ನಿವೃತ್ತಿ ವದಂತಿಯ ಬೆನ್ನಲ್ಲೇ ರೊನಾಲ್ಡೊ ಮಾಡಿದ ಆ 2 ಪದಗಳ ಪೋಸ್ಟ್; ಇಂಟರ್ನೆಟ್‌ನಲ್ಲಿ ತಲ್ಲಣ ಸೃಷ್ಟಿಸಿದ ಫುಟ್‌ಬಾಲ್ ಕಿಂಗ್! Cristiano Ronaldo

ಪಂದ್ಯದ ಕೊನೆಯ ಕ್ಷಣಗಳಲ್ಲಿ ಸ್ಪೇನ್‌ನ ಮೈಕೆಲ್ ಮೆರಿನೊ ಬಾರಿಸಿದ ಗೋಲು ಪೋರ್ಚುಗಲ್ ತಂಡದ ಕನಸನ್ನು ನುಚ್ಚುನೂರು ಮಾಡಿತು. ಪಂದ್ಯದ ಉದ್ದಕ್ಕೂ ರೊನಾಲ್ಡೊ ಹಾಗೂ ಬ್ರೂನೋ ಫೆರ್ನಾಂಡಿಸ್ ಗೋಲು ಗಳಿಸುವ ಹಲವು ಸುವರ್ಣ ಅವಕಾಶಗಳನ್ನು ಕೈಚೆಲ್ಲಿದ್ದು ತಂಡಕ್ಕೆ ಭಾರಿ ಹಿನ್ನಡೆಯಾಗಿ ಪರಿಣಮಿಸಿತು.

ನಿರ್ಗಮನದ ಬಳಿಕವೂ ತಮ್ಮ ಆಟಗಾರರೊಂದಿಗೆ ಒಗ್ಗಟ್ಟು ಪ್ರದರ್ಶಿಸಿದ ರೊನಾಲ್ಡೊ, ತಮ್ಮ ಇನ್‌ಸ್ಟಾಗ್ರಾಮ್‌ನಲ್ಲಿ ತಂಡದ ಚಿತ್ರವನ್ನು ಹಂಚಿಕೊಂಡು "ಪೋರ್ಚುಗಲ್ ಶಾಶ್ವತ" (Portugal Sempre) ಎಂದು ಭಾವನಾತ್ಮಕವಾಗಿ ಬರೆದುಕೊಂಡಿದ್ದಾರೆ. ತಮ್ಮ ಅಂತರರಾಷ್ಟ್ರೀಯ ಫುಟ್‌ಬಾಲ್ ನಿವೃತ್ತಿಯ ಊಹಾಪೋಹಗಳ ಕುರಿತು ಪ್ರತಿಕ್ರಿಯಿಸಿದ ಅವರು, ಇದು ಕೊನೆಯ ವಿಶ್ವಕಪ್ ಆಗಿದ್ದರೂ ರಾಷ್ಟ್ರೀಯ ಜೆರ್ಸಿ ತೊಡುವ ಬಗ್ಗೆ ತಾವು ಯಾವುದೇ ಆತುರದ ನಿರ್ಧಾರ ಕೈಗೊಳ್ಳುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ವಿಶ್ವಕಪ್ ಇತಿಹಾಸದಲ್ಲಿ ರೊನಾಲ್ಡೊ ಅವರ ಸುದೀರ್ಘ ಪಯಣವನ್ನು ಗಮನಿಸಿದರೆ, 2006 ರ ಪದಾರ್ಪಣೆ ಟೂರ್ನಿಯಲ್ಲಿ ಪೋರ್ಚುಗಲ್ 4ನೇ ಸ್ಥಾನ ಪಡೆದಿತ್ತು. ಆ ಬಳಿಕ 2010 ರಲ್ಲಿ ರೌಂಡ್ ಆಫ್ 16, 2014 ರಲ್ಲಿ ಗ್ರೂಪ್ ಹಂತ ಹಾಗೂ 2018 ರಲ್ಲಿ ಪ್ರಿ-ಕ್ವಾರ್ಟರ್‌ಫೈನಲ್ಸ್‌ನಿಂದ ತಂಡ ಹೊರಬಿದ್ದಿತ್ತು. ಕಳೆದ 2022 ರ ಆವೃತ್ತಿಯಲ್ಲಿ ತಂಡ ಕ್ವಾರ್ಟರ್‌ಫೈನಲ್ ತಲುಪಿದರೂ, ರೊನಾಲ್ಡೊ ಅವರ ಸಾಂಪ್ರದಾಯಿಕ ಎದುರಾಳಿ ಲಿಯೋನೆಲ್ ಮೆಸ್ಸಿ ಅರ್ಜೆಂಟೀನಾಗೆ ವಿಶ್ವಕಪ್ ಗೆದ್ದುಕೊಡುವ ಮೂಲಕ ಸಾರ್ವಕಾಲಿಕ ಶ್ರೇಷ್ಠ (GOAT) ಚರ್ಚೆಗೆ ಬಹುತೇಕ ತೆರೆ ಎಳೆದಿದ್ದರು.

ಇದೀಗ ಒಟ್ಟು 27 ವಿಶ್ವಕಪ್ ಪಂದ್ಯಗಳಲ್ಲಿ 11 ಗೋಲುಗಳೊಂದಿಗೆ CR7 ವಿಶ್ವಕಪ್ ಅಧ್ಯಾಯ ಮುಕ್ತಾಯಗೊಂಡಿದೆ. ಅವರ ಕ್ಲಬ್ ಸಾಧನೆಗಳಿಗೆ ಹೋಲಿಸಿದರೆ ಈ ಅಂಕಿ-ಅಂಶಗಳು ಸಾಧಾರಣ ಎನಿಸಿದರೂ, ಇಡೀ ಟೂರ್ನಿಯಲ್ಲಿ ಒಟ್ಟು 17 ಶಾಟ್‌ಗಳನ್ನು ಹೊಡೆದ ರೊನಾಲ್ಡೊ, ಸಹ ಆಟಗಾರರಿಗೆ ಒಂದೂ ಗೋಲು ಗಳಿಸುವ ಅವಕಾಶ ಸೃಷ್ಟಿಸದೆ ತಮ್ಮ ಕೊನೆಯ ಪಂದ್ಯದಲ್ಲಿ ದುರದೃಷ್ಟಕರ ದಾಖಲೆಯೊಂದನ್ನು ತಮ್ಮದಾಗಿಸಿಕೊಂಡರು.

ಆದಾಗ್ಯೂ, ತಮ್ಮ 41ನೇ ವಯಸ್ಸಿನಲ್ಲೂ ಅದ್ಭುತ ಫಿಟ್‌ನೆಸ್ ಪ್ರದರ್ಶಿಸಿದ ರೊನಾಲ್ಡೊ ಪ್ರಸಕ್ತ ಟೂರ್ನಿಯಲ್ಲಿ ಹಲವು ಐತಿಹಾಸಿಕ ಮೈಲಿಗಲ್ಲುಗಳನ್ನು ಸ್ಥಾಪಿಸಿದ್ದಾರೆ. ಕ್ರೊಯೇಷಿಯಾ ವಿರುದ್ಧದ ರೌಂಡ್ ಆಫ್ 32 ಪಂದ್ಯದಲ್ಲಿ (2-1 ಗೆಲುವು) ಕಣಕ್ಕಿಳಿಯುವ ಮೂಲಕ ವಿಶ್ವಕಪ್ ನಾಕೌಟ್ ಪಂದ್ಯವೊಂದರಲ್ಲಿ ಆಡಿದ 41 ವರ್ಷ ದಾಟಿದ ಜಗತ್ತಿನ ಮೊದಲ ಆಟಗಾರ ಎನಿಸಿಕೊಂಡರು. ಅಷ್ಟೇ ಅಲ್ಲದೆ, ತಮ್ಮ ಮಾಜಿ ಸಹ ಆಟಗಾರ 40 ವರ್ಷದ ಲುಕಾ ಮೊಡ್ರಿಕ್ ಎದುರು ಆಡುವ ಮೂಲಕ ವಿಶ್ವಕಪ್ ಇತಿಹಾಸದಲ್ಲೇ 40 ದಾಟಿದ ಇಬ್ಬರು ಔಟ್‌ಫೀಲ್ಡ್ ಆಟಗಾರರು ಮುಖಾಮುಖಿಯಾದ ಅಪರೂಪದ ಕ್ಷಣಕ್ಕೆ ಸಾಕ್ಷಿಯಾದರು.

ಇದೇ ಪಂದ್ಯದಲ್ಲಿ 41 ವರ್ಷ 147 ದಿನಗಳ ಪ್ರಾಯದಲ್ಲಿ ಗೋಲು ಗಳಿಸಿದ ಅವರು, ವಿಶ್ವಕಪ್ ನಾಕೌಟ್ ಇತಿಹಾಸದಲ್ಲೇ ಅತ್ಯಂತ ಹಿರಿಯ ಗೋಲ್‌ಸ್ಕೋರರ್ ಎಂಬ ಕೀರ್ತಿ ಮುಡಿಗೇರಿಸಿಕೊಂಡರು. ಇದು ಅವರ ಸುದೀರ್ಘ ವೃತ್ತಿಜೀವನದ ಮೊದಲ ವಿಶ್ವಕಪ್ ನಾಕೌಟ್ ಗೋಲು ಎಂಬುದು ವಿಶೇಷ.

ಟೂರ್ನಿಯ ಆರಂಭದಲ್ಲಿ ಡಿಆರ್ ಕಂಗೊ ವಿರುದ್ಧದ ಪಂದ್ಯ 1-1 ಡ್ರಾಗೊಂಡು ರೊನಾಲ್ಡೊ ತೀವ್ರ ಟೀಕೆಗೆ ಒಳಗಾಗಿದ್ದರು. ಆದರೆ ಫ್ಯಾಬಿಯೊ ಕ್ಯಾನವಾರೊ ಮಾರ್ಗದರ್ಶನದ ಉಜ್ಬೇಕಿಸ್ತಾನ್ ವಿರುದ್ಧ ಪೋರ್ಚುಗಲ್ 5-0 ಅಂತರದ ಭರ್ಜರಿ ಗೆಲುವು ಸಾಧಿಸಿದಾಗ ರೊನಾಲ್ಡೊ ಎರಡು ಅದ್ಭುತ ಗೋಲುಗಳನ್ನು ಬಾರಿಸಿ ಅಬ್ಬರಿಸಿದರು. ನುನೊ ಮೆಂಡಿಸ್ ಹಾಗೂ ರಾಫೆಲ್ ಲಿಯಾವೊ ಕೂಡ ಗೋಲು ಬಾರಿಸಿ ಸಾಥ್ ನೀಡಿದ್ದರು.

ಈ ಪಂದ್ಯದ ಮೂಲಕ ರೊನಾಲ್ಡೊ ವಿಶ್ವಕಪ್‌ನಲ್ಲಿ ಪೋರ್ಚುಗಲ್ ಪರ ಅತಿ ಹೆಚ್ಚು ಗೋಲು (10 ಗೋಲು) ಗಳಿಸಿದ ದಂತಕಥೆ ಯುಸೇಬಿಯೊ (9 ಗೋಲು) ಅವರ ದಾಖಲೆಯನ್ನು ಮೀರಿದರು. ಜೊತೆಗೆ, ವಿಶ್ವದ ಒಟ್ಟು 6 ವಿಭಿನ್ನ ಫಿಫಾ ವಿಶ್ವಕಪ್ ಆವೃತ್ತಿಗಳಲ್ಲಿ ಗೋಲು ಹೊಡೆದ ಏಕೈಕ ಆಟಗಾರ ಎಂಬ ಐತಿಹಾಸಿಕ ವಿಶ್ವ ದಾಖಲೆಯನ್ನು ತಮ್ಮ ಹೆಸರಿಗೆ ಬರೆದುಕೊಂಡರು. ಕೊಲಂಬಿಯಾ ವಿರುದ್ಧದ ಪಂದ್ಯ ಶೂನ್ಯ ಡ್ರಾದಲ್ಲಿ ಕೊನೆಗೊಂಡರೂ, ಒಟ್ಟಾರೆ 5 ಪಂದ್ಯಗಳಲ್ಲಿ 3 ಗೋಲು ಗಳಿಸಿ ರೊನಾಲ್ಡೊ ತಮ್ಮ ದೀರ್ಘಾವಧಿಯ ಸಾಮರ್ಥ್ಯವನ್ನು ಜಗತ್ತಿಗೆ ಮತ್ತೊಮ್ಮೆ ಸಾಬೀತುಪಡಿಸಿದ್ದಾರೆ (ಏಜೆನ್ಸೀಸ್​).