ಕ್ರಿಶ್ಚಿಯಾನೊ ರೊನಾಲ್ಡೊ ಅವಳಿ ಗೋಲಿನ ಕಮಾಲ್​; ಹೊಸ ದಾಖಲೆ ಬರೆದ ಪೋರ್ಚುಗಲ್​ ಫುಟ್​ಬಾಲ್​ ತಾರೆ!

ಹೂಸ್ಟನ್: ಫುಟ್​ಬಾಲ್​ ಜಗತ್ತಿನ ಸೂಪರ್​ಸ್ಟಾರ್​ ಕ್ರಿಶ್ಚಿಯಾನೊ ರೊನಾಲ್ಡೊ (Cristiano Ronaldo) ಫಿಫಾ ವಿಶ್ವಕಪ್ (FIFA WorldCup) ಟೂರ್ನಿಯ ಆರು ಆವೃತ್ತಿಗಳಲ್ಲಿ ಗೋಲು ಗಳಿಸಿದ ಮೊದಲ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಉಜ್ಬೇಕಿಸ್ತಾನ ವಿರುದ್ಧ ಮಂಗಳವಾರ ನಡೆದ ಪಂದ್ಯದಲ್ಲಿ ಪೋರ್ಚುಗಲ್ ಪರ ಆರನೇ ನಿಮಿಷದಲ್ಲಿ ಗೋಲು ಸಿಡಿಸುವ ಮೂಲಕ ಅವರು ಈ ದಾಖಲೆ ಬರೆದರು.

ಜೋವೊ ಕ್ಯಾನ್ಸೆಲೊ ಪಾಸ್​ ನೀಡಿದ ಚೆಂಡಿನಲ್ಲಿ 41 ವರ್ಷದ ರೊನಾಲ್ಡೊ ಇತಿಹಾಸ ನಿರ್ಮಿಸಿದರು. ಅವರು ತಮ್ಮ ಬಲಗಾಲಿನಿಂದ ಚೆಂಡನ್ನು ಗೋಲು ಪೆಟ್ಟಿಗೆಯೊಳಗೆ ಹಾರಿಸಿ 1-0 ಅಂತರದ ಮುನ್ನಡೆ ಒದಗಿಸಿದರು. ಅವರು ಮೀಸಲು ಆಟಗಾರರ ಕಡೆಗೆ ಓಡಿ ಗೋಲಿನ ಸಂಭ್ರಮವನ್ನು ತಮ್ಮ ತಂಡದ ಸದಸ್ಯರೊಂದಿಗೆ ಆಚರಿಸಿದರು. ಬಳಿಕ ಪಂದ್ಯದ 39ನೇ ನಿಮಿಷದಲ್ಲಿ ಅವರು ಇನ್ನೊಂದು ಗೋಲು ಬಾರಿಸಿದರು. ಇದರೊಂದಿಗೆ ಪೋರ್ಚುಗಲ್​ ಮೊದಲಾರ್ಧದಲ್ಲಿ 3-0 ಮುನ್ನಡೆ ಸಾಧಿಸಿತು.

ರೊನಾಲ್ಡೊ 2006ರ ಪದಾರ್ಪಣೆಯ ವಿಶ್ವಕಪ್​ನಿಂದ ಪ್ರತಿ ಆವೃತ್ತಿಯಲ್ಲೂ ಕನಿಷ್ಠ ಒಂದಾದರೂ ಗೋಲು ಬಾರಿಸಿದ್ದಾರೆ. ತಂಡದ ಆರಂಭಿಕ ಪಂದ್ಯದಲ್ಲಿ ಕಾಂಗೋ ವಿರುದ್ಧ ಪೋರ್ಚುಗಲ್ 1-1ರಿಂದ ಡ್ರಾ ಸಾಧಿಸಿದ ಪಂದ್ಯದಲ್ಲಿ ಗೋಲು ಗಳಿಸಲು ವಿಫಲರಾದ ಬಳಿಕ ರೊನಾಲ್ಡೊ ಭಾರಿ ಟೀಕೆಗಳಿಗೆ ಒಳಗಾಗಿದ್ದರು. ಇದೀಗ ಎಲ್ಲ ಟೀಕೆಗಳಿಗೆ ಅವಳಿ ಗೋಲಿನ ಮೂಲಕ ತಿರುಗೇಟು ನೀಡಿದ್ದಾರೆ.

ರೊನಾಲ್ಡೊ ಮತ್ತು ಅರ್ಜೆಂಟೀನಾ ನಾಯಕ ಲಿಯೋನೆಲ್ ಮೆಸ್ಸಿ ಈ ವರ್ಷ ಆರು ವಿಶ್ವಕಪ್ ಟೂರ್ನಿಗಳಲ್ಲಿ ಆಡಿದ ಮೊದಲ ಆಟಗಾರರೆನಿಸಿದ್ದರು. ಆದರೆ ಮೆಸ್ಸಿ 2010ರ ವಿಶ್ವಕಪ್​ನಲ್ಲಿ ಗೋಲು ಗಳಿಸಲು ವಿಫಲರಾಗಿದ್ದರು.

ರೊನಾಲ್ಡೊ ಈಗ ಫಿಫಾ ವಿಶ್ವಕಪ್​ನಲ್ಲಿ ಒಟ್ಟು 10 ಗೋಲು ಬಾರಿಸಿದ ಸಾಧನೆ ಮಾಡಿದ್ದಾರೆ. ಅತ್ತ ಮೆಸ್ಸಿ 18 ಗೋಲುಗಳನ್ನು ಗಳಿಸಿದ ದಾಖಲೆ ಬರೆದಿದ್ದಾರೆ. ಮಂಗಳವಾರದ ಪಂದ್ಯವು ರೊನಾಲ್ಡೊ ಅವರ ಅಂತಾರಾಷ್ಟ್ರೀಯ ವೃತ್ತಿಜೀವನದ 230ನೇ ಪಂದ್ಯವಾಗಿತ್ತು, ಬೇರೆ ಯಾರೂ ಇಷ್ಟು ಪಂದ್ಯಗಳನ್ನು ಆಡಿಲ್ಲ ಎಂಬುದು ಗಮನಾರ್ಹ.

2016 ರಲ್ಲಿ ಪೋರ್ಚುಗಲ್‌ನೊಂದಿಗೆ ಯುರೋಪಿಯನ್ ಚಾಂಪಿಯನ್‌ಶಿಪ್ ಮತ್ತು ಮ್ಯಾಂಚೆಸ್ಟರ್ ಯುನೈಟೆಡ್ ಮತ್ತು ರಿಯಲ್ ಮ್ಯಾಡ್ರಿಡ್‌ನೊಂದಿಗೆ ಐದು ಬಾರಿ ಚಾಂಪಿಯನ್ಸ್ ಲೀಗ್ ಗೆದ್ದಿರುವ ರೊನಾಲ್ಡೊಗೆ ಇದು ಅಂತಿಮ ವಿಶ್ವಕಪ್ ಎನ್ನಲಾಗಿದೆ. ಹೀಗಾಗಿ ವಿಶ್ವಕಪ್​ ಕನಸು ನನಸಾಗಿಸಲು ಇದು ಅವರಿಗೆ ಕೊನೆಯ ಅವಕಾಶವೂ ಆಗಿದೆ.