ಈ ಬಾರಿ ಫಿಫಾ ವಿಶ್ವಕಪ್​ ವಿಸ್ತಾರ; ತಂಡಗಳ ಸಂಖ್ಯೆ 48ಕ್ಕೆ ಏರಿಕೆ!

ಏಷ್ಯಾದಿಂದ 9, ಆಫ್ರಿಕಾದಿಂದ 10, ದ. ಅಮೆರಿಕದಿಂದ 7, ಯುರೋಪ್​ನಿಂದ 16, ಓಶಿಯಾನಿಯಾದಿಂದ ಒಂದು ತಂಡ ಟೂರ್ನಿಯಲ್ಲಿ ಭಾಗವಹಿಸಲಿವೆ. ತಂಡಗಳ ಸಂಖ್ಯೆ ಏರಿಕೆಯಿಂದ ಟೂರ್ನಿಯಲ್ಲಿ ಆಫ್ರಿಕಾ ಮತ್ತು ಏಷ್ಯಾದ ತಂಡಗಳ ಸ್ಪರ್ಧೆಯೂ ಹೆಚ್ಚಾಗಿದೆ.

ಹೆಚ್ಚಿನ ತಂಡಗಳ ಭಾಗವಹಿಸುವಿಕೆಯಿಂದ ಈ ಬಾರಿ ಸ್ಪರ್ಧಾತ್ಮಕತೆ ಹೆಚ್ಚಲಿದೆ. ಜತೆಗೆ ಹೆಚ್ಚಿನ ದೇಶಗಳ ಸ್ಟಾರ್​ ಆಟಗಾರರಿಗೂ ಟೂರ್ನಿಯಲ್ಲಿ ಆಡುವ ಅವಕಾಶ ಲಭಿಸಲಿದೆ. ತಂಡಗಳ ಸಂಖ್ಯೆ ಏರಿಕೆಯಿಂದ ಈ ಬಾರಿ ಪಂದ್ಯಗಳ ಸಂಖ್ಯೆಯೂ 40ರಷ್ಟು ಏರಿಕೆಯಾಗಿದೆ. ಅಂದರೆ 64ರಿಂದ 104ಕ್ಕೆ ಪಂದ್ಯಗಳ ಸಂಖ್ಯೆ ಹೆಚ್ಚಳವಾಗಲಿದೆ. ಹೀಗಾಗಿ ಇದು ಪಂದ್ಯಗಳ ಲೆಕ್ಕದಲ್ಲೂ ಅತಿದೊಡ್ಡ ವಿಶ್ವಕಪ್​ ಎನಿಸಿದೆ. ಟೂರ್ನಿಯ ನಾಕೌಟ್​ ಹಂತದಲ್ಲೂ 32 ತಂಡಗಳು ಕಣಕ್ಕಿಳಿಯಲಿವೆ. ಈ ಬಾರಿ ಪ್ರತಿ ಗುಂಪಿನ ಅಗ್ರ 2 ತಂಡಗಳ ಜತೆಗೆ, 3ನೇ ಸ್ಥಾನ ಪಡೆದ 8 ಅತ್ಯುತ್ತಮ ತಂಡಗಳೂ ನಾಕೌಟ್​ ಹಂತಕ್ಕೇರಲಿವೆ.

*ಫಿಫಾ ವಿಶ್ವಕಪ್​ನಲ್ಲಿ 48 ತಂಡಗಳನ್ನು ಆಡಿಸುವುದು ಸರಿಯಾದ ಹೆಜ್ಜೆ. 211 ದೇಶಗಳ ಫಿಫಾ ಸದಸ್ಯತ್ವ ಹೊಂದಿವೆ. ಈ ಪೈಕಿ ಶೇ. 25ರಷ್ಟು ತಂಡಗಳು ಮಾತ್ರ ವಿಶ್ವಕಪ್​ನಲ್ಲಿ ಆಡಲಿವೆ. ಅಂದರೆ ಪ್ರತಿ ನಾಲ್ಕರಲ್ಲಿ ಒಂದು ತಂಡಕ್ಕೆ ಮಾತ್ರಕ್ಕೆ ಸ್ಪರ್ಧೆ ಅವಕಾಶ ಲಭಿಸಲಿದೆ. ಶೇ. 75 ತಂಡಗಳಿಗೆ ಈಗಲೂ ವಿಶ್ವಕಪ್​ ಸ್ಪರ್ಧೆ ಅವಕಾಶ ಕೈತಪ್ಪಿದೆ.

ಮೂರು ಬಾರಿಯ ಚಾಂಪಿಯನ್​ ಇಟಲಿ ತಂಡ ಸತತ 3ನೇ ಬಾರಿ ಫಿಫಾ ವಿಶ್ವಕಪ್​ ತಪ್ಪಿಸಿಕೊಳ್ಳಲಿದೆ. ಈ ಬಾರಿಯೂ ಅರ್ಹತಾ ಟೂರ್ನಿಯಲ್ಲಿ ಇಟಲಿ ಮುಗ್ಗರಿಸಿತ್ತು. ಈ ಬಾರಿ ತಂಡಗಳ ಹೆಚ್ಚಿದ ನಡುವೆಯೂ ಇಟಲಿ ಅರ್ಹತೆ ತಪ್ಪಿಸಿಕೊಂಡಿರುವುದು ವಿಪರ್ಯಾಸವೆನಿಸಿದೆ. ಡೆನ್ಮಾರ್ಕ್​, ವೇಲ್ಸ್​, ಸೆರ್ಬಿಯಾ ಮತ್ತು ಪೋಲೆಂಡ್​ ಯುರೋಪ್​ ಖಂಡದಿಂದ ಈ ಬಾರಿ ಅರ್ಹತೆ ತಪ್ಪಿಸಿಕೊಂಡಿರುವ ಇತರ ಪ್ರಮುಖ ತಂಡಗಳಾಗಿವೆ. ಆಫ್ರಿಕಾ ಖಂಡದಿಂದ ಕ್ಯಾಮರೂನ್​ ಮತ್ತು ನೈಜೀರಿಯಾ ಈ ಬಾರಿ ಅರ್ಹತೆ ತಪ್ಪಿಸಿಕೊಂಡಿರುವ ಪ್ರಮುಖ ತಂಡಗಳಾಗಿವೆ. ಇನ್ನು ಜನಸಂಖ್ಯೆಯ ಲೆಕ್ಕದಲ್ಲಿ ಪ್ರಪಂಚದ ಅಗ್ರ 2 ತಂಡಗಳೆನಿಸಿರುವ ಚೀನಾ, ಭಾರತ ಈ ಬಾರಿಯೂ ಟೂರ್ನಿಗೆ ಅರ್ಹತೆ ಗಿಟ್ಟಿಸಿಕೊಂಡಿಲ್ಲ. 

ಕತಾರ್​ನಲ್ಲಿ ನಡೆದ ಕಳೆದ 2022ರ ಫಿಫಾ ವಿಶ್ವಕಪ್​ನಲ್ಲಿ ಆಡಿದ್ದ 32 ತಂಡಗಳ ಪೈಕಿ 26 ತಂಡಗಳು ಈ ಬಾರಿಯೂ ಟೂರ್ನಿಗೆ ಅರ್ಹತೆ ಗಿಟ್ಟಿಸಿಕೊಂಡಿವೆ. ಕಳೆದ ಬಾರಿ ಆಡಿದ್ದ ಕೋಸ್ಟಾರಿಕಾ, ಕ್ಯಾಮರೂನ್​, ಡೆನ್ಮಾರ್ಕ್​, ಪೋಲೆಂಡ್​, ಸೆರ್ಬಿಯಾ ಮತ್ತು ವೇಲ್ಸ್​ ಈ ಬಾರಿ ಅರ್ಹತೆಯಿಂದ ವಂಚಿತವಾಗಿವೆ. 4 ದೇಶಗಳಾದ ಕೇಪ್​ ವರ್ಡೆ, ಕುರಾಕಾವೊ, ಜೋರ್ಡಾನ್​ ಮತ್ತು ಉಜ್ಬೇಕಿಸ್ತಾನ ಈ ಬಾರಿ ಫಿಫಾ ವಿಶ್ವಕಪ್​ಗೆ ಪದಾರ್ಪಣೆ ಮಾಡಲಿವೆ. ಕಳೆದ ವರ್ಷ ಆತಿಥೇಯ ತಂಡವಾಗಿ ನೇರಅರ್ಹತೆ ಪಡೆದಿದ್ದ ಕತಾರ್​, ಇದೇ ಮೊದಲ ಬಾರಿಗೆ ಅರ್ಹತಾ ಟೂರ್ನಿಯ ಮೂಲಕ ವಿಶ್ವಕಪ್​ನಲ್ಲಿ ಆಡುವ ಅವಕಾಶ ಗಿಟ್ಟಿಸಿಕೊಂಡಿದೆ. ಕಾಂಗೋ ಡಿಆರ್​ ಮತ್ತು ಹೈಟಿ ದೇಶಗಳು ಬರೋಬ್ಬರಿ 52 ವರ್ಷಗಳ ಬಳಿಕ ಅಂದರೆ 1974ರ ಬಳಿಕ ವಿಶ್ವಕಪ್​ ಆಡುವ ಅವಕಾಶ ಪಡೆದಿವೆ. ಇನ್ನುಳಿದಂತೆ ಇರಾಕ್​ 1986ರ ಬಳಿಕ, ಆಸ್ಟ್ರಿಯಾ, ನಾರ್ವೆ, ಸ್ಕಾಟ್ಲೆಂಡ್​ 1998ರ ಬಳಿಕ, ಟರ್ಕಿ 2002ರ ಬಳಿಕ ಜೆಕ್​ ಗಣರಾಜ್ಯ 2006ರ ಬಳಿಕ, ನ್ಯೂಜಿಲೆಂಡ್​, ಪರಾಗ್ವೆ, ದ. ಆಫ್ರಿಕಾ 2010ರ ಬಳಿಕ, ಅಲ್ಜೀರಿಯಾ, ಬೋಸ್ನಿಯಾ-ಹರ್ಜೆಗೋವಿನಾ, ಐವರಿಕೋಸ್ಟ್​ 2014ರ ಬಳಿಕ ವಿಶ್ವಕಪ್​ ಅರ್ಹತೆ ಗಿಟ್ಟಿಸಿಕೊಂಡಿವೆ. 2022ರ ಟೂರ್ನಿ ತಪ್ಪಿಸಿಕೊಂಡಿದ್ದ ಕೊಲಂಬಿಯಾ, ಈಜಿಪ್ಟ್​, ಪನಾಮ, ಸ್ವೀಡನ್​ ಈ ಬಾರಿ ಮರಳಿವೆ. 

*85: ಫಿಫಾ ರ್ಯಾಂಕಿಂಗ್​ನಲ್ಲಿ 85ನೇ ಸ್ಥಾನದಲ್ಲಿರುವ ನ್ಯೂಜಿಲೆಂಡ್​ ಟೂರ್ನಿಯಲ್ಲಿ ಆಡಲಿರುವ ಅತ್ಯಂತ ಕೆಳ ರ್ಯಾಂಕ್​ನ ತಂಡವೆನಿಸಿದೆ. 

ಕೇವಲ 1.56 ಲಕ್ಷ ಜನಸಂಖ್ಯೆ ಹೊಂದಿರುವ ಕುರಾಕಾವೊ (444 ಕಿಲೋಮೀಟರ್​ ವಿಸ್ತೀರ್ಣ) ಫಿಾ ವಿಶ್ವಕಪ್​ನಲ್ಲಿ ಭಾಗವಹಿಸಲಿರುವ ಅತಿಸಣ್ಣ ದೇಶವೆನಿಸಿದೆ. 3.50 ಲಕ್ಷ ಜನಸಂಖ್ಯೆಯ ಐಸ್​ಲ್ಯಾಂಡ್​ 2018ರ ವಿಶ್ವಕಪ್​ನಲ್ಲಿ ಆಡಿದ್ದು ಹಿಂದಿನ ದಾಖಲೆ. ಈ ಬಾರಿ ವಿಶ್ವಕಪ್​ಗೆ ಪದಾರ್ಪಣೆ ಮಾಡಲಿರುವ ಕೇಪ್​ ವರ್ಡೆ (4,033 ಕಿಮೀ ವಿಸ್ತೀರ್ಣ) ಕೂಡ ಕೇವಲ 5.25 ಲಕ್ಷ ಜನಸಂಖ್ಯೆ ಹೊಂದಿದೆ.