FIFA WorldCup: ಸತತ 3ನೇ ಬಾರಿ ಉಪಾಂತ್ಯಕ್ಕೇರಿದ ಫ್ರಾನ್ಸ್​; 8ರ ಘಟ್ಟದಲ್ಲಿ ಹೊರಬಿದ್ದ ಮೊರಾಕ್ಕೊ

ಭಾರತೀಯ ಕಾಲಮಾನ ಪ್ರಕಾರ ಗುರುವಾರ ತಡರಾತ್ರಿ ನಡೆದ ಪಂದ್ಯದ ಮೊದಲಾರ್ಧದಲ್ಲಿ ಒಂದೂ ಗೋಲು ದಾಖಲಾಗಲಿಲ್ಲ. 28ನೇ ನಿಮಿಷದಲ್ಲಿ ಮೊರಾಕ್ಕೊ ಡಿಫೆಂಡರ್​ ನೌಸೇರ್​ ಮಜರೌಯಿ ಮಾಡಿದ ಫೌಲ್​ನಿಂದ ಡಿಡಿಯರ್​ ಡಿಶಾಂಪ್ಸ್​ ತರಬೇತಿಯ ಫ್ರಾನ್ಸ್​ಗೆ ಸಿಕ್ಕ ಪೆನಾಲ್ಟಿ ಕಿಕ್​ನಲ್ಲಿ ಎಂಬಾಪೆ ಗೋಲು ಬಾರಿಸದೆ ವ್ಯರ್ಥಗೊಳಿಸಿದರು. ಎಂಬಾಪೆ ಬಲ ಕಾರ್ನರ್​ ಕಡೆಗೆ ಒದ್ದ ಚೆಂಡನ್ನು ಮೊರಾಕ್ಕೊ ಗೋಲು ಕೀಪರ್​ ಯಾಸಿನ್​ ಬೌನೌ ತಡೆದರು.

ಕೊನೆಗೆ ಪಂದ್ಯದಲ್ಲಿ ಭರ್ತಿ ಒಂದು ಗಂಟೆಯ ಆಟದ ನಂತರ ಎಂಬಾಪೆ ಬಾರಿಸಿದ ಗೋಲಿನಿಂದಲೇ ಫ್ರಾನ್ಸ್​ ಖಾತೆ ತೆರೆಯಿತು. ಆರೇ ನಿಮಿಷಗಳ ಅಂತರದಲ್ಲಿ ಎಂಬಾಪೆ ನೀಡಿದ ಪಾಸ್​ನಲ್ಲಿ ಡೆಂಬೆಲ್​ ಕೂಡ ಗೋಲು ಬಾರಿಸಿ ಫ್ರಾನ್ಸ್​ಗೆಲುವಿನ ಅಂತರ ಹಿಗ್ಗಿಸಿದರು. ಇವೆರಡೂ ಗೋಲುಗಳ ವೇಳೆ ಗೋಲು ಪೆಟ್ಟಿಗೆಯ ಕಾರ್ನರ್​ನಿಂದ ಒಳನುಗ್ಗಿದ ಚೆಂಡನ್ನು ತಡೆಯಲು ಮೊರಾಕ್ಕೊ ಗೋಲಿ ಯಾಸಿನ್​ ಬೌನೌ ಅಸಹಾಯಕರಾಗಿದ್ದರು.

ಬಲ ಪಾದದ ಗಾಯದ ಸಮಸ್ಯೆಯ ನಡುವೆ ಕಣಕ್ಕಿಳಿದ 27 ವರ್ಷದ ಎಂಬಾಪೆ, ಪಂದ್ಯದ 77ನೇ ನಿಮಿಷದಲ್ಲಿ ಬದಲಿ ಆಟಗಾರನಿಗೆ ಸ್ಥಾನ ಬಿಟ್ಟುಕೊಟ್ಟು ಹೊರನಡೆದರು. ಪೆನಾಲ್ಟಿ ಕಿಕ್​ನಲ್ಲಿ ಗೋಲು ತಪ್ಪಿದ ಬಳಿಕ ನಮ್ಮ ನಾಯಕ ಎಂಬಾಪೆ ಗೆಲುವಿಗೆ ಹೆಚ್ಚಿನ ತುಡಿತ ಹೊಂದಿದ್ದರು ಎಂದು ಡೆಂಬೆಲ್​ ಪಂದ್ಯದ ಬಳಿಕ ತಿಳಿಸಿದರು. ಫ್ರಾನ್ಸ್ ತಂಡ 2022ರ ವಿಶ್ವಕಪ್​ ಸೆಮಿಫೈನಲ್​ನಲ್ಲಿ ಮೊರಾಕ್ಕೊ ಎದುರು ಇಷ್ಟೇ ಅಂತರದಿಂದ ಗೆದ್ದಿತ್ತು. ಫ್ರಾನ್ಸ್​ ಈಗ ಸತತ 3 ವಿಶ್ವಕಪ್ ಫೈನಲ್​ಗೇರಿದ 3ನೇ ದೇಶ ಎನಿಸುವ ಅವಕಾಶ ಹೊಂದಿದೆ. ಬ್ರೆಜಿಲ್​ ಮತ್ತು ಜರ್ಮನಿ ಈ ಹಿಂದೆ ಸತತ 3 ಫೈನಲ್​ಗೇರಿರುವ ತಂಡಗಳಾಗಿವೆ.

ಮೊರಾಕ್ಕೊಗೆ ಪಂದ್ಯದ ಮೊದಲಾರ್ಧ ಮುಕ್ತಾಯಕ್ಕೆ ಮುನ್ನ ಗೋಲು ಗಳಿಸುವ ಅತ್ಯುತ್ತಮ ಅವಕಾಶವೊಂದು ಲಭಿಸಿತ್ತು. ಆದರೆ ಅದ್ರ್​ ಹಕಿಮಿ ಗೋಲು ಬಾಕ್ಸ್​ನ ಹೊರಭಾಗದಿಂದ ಮಾಡಿದ ಫ್ರೀ ಕಿಕ್​ ಗುರಿ ಸೇರಲಿಲ್ಲ. ಬಳಿಕ 82ನೇ ನಿಮಿಷದಲ್ಲಿ ಮೊರಾಕ್ಕೊಗೆ ಸೋಲಿನ ಅಂತರ ತಗ್ಗಿಸಿಕೊಳ್ಳುವ ಅವಕಾಶ ಲಭಿಸಿದರೂ, ಅದು ವ್ಯರ್ಥಗೊಂಡಿತು. ಮೊರಾಕ್ಕೊ ತಂಡ ತನ್ನ ಪ್ರಮುಖ ಸ್ಟ್ರೆಕರ್​ ಹಾಗೂ ಟೂರ್ನಿಯಲ್ಲಿ ಈಗಾಗಲೆ 3 ಗೋಲು ಸಿಡಿಸಿದ್ದ ಇಸ್ಮಾಯಿಲ್​ ಸೈಬಾರಿ ಗೈರಿನಲ್ಲಿ ಕಣಕ್ಕಿದಿತ್ತು. ಅವರು ಗಾಯದಿಂದಾಗಿ ಪಂದ್ಯಕ್ಕೆ ಅಲಭ್ಯರಾಗಿದ್ದರು.

*ನಾವು ವಿಶ್ವಕಪ್​ ಗೆದ್ದ ನಂತರವಷ್ಟೇ ರಿಲ್ಯಾಕ್ಸ್​ ಆಗಲಿದ್ದೇವೆ. ಅಲ್ಲಿಯವರೆಗೆ ನಮ್ಮ ಹೋರಾಟ ಇದ್ದೇ ಇರುತ್ತದೆ. ನಾವೀಗ ಸೆಮಿೈನಲ್​ಗೇರಿರುವ ಬಗ್ಗೆ ಖುಷಿ ಇದೆ. ಆದರೆ ಟೂರ್ನಿಯಲ್ಲಿ ಇನ್ನೂ ದೂರ ಸಾಗಬೇಕಿದೆ.

ಕೈಲಿಯಾನ್​ ಎಂಬಾಪೆ ಹಾಲಿ ವಿಶ್ವಕಪ್​ನಲ್ಲಿ 8ನೇ ಗೋಲು ಬಾರಿಸುವುದರೊಂದಿಗೆ, ಅರ್ಜೆಂಟೀನಾ ತಾರೆ ಲಿಯೋನೆಲ್​ ಮೆಸ್ಸಿ ಜತೆಗೆ ಸಮಬಲ ಸಾಧಿಸಿದ್ದು, ಗೋಲ್ಡನ್​ ಬೂಟ್​ ರೇಸ್​ನಲ್ಲಿ ಮೇಲುಗೈ ಸಾಧಿಸಿದ್ದಾರೆ. ಮೆಸ್ಸಿ 8 ಗೋಲಿನೊಂದಿಗೆ ಇನ್ನೊಂದು ಗೋಲಿಗಷ್ಟೇ ನೆರವಾಗಿದ್ದರೆ, ಎಂಬಾಪೆ ಇತರ 3 ಗೋಲಿಗೆ ನೆರವಾಗಿರುವುದರಿಂದ ಮೆಸ್ಸಿಗಿಂತ ಮೇಲಿದ್ದಾರೆ. ವಿಶ್ವಕಪ್​ನಲ್ಲಿ ಒಟ್ಟಾರೆ 20ನೇ ಗೋಲು ಬಾರಿಸಿರುವ ಎಂಬಾಪೆ, ಮೆಸ್ಸಿಗಿಂತ (21) ಕೇವಲ 1 ಗೋಲು ದೂರವಿದ್ದಾರೆ.

*45: ಫ್ರಾನ್ಸ್​ ಈಗ ಫಿಫಾ ವಿಶ್ವಕಪ್​ನಲ್ಲಿ ಗರಿಷ್ಠ ಗೆಲುವು ಕಂಡ ತಂಡಗಳ ಪಟ್ಟಿಯಲ್ಲಿ ಇಟಲಿ ಜತೆ ಸಮಬಲ ಸಾಧಿಸಿದೆ. ಬ್ರೆಜಿಲ್​ (79), ಜರ್ಮನಿ (70), ಅರ್ಜೆಂಟೀನಾ (52) ಮುಂಚೂಣಿಯಲ್ಲಿರುವ ತಂಡಗಳಾಗಿವೆ.

ಫ್ರಾನ್ಸ್​ ಫಿಫಾ ವಿಶ್ವಕಪ್​ನಲ್ಲಿ ಸತತ 3 ಬಾರಿ (2018, 2022, 2026) ಉಪಾಂತ್ಯಕ್ಕೇರಿದ 3ನೇ ತಂಡ ಎನಿಸಿದೆ. ಜರ್ಮನಿ (2002-2014ರಲ್ಲಿ ಸತತ 4, 1982-1990ರಲ್ಲಿ ಸತತ 3) ಮತ್ತು ಬ್ರೆಜಿಲ್​ (1994-2002ರಲ್ಲಿ ಸತತ 3) ಹಿಂದಿನ 2 ತಂಡಗಳಾಗಿವೆ. ಫ್ರಾನ್ಸ್​ ಒಟ್ಟಾರೆ 8ನೇ ಬಾರಿ ಸೆಮಿಫೈನಲ್​ಗೇರಿ ಬ್ರೆಜಿಲ್​ ಸಾಧನೆ ಸರಿಗಟ್ಟಿದೆ. ಜರ್ಮನಿ (12) ಅಗ್ರಸ್ಥಾನದಲ್ಲಿದೆ.