ಮಹಿಳಾ ಕ್ರಿಕೆಟರ್​ ಜೆಮೀಮಾ ರೋಡ್ರಿಗಸ್​ ತಂದೆಯಿಂದ ಮತಾಂತರ ಚಟುವಟಿಕೆ ಆರೋಪ; ಕ್ರಿಕೆಟ್​ ಕ್ಲಬ್​ ಸದಸ್ಯತ್ವ ರದ್ದು!

ಮುಂಬೈ: ಭಾರತ ಮಹಿಳಾ ತಂಡದ ಬ್ಯಾಟರ್​ ಜೆಮೀಮಾ ರೋಡ್ರಿಗಸ್​ ಅವರ ತಂದೆ ಐವಾನ್​ ರೋಡ್ರಿಗಸ್​ ಮುಂಬೈನ ಅತ್ಯಂತ ಹಳೆಯ ಕ್ರಿಕೆಟ್​ ಕ್ಲಬ್​ಗಳಲ್ಲಿ ಒಂದಾರುವ ಖಾರ್​ ಜಿಮ್ಖಾನದ ಸಭಾಂಗಣವನ್ನು ಮತಾಂತರ ಪ್ರಯತ್ನದಂಥ ಧಾರ್ಮಿಕ ಚಟುವಟಿಕೆಗಳಿಗೆ ಬಳಸಿರುವ ಆರೋಪ ಎದುರಿಸಿದ್ದಾರೆ. ಇದರಿಂದಾಗಿ ಜೆಮೀಮಾಗೆ ನೀಡಲಾಗಿದ್ದ ಖಾರ್​ ಜಿಮ್ಖಾನಾದ ಗೌರವ ಸದಸ್ಯತ್ವವನ್ನು ರದ್ದುಗೊಳಿಸಲಾಗಿದೆ.

ಭಾರತ ಪರ 3 ಟೆಸ್ಟ್​, 30 ಏಕದಿನ, 104 ಟಿ20 ಪಂದ್ಯಗಳನ್ನು ಆಡಿರುವ ಜೆಮೀಮಾ, ಇತ್ತೀಚೆಗೆ ಮಹಿಳೆಯರ ಟಿ20 ವಿಶ್ವಕಪ್​ನಲ್ಲೂ ಭಾಗವಹಿಸಿದ್ದರು. 2023ರಲ್ಲಿ ಅವರು 3 ವರ್ಷಗಳಿಗೆ ಖಾರ್​ ಜಿಮ್ಖಾನಾದ ಸದಸ್ಯತ್ವ ಪಡೆದ ಮೊದಲ ಮಹಿಳಾ ಕ್ರಿಕೆಟರ್​ ಎನಿಸಿದ್ದರು. ಆದರೆ ಭಾನುವಾರ ನಡೆದ ಕ್ಲಬ್​ನ ವಾರ್ಷಿಕ ಮಹಾಸಭೆಯಲ್ಲಿ ಜೆಮೀಮಾ ಸದಸ್ಯತ್ವ ರದ್ದುಗೊಳಿಸಲಾಗಿದೆ.

ಜೆಮೀಮಾ ತಂದೆ ಐವಾನ್​ ರೋಡ್ರಿಗಸ್​ ಪುತ್ರಿಯ ಕ್ಲಬ್​ ಸದಸ್ಯತ್ವವನ್ನು ಬಳಸಿಕೊಂಡು, ಕಳೆದ ಒಂದು ವರ್ಷದಿಂದ ಪ್ರತಿ ವಾರಾಂತ್ಯಕ್ಕೆ ಕ್ಲಬ್​ನ ಸಭಾಂಗಣವನ್ನು ತನ್ನ ಧಾರ್ಮಿಕ ಚಟುವಟಿಕೆಗಳಿಗೆ ಬಳಸಿದ್ದಾರೆ. "ಬ್ರದರ್​ ಮ್ಯಾನ್ಯುಯೆಲ್​ ಮಿನಿಸ್ಟ್ರೀಸ್​' ಗುಂಪಿನ ಭಾಗವಾಗಿರುವ ಅವರು ಅದರ ಮತಾಂತರ ಪ್ರಯತ್ನಗಳಿಗೆ ಕ್ಲಬ್​ ಸಭಾಂಗಣವನ್ನು ಬಳಸಿಕೊಂಡಿದ್ದಾರೆ. ಹೀಗಾಗಿ ಕ್ಲಬ್​ ಸದಸ್ಯತ್ವವನ್ನು ದುರುಪಯೋಗ ಪಡಿಸಿಕೊಂಡಿರುವ ಆರೋಪದ ಮೇಲೆ ಜೆಮೀಮಾ ಸದಸ್ಯತ್ವ ರದ್ದುಗೊಳಿಸಲಾಗಿದೆ ಎಂದು ವರದಿಯಾಗಿದೆ.

ಕ್ರಿಕೆಟ್​ ಕೋಚ್​ ಕೂಡ ಆಗಿರುವ ಐವಾನ್​ ರೋಡ್ರಿಗಸ್​ ಕಳೆದ ಒಂದು ವರ್ಷದಿಂದ ಕ್ಲಬ್​ ಸಭಾಂಗಣದಲ್ಲಿ 35 ಧಾರ್ಮಿಕ ಸಮಾರಂಭಗಳನ್ನು ನಡೆಸಿದ್ದಾರೆ ಎಂದು ಕ್ಲಬ್​ ಆಡಳಿತ ಮಂಡಳಿ ಸದಸ್ಯ ಶಿವ ಮಲ್ಹೋತ್ರಾ ಆರೋಪಿಸಿದ್ದಾರೆ.

ಈ ನಡುವೆ ಖಾರ್​ ಜಿಮ್ಖಾನಾದ ಅಧ್ಯಕ್ಷ ವಿವೇಕ್​ ದೇವ್ನಾನಿ, ಕ್ಲಬ್​ನಲ್ಲಿ ಮತಾಂತರ ಚಟುವಟಿಕೆಯ ಆರೋಪವನ್ನು ತಳ್ಳಿಹಾಕಿದ್ದು, ಮುಂಬರುವ ಚುನಾವಣೆಯ ಹಿನ್ನೆಲೆಯಲ್ಲಿ ಇದು ಎದುರಾಳಿಗಳ ಸುಳ್ಳು ಆರೋಪವಾಗಿದೆ ಎಂದಿದ್ದಾರೆ.

https://www.vijayavani.net/rahul-dravids-son-samit-is-vice-captain-for-the-karnataka-junior-team