸ್ಪ್ಯಾನಿಷ್​ನಲ್ಲಿ "ಮೂರು ಅಲೆಗಳು' ಎಂಬುದು ಇದರ ಅರ್ಥವಾಗಿದೆ. 3 ಆತಿಥೇಯ ರಾಷ್ಟ್ರಗಳಾದ ಅಮೆರಿಕ, ಮೆಕ್ಸಿಕೋ, ಕೆನಡಾದ ಪ್ರತಿನಿಧಿಯಾಗಿ ನೀಲಿ, ಹಸಿರು, ಕೆಂಪು ಬಣ್ಣದಲ್ಲಿ ಚೆಂಡನ್ನು ವಿನ್ಯಾಸಗೊಳಿಸಿರುವುದರಿಂದ ಈ ಹೆಸರು ಇಡಲಾಗಿದೆ.