ಈ ಸಲದ 23ನೇ ಆವೃತ್ತಿಯ ಫಿಫಾ ವಿಶ್ವಕಪ್ ಹಲವು ಕಾರಣಗಳಿಂದ ವಿಭಿನ್ನ, ವಿಶೇಷವಾಗಿದೆ. ಮೊದಲ ಬಾರಿಗೆ ಮೂರು ದೇಶಗಳ ಆತಿಥ್ಯದಲ್ಲಿ ಟೂರ್ನಿ ನಡೆಯಲಿದೆ. ಜತೆಗೆ ಟೂರ್ನಿಯಲ್ಲಿ ಆಡುವ ತಂಡಗಳ ಸಂಖ್ಯೆ 48 ಮತ್ತು ಪಂದ್ಯಗಳ ಸಂಖ್ಯೆ 104ಕ್ಕೆ ಏರಿಕೆಯಾಗಿರುವುದರಿಂದ ಮತ್ತು ಒಟ್ಟು 16 ಕ್ರೀಡಾಂಗಣಗಳಲ್ಲಿ ಸ್ಪರ್ಧೆ ನಡೆಯಲಿರುವುದರಿಂದ ಇದು ಅತ್ಯಂತ ಬೃಹತ್ ಫುಟ್ಬಾಲ್ ಹಬ್ಬವೆನಿಸಿದೆ.
ಕತಾರ್ನಲ್ಲಿ ನಡೆದ ಕಳೆದ ಆವೃತ್ತಿಯಲ್ಲಿ ಪ್ರಶಸ್ತಿ ಒಲಿಸಿಕೊಂಡಿದ್ದ ಅರ್ಜೆಂಟೀನಾ ಈ ಬಾರಿ ಹಾಲಿ ಚಾಂಪಿಯನ್ ತಂಡವಾಗಿ ಕಣಕ್ಕಿಳಿಯಲಿದೆ. ಲಿಯೋನೆಲ್ ಮೆಸ್ಸಿ ಸಾರಥ್ಯದಲ್ಲಿ ಪ್ರಶಸ್ತಿ ಉಳಿಸಿಕೊಳ್ಳುವ ಅದರ ಅಭಿಯಾನಕ್ಕೆ ಸಾಂಪ್ರದಾಯಿಕ ಬಲಿಷ್ಠ ಫುಟ್ಬಾಲ್ ರಾಷ್ಟ್ರಗಳಾದ ಬ್ರೆಜಿಲ್, ಜರ್ಮನಿ, ಫ್ರಾನ್ಸ್, ಸ್ಪೇನ್, ಪೋರ್ಚುಗಲ್ನಿಂದ ಪ್ರಬಲ ಪ್ರತಿಸ್ಪರ್ಧೆ ಎದುರಾಗಲಿದೆ. ಇದರೊಂದಿಗೆ ಬೆಲ್ಜಿಯಂ, ಇಂಗ್ಲೆಂಡ್, ಕ್ರೊಯೇಷಿಯಾ, ನೆದರ್ಲೆಂಡ್, ಮೊರಾಕ್ಕೊ, ಕೊಲಂಬಿಯಾ, ಸಹ-ಆತಿಥೇಯ ಅಮೆರಿಕ, ಮೆಕ್ಸಿಕೋ ತಂಡಗಳೂ ಮಿರುಗುವ ಚಿನ್ನದ ಟ್ರೋಫಿಗಾಗಿ ನಿಕಟ ಪೈಪೋಟಿ ತೋರಲಿವೆ. ಏಷ್ಯಾ ಮತ್ತು ಆಫ್ರಿಕಾ ಖಂಡದ ತಂಡಗಳು ಇದುವರೆಗೆ ಫಿಫಾ ವಿಶ್ವಕಪ್ ಗೆಲ್ಲದ ಕೊರತೆ ಈ ಸಲವಾದರೂ ನೀಗುವುದೇ ಎಂಬ ಕುತೂಹಲವೂ ಮನೆಮಾಡಿದೆ.
