Duleep Trophy: ಪೂರ್ವ-ದಕ್ಷಿಣ ಫೈನಲ್, ವೈಭವ್ ಸೂರ್ಯವಂಶಿ, ಕನ್ನಡಿಗ ದೇವದತ್ ಪಡಿಕ್ಕಲ್ ಆಕರ್ಷಣೆ

ಮುಂಬರುವ ನ್ಯೂಜಿಲೆಂಡ್ ಪ್ರವಾಸಕ್ಕೆ ಭಾರತ ಟೆಸ್ಟ್ ತಂಡದಲ್ಲಿ ಸ್ಥಾನ ಪಡೆಯಲು ಉದಯೋನ್ಮುಖ ಆಟಗಾರರಿಗೆ ಕೊನೇ ಅವಕಾಶವೂ ಇದಾಗಿರಲಿದೆ. ಇತ್ತೀಚೆಗೆ ಶ್ರೀಲಂಕಾ ವಿರುದ್ಧ ಸತತ 2 ಶತಕ ಸಿಡಿಸಿ, ಸರಣಿಶ್ರೇಷ್ಠ ಪ್ರಶಸ್ತಿ ಪಡೆದಿದ್ದ ದೇವದತ್ ಪಡಿಕ್ಕಲ್ ದುಲೀಪ್ ಟ್ರೋಫಿ ಫೈನಲ್‌ನಲ್ಲೂ ಅದೇ ಪ್ರದರ್ಶನವನ್ನು ಪುನರಾವರ್ತಿಸುವ ನಿರೀಕ್ಷೆ ಇದೆ. 2023ರ ನಂತರ ದಕ್ಷಿಣಕ್ಕೆ ಪ್ರಶಸ್ತಿ ಗೆದ್ದುಕೊಡುವಲ್ಲಿ ನೆರವಾದರೆ, ಭಾರತ ತಂಡದ 3ನೇ ಕ್ರಮಾಂಕ ಖಾತ್ರಿಪಡಿಸಿಕೊಳ್ಳಲು ಪಡಿಕ್ಕಲ್‌ಗೆ ಮತ್ತಷ್ಟು ಬಲ ಸಿಗಲಿದೆ. ಭಾರತ ಟೆಸ್ಟ್ ಜೆರ್ಸಿ ಧರಿಸುವ ಆಸೆ ವ್ಯಕ್ತಪಡಿಸಿರುವ ನಾಯಕ ತಿಲಕ್ ವರ್ಮ ಸೆಮಿಫೈನಲ್‌ನಲ್ಲಿ ಗೆಲುವಿನ ರೂವಾರಿ ಎನಿಸಿದ್ದರು.

ಶ್ರೀಲಂಕಾದಲ್ಲಿ ಪರಿಣಾಮಕಾರಿ ಎನಿಸದ ವೇಗಿ ಮೊಹಮದ್ ಸಿರಾಜ್ ಲಯಕ್ಕೆ ಮರಳಲು ಪಂದ್ಯ ನೆರವಾಗಲಿದೆ. ಮತ್ತೊರ್ವ ಕನ್ನಡಿಗ, ವೇಗಿ ವಿದ್ವತ್ ಕಾವೇರಪ್ಪ ಬದಲಿಗೆ ಸಿರಾಜ್ ಕಣಕ್ಕಿಳಿಯುವ ನಿರೀಕ್ಷೆ ಇದೆ. ಸೆಮೀಸ್ ತಪ್ಪಿಸಿಕೊಂಡಿದ್ದ ಕರುಣ್ ನಾಯರ್ ಅವಕಾಶದ ನಿರೀಕ್ಷೆಯಲ್ಲಿದ್ದು, ಆರ್. ಸ್ಮರಣ್ ಲಯಕ್ಕೆ ಮರಳುವ ವಿಶ್ವಾಸದಲ್ಲಿದ್ದಾರೆ. ಆಲ್ರೌಂಡರ್ ಸ್ಥಾನ ಸಮರ್ಥವಾಗಿ ನಿಭಾಯಿಸಿರುವ ಶ್ರೇಯಸ್ ಗೋಪಾಲ್ ದಕ್ಷಿಣಕ್ಕೆ ಮತ್ತಷ್ಟು ಬಲ ತುಂಬಲಿದ್ದಾರೆ.

ದಕ್ಷಿಣ ವಲಯವೇ ಫೇವರಿಟ್ ಎನಿಸಿದರೂ, ಇಶಾನ್ ಕಿಶನ್ ಸಾರಥ್ಯದ ಪೂರ್ವ ವಲಯ ಹಾಲಿ ಚಾಂಪಿಯನ್ ಕೇಂದ್ರ ವಲಯವನ್ನು ಮಣಿಸಿ ಫೈನಲ್‌ಗೇರಿದೆ. 15 ವರ್ಷದ ವೈಭವ್ ಸೂರ್ಯವಂಶಿ, ಇಶಾನ್ ಕಿಶನ್, ಶಾಬಾಜ್ ಅಹ್ಮದ್ ಸವಾಲೊಡ್ಡುವ ನಿರೀಕ್ಷೆ ಇದೆ. ಭಾರತ ತಂಡಕ್ಕೆ ಮರಳುವ ಹೋರಾಟದಲ್ಲಿರುವ ಮೊಹಮದ್ ಶಮಿ ಜತೆಗೆ ಅನುಕೂಲ್ ರಾಯ್, ಮುಕೇಶ್ ಕುಮಾರ್ ಬೌಲಿಂಗ್ ವಿಭಾಗಕ್ಕೆ ಶಕ್ತಿ ನೀಡಲಿದ್ದಾರೆ.