ಬೆಂಗಳೂರು: ನ್ಯೂಜಿಲೆಂಡ್ ಪ್ರವಾಸದ ಟಿ20 ಸರಣಿಯಲ್ಲಿ ಭಾರತದ ಯುವ ಆಟಗಾರರು ಭರ್ಜರಿ ನಿರ್ವಹಣೆ ತೋರಿ ಸರಣಿ ವಶಪಡಿಸಿಕೊಂಡಿದ್ದರು. ಇದೀಗ 5 ಪಂದ್ಯಗಳ ಏಕದಿನ ಸರಣಿಗೆ ವೇದಿಕೆ ಸಜ್ಜಾಗುತ್ತಿದ್ದು, ಅನುಭವಿ ಬ್ಯಾಟರ್ಗಳಾದ ರೋಹಿತ್ ಶರ್ಮ-ವಿರಾಟ್ ಕೊಹ್ಲಿ ಕಣಕ್ಕಿಳಿಯಲಿರುವುದರಿಂದ ಈ ಸರಣಿ ಹೆಚ್ಚಿನ ಆಕರ್ಷಣೆಯನ್ನು ಪಡೆದುಕೊಂಡಿದೆ. ಟಿ20ಯಂತೆ ಏಕದಿನ ಸರಣಿಯಲ್ಲೂ ರನ್ಪ್ರವಾಹ ಹರಿಯುವ ನಿರೀಕ್ಷೆ ಇದ್ದು, ಇದರೊಂದಿಗೆ ಹಲವು ದಾಖಲೆಗಳು ನಿರ್ಮಾಣಗೊಳ್ಳುವ ಅವಕಾಶವೂ ಇದೆ. ಬುಧವಾರ ಆಕ್ಲೆಂಡ್ನಲ್ಲಿ ಶುರುವಾಗಲಿರುವ ಏಕದಿನ ಸರಣಿಯಲ್ಲಿ ಭಾರತೀಯರು ನಿರೀಸುತ್ತಿರುವ ಕೆಲ ಪ್ರಮುಖ ದಾಖಲೆಗಳ ಸಂಪ್ತ ವಿವರ ಇಲ್ಲಿದೆ.
ಕೊಹ್ಲಿಗೆ ಶತಕದ ದಾಖಲೆ ತವಕ
ವಿರಾಟ್ ಕೊಹ್ಲಿ ಈಗಾಗಲೆ 55 ಶತಕಗಳೊಂದಿಗೆ ಅಂತಾರಾಷ್ಟ್ರೀಯ ಏಕದಿನ ಕ್ರಿಕೆಟ್ನಲ್ಲಿ ಗರಿಷ್ಠ ಶತಕ ಸಿಡಿಸಿದ ಬ್ಯಾಟರ್ ಎನಿಸಿದ್ದಾರೆ. ಕಿವೀಸ್ ವಿರುದ್ಧದ ಸರಣಿಯಲ್ಲಿ ಅವರು ಇನ್ನೊಂದು ಶತಕ ಸಿಡಿಸಿದರೆ ಲಿಸ್ಟ್ ಎ ಏಕದಿನ ಕ್ರಿಕೆಟ್ನಲ್ಲೂ ಗರಿಷ್ಠ ಶತಕ ಸಿಡಿಸಿದ ದಾಖಲೆ ಬರೆಯಲಿದ್ದಾರೆ. ಸದ್ಯ ಅವರು ತಲಾ 60 ಶತಕಗಳೊಂದಿಗೆ ದಿಗ್ಗಜ ಸಚಿನ್ ತೆಂಡುಲ್ಕರ್ ಜತೆಗೆ ಈ ದಾಖಲೆಯನ್ನು ಹಂಚಿಕೊಂಡಿದ್ದಾರೆ. ಕೊಹ್ಲಿ (8,720) ಇನ್ನು ಚೇಸಿಂಗ್ನಲ್ಲಿ 54 ರನ್ ಗಳಿಸಿದರೆ, ಏಕದಿನ ಕ್ರಿಕೆಟ್ನಲ್ಲಿ ಚೇಸಿಂಗ್ನಲ್ಲಿ ಗರಿಷ್ಠ ರನ್ ಗಳಿಸಿದ ಸಚಿನ್ ತೆಂಡುಲ್ಕರ್ (8,667) ದಾಖಲೆಯನ್ನೂ ಮುರಿಯಲಿದ್ದಾರೆ. ಕೊಹ್ಲಿ ಸರಣಿಯಲ್ಲಿ 103 ರನ್ ಗಳಿಸಿದರೆ, ನ್ಯೂಜಿಲೆಂಡ್ ವಿರುದ್ಧ ಏಕದಿನ ಕ್ರಿಕೆಟ್ನಲ್ಲಿ 2 ಸಾವಿರ ರನ್ ಗಳಿಸಿದ ಮೊದಲ ಬ್ಯಾಟರ್ ಎನಿಸಲಿದ್ದಾರೆ. 179 ರನ್ ಗಳಿಸಿದರೆ, ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ನ್ಯೂಜಿಲೆಂಡ್ ವಿರುದ್ಧ ಗರಿಷ್ಠ ರನ್ ಗಳಿಸಿದ ಬ್ಯಾಟರ್ ಎನಿಸಲಿದ್ದಾರೆ. 12 ರನ್ ಗಳಿಸಿದರೆ ಏಕದಿನದಲ್ಲಿ 3ನೇ ಕ್ರಮಾಂಕದಲ್ಲಿ 13 ಸಾವಿರ ರನ್ ಪೂರೈಸಿದ ಮೊದಲಿಗ ಎನಿಸಲಿದ್ದಾರೆ. ಕೊಹ್ಲಿ ಇನ್ನು 5 ಕ್ಯಾಚ್ ಹಿಡಿದರೆ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ 350 ಕ್ಯಾಚ್ ಹಿಡಿದ ಮೊದಲ ಭಾರತೀಯ ಫೀಲ್ಡರ್ ಎನಿಸಲಿದ್ದಾರೆ. ಕೊಹ್ಲಿ ಇನ್ನು 19 ಸಿಕ್ಸರ್ ಸಿಡಿಸಿದರೆ, ಗಂಗೂಲಿ (189), ತೆಂಡುಲ್ಕರ್ರನ್ನು (195) ಹಿಂದಿಕ್ಕಿ, ರೋಹಿತ್ (381), ಧೋನಿ (222) ಬಳಿಕ ಏಕದಿನದಲ್ಲಿ 200 ಸಿಕ್ಸರ್ ಸಿಡಿಸಿದ 3ನೇ ಭಾರತೀಯ ಎನಿಸಲಿದ್ದಾರೆ.
400 ಸಿಕ್ಸರ್ ಸನಿಹ ರೋಹಿತ್
ರೋಹಿತ್ ಶರ್ಮ (381 ಸಿಕ್ಸರ್) ಸರಣಿಯಲ್ಲಿ 19 ಸಿಕ್ಸರ್ ಸಿಡಿಸಿದರೆ, ಏಕದಿನ ಕ್ರಿಕೆಟ್ನಲ್ಲಿ 400 ಸಿಕ್ಸರ್ ಪೂರೈಸಿದ ಮೊದಲಿಗರೆನಿಸುವ ಅವಕಾಶ ಹೊಂದಿದ್ದಾರೆ. ಇನ್ನು ಸರಣಿಯಲ್ಲಿ 26 ಸಿಕ್ಸರ್ ಸಿಡಿಸಿದರೆ, ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ 700 ಸಿಕ್ಸರ್ ಸಿಡಿಸಿದ ಮೊದಲಿಗರೆನಿಸಲಿದ್ದಾರೆ. ರೋಹಿತ್ ಏಕದಿನ ಕ್ರಿಕೆಟ್ನಲ್ಲಿ ಇದುವರೆಗೆ 35 ಶತಕ, 63 ಅರ್ಧಶತಕಗಳ ಸಹಿತ 98 ಬಾರಿ 50 ಪ್ಲಸ್ ರನ್ ಗಳಿಸಿದ್ದಾರೆ. ಇನ್ನೆರಡು ಬಾರಿ 50 ಪ್ಲಸ್ ರನ್ ಗಳಿಸಿದರೆ, 100 ಬಾರಿ ಈ ಸಾಧನೆ ಮಾಡಿದ ವಿಶ್ವದ 6ನೇ ಬ್ಯಾಟರ್ ಎನಿಸಲಿದ್ದಾರೆ. ಸಚಿನ್ ತೆಂಡುಲ್ಕರ್, ವಿರಾಟ್ ಕೊಹ್ಲಿ, ಸಂಗಕ್ಕರ, ಪಾಂಟಿಂಗ್, ಕ್ಯಾಲಿಸ್ ಹಿಂದಿನ ಸಾಧಕರು. ರೋಹಿತ್ ಇನ್ನು 6 ಸಿಕ್ಸರ್ ಸಿಡಿಸಿದರೆ, ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ 600 ಸಿಕ್ಸರ್ ಸಿಡಿಸಿದ ಮೊದಲ ಆರಂಭಿಕ ಎನಿಸಲಿದ್ದಾರೆ. ಇದಲ್ಲದೆ, ರೋಹಿತ್ ಸರಣಿಯಲ್ಲಿ ಶತಕ ಸಿಡಿಸಿದರೆ, ಕಿವೀಸ್ ನೆಲದ ಏಕದಿನದಲ್ಲಿ ಶತಕ ಸಿಡಿಸಿದ ಅತಿ ಹಿರಿಯ ಎನಿಸಲಿದ್ದಾರೆ. 39 ವರ್ಷದ ಅವರು ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದರೂ, ಭಾರತದ ಅತಿ ಹಿರಿಯ ಸಾಧಕ ಎನಿಸಲಿದ್ದಾರೆ.
ಕಪಿಲ್ ದಾಖಲೆಯತ್ತ ಗಿಲ್
ನಾಯಕ ಶುಭಮಾನ್ ಗಿಲ್ ಸರಣಿಯಲ್ಲಿ 71 ರನ್ ಗಳಿಸಿದರೆ, ಏಕದಿನ ಕ್ರಿಕೆಟ್ನ ಗರಿಷ್ಠ ರನ್ ಸ್ಕೋರರ್ಗಳ ಪಟ್ಟಿಯಲ್ಲಿ ಮಾಜಿ ನಾಯಕ ಕಪಿಲ್ ದೇವ್ ಅವರನ್ನು ಹಿಂದಿಕ್ಕಲಿದ್ದಾರೆ. ಕಪಿಲ್ 3783 ರನ್ಗಳೊಂದಿಗೆ ಏಕದಿನದಿಂದ ನಿವೃತ್ತಿಯಾಗಿದ್ದರೆ, ಗಿಲ್ ಸದ್ಯ 3,713 ರನ್ ಗಳಿಸಿದ್ದಾರೆ. ಇನ್ನು ಗಿಲ್ಗೆ ಏಕದಿನದಲ್ಲಿ ನಾಯಕನಾಗಿ ಒಂದು ಸಾವಿರ ರನ್ ಪೂರೈಸಲು 63 ರನ್ಗಳಷ್ಟೇ ಅಗತ್ಯವಿದೆ.
7 ವರ್ಷಗಳ ಬಳಿಕ ಕಿವೀಸ್ನಲ್ಲಿ ಏಕದಿನ ಸರಣಿ ಗೆಲುವಿನ ಗುರಿ
ನ್ಯೂಜಿಲೆಂಡ್ ನೆಲದಲ್ಲಿ ಆಡಿದ ಸತತ 3ನೇ ಟಿ20 ಸರಣಿಯಲ್ಲೂ ಗೆದ್ದಿರುವ ಭಾರತ ತಂಡ, ಏಕದಿನ ಕ್ರಿಕೆಟ್ನಲ್ಲಿ 7 ವರ್ಷಗಳ ಬಳಿಕ ಸರಣಿ ಜಯಿಸುವ ಗುರಿ ಹೊಂದಿದೆ. 2019ರಲ್ಲಿ ಕೊನೆಯದಾಗಿ ಭಾರತ ತಂಡ ನ್ಯೂಜಿಲೆಂಡ್ ನೆಲದಲ್ಲಿ ಏಕದಿನ ಸರಣಿ ಗೆದ್ದಿತ್ತು. ನಂತರದ 2 ಪ್ರವಾಸಗಳಲ್ಲಿ ಭಾರತ ತಂಡ ಏಕದಿನ ಸರಣಿಯಲ್ಲಿ ಸೋತಿತ್ತು. 2009ರಲ್ಲಿ ಭಾರತ ಮೊದಲ ಬಾರಿಗೆ ನ್ಯೂಜಿಲೆಂಡ್ನಲ್ಲಿ ಏಕದಿನ ಸರಣಿ ಗೆದ್ದಿತ್ತು. ಇದೀಗ 3ನೇ ಬಾರಿ ಕಿವೀಸ್ ನೆಲದಲ್ಲಿ ಏಕದಿನ ಸರಣಿ ಗೆಲ್ಲಲು ಪ್ರಯತ್ನಿಸಲಿದೆ.
ಎರಡನೇ ಗರಿಷ್ಠ ರನ್ ಗಳಿಸಿದ ಕೀಪರ್ ಎನಿಸುವತ್ತ ರಾಹುಲ್
ಕೆಎಲ್ ರಾಹುಲ್ ಸರಣಿಯಲ್ಲಿ 276 ರನ್ ಗಳಿಸಿದರೆ ದಿಗ್ಗಜ ರಾಹುಲ್ ದ್ರಾವಿಡ್ (2,300) ಅವರನ್ನು ಹಿಂದಿಕ್ಕಿ ಏಕದಿನ ಕ್ರಿಕೆಟ್ನಲ್ಲಿ ಎಂಎಸ್ ಧೋನಿ ಬಳಿಕ ಗರಿಷ್ಠ ರನ್ ಗಳಿಸಿದ ಭಾರತೀಯ ವಿಕೆಟ್ ಕೀಪರ್ ಎನಿಸಲಿದ್ದಾರೆ. ಸದ್ಯ ರಾಹುಲ್ ವಿಕೆಟ್ ಕೀಪರ್ ಆಗಿ 2,025 ರನ್ ಗಳಿಸಿದ್ದಾರೆ. ಅದಲ್ಲದೆ ಇನ್ನೊಂದು ಶತಕ ಸಿಡಿಸಿದರೂ, ಅವರು ಧೋನಿ (10) ಬಳಿಕ ಗರಿಷ್ಠ ಶತಕ ಸಿಡಿಸಿದ ಭಾರತೀಯ ವಿಕೆಟ್ ಕೀಪರ್ ಎನಿಸಲಿದ್ದಾರೆ. ಸದ್ಯ ಅವರು ಈ ಗೌರವವನ್ನು ರಾಹುಲ್ ದ್ರಾವಿಡ್ (4) ಜತೆ ಹಂಚಿಕೊಂಡಿದ್ದಾರೆ.
ವಿಶ್ವ ನಂ. 1 ಪಟ್ಟಕ್ಕೂ ಕಾದಾಟ
ಭಾರತ-ನ್ಯೂಜಿಲೆಂಡ್ ನಡುವಿನ ಏಕದಿನ ಸರಣಿಯಲ್ಲಿ ಐಸಿಸಿ ಏಕದಿನ ರ್ಯಾಂಕಿಂಗ್ನ ಅಗ್ರಸ್ಥಾನಕ್ಕೂ ಪೈಪೋಟಿ ನಡೆಯಲಿದೆ. ಸದ್ಯ ಭಾರತ 115 ಅಂಕದೊಂದಿಗೆ ಅಗ್ರಸ್ಥಾನದಲ್ಲಿದ್ದರೆ, ನ್ಯೂಜಿಲೆಂಡ್ 109 ಅಂಕದೊಂದಿಗೆ ಅಗ್ರಸ್ಥಾನದಲ್ಲಿದೆ. ಭಾರತ ತಂಡ ನಂ. 1 ಪಟ್ಟ ಕಾಪಾಡಿಕೊಳ್ಳಬೇಕಾದರೆ, 2-3ಕ್ಕಿಂತ ಹೆಚ್ಚು ಅಂತರದಲ್ಲಿ ಸರಣಿ ಸೋಲಬಾರದು. ನ್ಯೂಜಿಲೆಂಡ್ ತಂಡ 4-1ರಿಂದ ಸರಣಿ ಗೆದ್ದರೆ ವಿಶ್ವ ನಂ. 1 ಪಟ್ಟಕ್ಕೇರುವ ಅವಕಾಶ ಹೊಂದಿದೆ.
