20 ಗ್ರಾಂಡ್ ಸ್ಲಾಂ ಪ್ರಶಸ್ತಿಗಳ ಒಡೆಯ ಫೆಡರರ್ ಬುಧವಾರ ಟ್ವಿಟರ್ನಲ್ಲಿ ಈ ಬಗ್ಗೆ ಘೋಷಣೆ ಮಾಡಿದ್ದಾರೆ. ಅವರು ಕಳೆದ ಫೆಬ್ರವರಿಯಲ್ಲಿ ಬಲ ಮೊಣಕಾಲಿನ ಆಥೋಸ್ಕೋಪಿಕ್ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು. ಇದರಿಂದ ಚೇತರಿಕೆ ಕಾಣಲು 4 ತಿಂಗಳು ಬೇಕಾಗಬಹುದು ಎಂಬುದು ಅವರ ಆರಂಭಿಕ ಲೆಕ್ಕಾಚಾರವಾಗಿತ್ತು. ಕರೊನಾ ಹಾವಳಿಯಿಂದಾಗಿ ಈ ಸಮಯದಲ್ಲಿ ಅವರು ಯಾವುದೇ ಟೂರ್ನಿಯನ್ನು ತಪ್ಪಿಸಿಕೊಳ್ಳುವ ಪ್ರಸಂಗವೂ ಬಂದಿರಲಿಲ್ಲ. ‘ಕೆಲವು ವಾರಗಳ ಹಿಂದೆ ನನ್ನ ಪ್ರಾಥಮಿಕ ಪುನಶ್ಚೇತನದ ವೇಳೆ ಹಿನ್ನಡೆ ಕಂಡಿದ್ದೆ. ನನ್ನ ಬಲ ಮೊಣಕಾಲಿನಲ್ಲಿ ಹೆಚ್ಚುವರಿ ಆಥೋಸ್ಕೋಪಿಕ್ ಪ್ರಕ್ರಿಯೆ ಕಾಣುವುದು ಅಗತ್ಯವೆನಿಸಿತ್ತು. ಈಗ ನಾನು 2017ರ ಋತುವಿನಂತೆ, ನನ್ನ ಉನ್ನತ ಮಟ್ಟದ ಆಟವನ್ನು ಆಡಲು ಶೇ. 100ರಷ್ಟು ಸಿದ್ಧಗೊಳ್ಳುವ ಯೋಜನೆ ಹಾಕಿಕೊಂಡಿದ್ದೇನೆ. 2021ರ ಋತುವಿನ ಆರಂಭದಲ್ಲಷ್ಟೇ ನಾನು ಮತ್ತೆ ನಿಮ್ಮನ್ನು ನೋಡಲಿದ್ದೇನೆ’ ಎಂದು ಫೆಡರರ್ ಟ್ವೀಟಿಸಿದ್ದಾರೆ. -ಪಿಟಿಐ
