ಶ್ರೀಲಂಕಾ ಪ್ರವಾಸ: 28ಕ್ಕೆ ಟೀಮ್ ಇಂಡಿಯಾ ಆಯ್ಕೆ, ಜಸ್‌ಪ್ರೀತ್ ಬುಮ್ರಾ ಫಿಟ್ನೆಸ್, ಆಲ್ರೌಂಡರ್ ಜಡೇಜಾ ಭವಿಷ್ಯದ ಬಗ್ಗೆಯೂ ಚರ್ಚೆ!

ಮೊದಲ ಟೆಸ್ಟ್‌ಗೆ (ಆ.15-19) ಗಾಲೆ ಆತಿಥ್ಯ ವಹಿಸಿದರೆ, ಕೊಲಂಬೊದಲ್ಲಿ (ಆ.23-27) 2ನೇ ಟೆಸ್ಟ್ ನಿಗದಿಯಾಗಿದೆ. ಇತ್ತೀಚೆಗೆ ಇಂಗ್ಲೆಂಡ್ ಪ್ರವಾಸದಲ್ಲಿ ಎಡ ಮೊಣಕಾಲಿನ ಗಾಯದ ಸಮಸ್ಯೆಗೆ ತುತ್ತಾಗಿರುವ ಬುಮ್ರಾ ಮೂರನೇ ಏಕದಿನ ಪಂದ್ಯಕ್ಕೆ ಅಲಭ್ಯರಾಗಿದ್ದರು. ಬುಮ್ರಾ ಚೇತರಿಕೆ ಹಾದಿಯ ಮೇಲೆ ಗಮನ ಇಡಲಾಗಿದ್ದು, ಸರಣಿ ಆರಂಭಕ್ಕೆ ಇನ್ನು ಮೂರು ವಾರಗಳ ಸಮಯವಿದೆ. ಅಷ್ಟರೊಳಗೆ ಅವರು ಸಂಪೂರ್ಣವಾಗಿ ಚೇತರಿಸಿಕೊಳ್ಳುವ ನಿರೀಕ್ಕೆಯಿದೆ ಎನ್ನಲಾಗಿದೆ.

ಆಗಸ್ಟ್ 4ರಂದು ಭಾರತ ಟೆಸ್ಟ್ ತಂಡ ಲಂಕಾಗೆ ಪ್ರಯಾಣಿಸಲಿದ್ದು, ಜಸ್‌ಪ್ರೀತ್ ಬುಮ್ರಾ ನಂತರ ಕೂಡಿಕೊಳ್ಳುವ ಸಾಧ್ಯತೆಗಳಿವೆ. 37 ವರ್ಷದ ಜಡೇಜಾ ರಾಷ್ಟ್ರೀಯ ತಂಡಕ್ಕೆ ಮರಳುವ ಸಾಧ್ಯತೆಗಳಿದ್ದು, ಜನವರಿಯಲ್ಲಿ ಕೊನೆಯದಾಗಿ ಭಾರತ ಪರ ಆಡಿದ್ದರು. ಬುಮ್ರಾ ಜತೆಗೆ ಮೊಹಮದ್ ಸಿರಾಜ್, ಪ್ರಸಿದ್ಧ ಕೃಷ್ಣ ವೇಗಿಗಳಾಗಿದ್ದು, ತಜ್ಞ ಸ್ಪಿನ್ನರ್ ಆಗಿ ಕುಲದೀಪ್ ಯಾದವ್ ಸ್ಥಾನ ಪಡೆಯಲ್ಲಿದ್ದಾರೆ ಎನ್ನಲಾಗಿದೆ. ಹರ್ಷ್ ದುಬೆ, ಮಾನವ್ ಸುಥರ್, ವಾಷಿಂಗ್ಟನ್ ಸುಂದರ್ ಮೀಸಲು ಸ್ಪಿನ್ನರ್‌ಗಳಾಗಿ ರೇಸ್‌ನಲ್ಲಿದ್ದಾರೆ. 2017ರಲ್ಲಿ ಕೊನೆಯದಾಗಿ ಟೆಸ್ಟ್ ಸರಣಿಗೆ ಲಂಕಾಕ್ಕೆ ತೆರಳಿದ್ದ ಭಾರತ ತಂಡ 2008ರಿಂದ ಟೆಸ್ಟ್ ಸರಣಿ ಸೋಲದ ದಾಖಲೆ ಹೊಂದಿದೆ.