FIFA WorldCup: ಔಸ್ಮಾನ್​ ಡೆಂಬಲ್ ಹ್ಯಾಟ್ರಿಕ್​ ಗೋಲು; ಸತತ 3 ಜಯದೊಂದಿಗೆ ನಾಕೌಟ್​ಗೇರಿದ ಫ್ರಾನ್ಸ್​

ಭಾರತೀಯ ಕಾಲಮಾನ ಪ್ರಕಾರ ಶುಕ್ರವಾರ ರಾತ್ರಿ ನಡೆದ ಪಂದ್ಯದಲ್ಲಿ 29 ವರ್ಷದ ಡೆಂಬೆಲ್ (Ousmane Dembele)​, 1994ರ ನಂತರ ವಿಶ್ವಕಪ್​ನ ಮೊದಲಾರ್ಧದಲ್ಲೇ ಹ್ಯಾಟ್ರಿಕ್​ ಗೋಲು ಸಿಡಿಸಿದ ಮೊದಲ ಆಟಗಾರ ಎನಿಸಿದರು. ಈಗಾಗಲೆ ನಾಕೌಟ್​ ಸ್ಥಾನ ಖಚಿತಪಡಿಸಿಕೊಂಡಿದ್ದ ಫ್ರಾನ್ಸ್​-ನಾರ್ವೆ ತಂಡಗಳು ಗುಂಪಿನ ಅಗ್ರಸ್ಥಾನಕ್ಕಾಗಿ ಪೈಪೋಟಿ ನಡೆಸಿದವು. ಆದರೆ ನಾರ್ವೆ ತನ್ನ ಸ್ಟಾರ್​ ಆಟಗಾರ ಎರ್ಲಿಂಗ್​ ಹಾಲೆಂಡ್​ಗೆ ವಿಶ್ರಾಂತಿ ನೀಡಿ, ಪಂದ್ಯಕ್ಕೆ ಮೊದಲೇ ಅಗ್ರಸ್ಥಾನದ ರೇಸ್​ನಿಂದ ಹಿಂದೆ ಸರಿದಂತಿತ್ತು.

ಡೆಂಬೆಲ್​ 7, 20, 32ನೇ ನಿಮಿಷದಲ್ಲಿ ಸಿಡಿಸಿದ ಆಕರ್ಷಕ ಗೋಲಿನ ನಡುವೆ ನಾರ್ವೆಯ ಥೆಲೊ ಅಸ್ಗಾರ್ಡ್​ 21ನೇ ನಿಮಿಷದಲ್ಲೊಂದು ಗೋಲು ಬಾರಿಸಿದರು. ಇದರಿಂದ ಫ್ರಾನ್ಸ್ 3-1 ಮುನ್ನಡೆಯೊಂದಿಗೆ ವಿರಾಮಕ್ಕೆ ತೆರಳಿತು. ದ್ವೀತಿಯಾರ್ಧ ಬಹುತೇಕ ಗೋಲುರಹಿತವಾಗಿದ್ದ ಬಳಿಕ ಡಿಸೈರ್​ ಡೌ (90+4) ಇಂಜುರಿ ಸಮಯದಲ್ಲಿ ಹೆಡರ್​ ಮೂಲಕ ಫ್ರಾನ್ಸ್ ಗೆಲುವಿನ ಅಂತರ ಹಿಗ್ಗಿಸಿದರು.

ಡೆಂಬೆಲ್​ 65ನೇ ನಿಮಿಷದಲ್ಲಿ ಬದಲಿ ಆಟಗಾರನಿಗೆ ಸ್ಥಾನ ಬಿಟ್ಟು ಮೈದಾನದಿಂದ ಹೊರನಡೆದರೆ, 86ನೇ ನಿಮಿಷದವರೆಗೆ ಮೈದಾನದಲ್ಲಿದ್ದ ಕಳೆದ 2 ಪಂದ್ಯಗಳ ಅವಳಿ ಗೋಲು ಸಾಧಕ ಕೈಲಿಯಾನ್​ ಎಂಬಾಪೆ ಈ ಬಾರಿ ಗೋಲು ಗಳಿಸಲಾಗದೆ ನಿರಾಸೆ ಅನುಭವಿಸಿದರು.

ಫ್ರಾನ್ಸ್​ ಕೋಚ್​ ಡಿಡಿಯರ್​ ಡಿಶಾಂಪ್ಸ್​ ಅವರ ತಾಯಿ ಜಿನೆಟ್​ ಡಿಶಾಂಪ್ಸ್​ ಇತ್ತೀಚೆಗೆ ನಿಧನರಾಗಿರುವ ಕಾರಣ ಅವರು ತವರಿಗೆ ನಿರ್ಗಮಿಸಿದ್ದರಿಂದ ಪಂದ್ಯದ ವೇಳೆ ಹಾಜರಿರಲಿಲ್ಲ. ಡಿಡಿಯರ್​ ಶನಿವಾರ ತಂಡದ ತರಬೇತಿಗೆ ಮರಳಿದರು.

ಗುಂಪಿನ ಅಗ್ರಸ್ಥಾನ ಗಳಿಸುವ ಅವಕಾಶವಿದ್ದ ಪಂದ್ಯದಲ್ಲಿ ನಾರ್ವೆ ತಂಡ ಎರ್ಲಿಂಗ್​ ಹಾಲೆಂಡ್​ ಸಹಿತ ಆರಂಭಿಕ 11ರ 10 ಕಾಯಂ ಆಟಗಾರರಿಗೆ ವಿಶ್ರಾಂತಿ ನೀಡಿ ಕಣಕ್ಕಿಳಿಯುವ ಮೂಲಕ ಅಚ್ಚರಿ ತಂದಿತು. ನಾರ್ವೆ ಕೋಚ್​ ಸ್ಟೇಲ್​ ಸೋಲ್ಬಕ್ಕೆನ್​ ಪಂದ್ಯದ ನಂತರ ತನ್ನ ನಿರ್ಧಾರ ಸಮರ್ಥಿಸಿಕೊಂಡರು. ಹಾಲೆಂಡ್​ ಗೈರಿನಲ್ಲಿ ಆಡಿದ ಕಳೆದ 6 ಪಂದ್ಯದಲ್ಲೂ ನಾರ್ವೆ ಸೋತಿದೆ.

*3: ಲಿಯೋನೆಲ್​ ಮೆಸ್ಸಿ ಮತ್ತು ಕೆನಡಾದ ಜೊನಾಥನ್​ ಡೇವಿಡ್​ ಬಳಿಕ ಡೆಂಬೆಲ್​ ಹಾಲಿ ವಿಶ್ವಕಪ್​ನ 3ನೇ ಹ್ಯಾಟ್ರಿಕ್​ ಗೋಲು ಸಾಧಕ ಎನಿಸಿದರು. ಜತೆಗೆ ಜಸ್ಟ್​ ಫಾಟೇನ್​ (2) ಮತ್ತು ಕೈಲಿಯಾನ್​ ಎಂಬಾಪೆ ಬಳಿಕ ಫ್ರಾನ್ಸ್​ನ 3ನೇ ವಿಶ್ವಕಪ್​ ಹ್ಯಾಟ್ರಿಕ್​ ಸಾಧಕ ಎನಿಸಿದರು. ಅವರು ವಿಶ್ವಕಪ್​ನಲ್ಲಿ ಮೊದಲಾರ್ಧದಲ್ಲೇ ಹ್ಯಾಟ್ರಿಕ್​ ಸಾಧಿಸಿದ 6ನೇ ಆಟಗಾರರೆನಿಸಿದರು.