ಕೊನೇ ಯುರೋಕಪ್ ಎಂದ ರೊನಾಲ್ಡೊ: ಹಾಲಿ ಟೂರ್ನಿ ತನ್ನ ವೃತ್ತಿಜೀವನದ ಕೊನೆಯ ಯುರೋ ಕಪ್ ಟೂರ್ನಿ ಆಗಿದೆ ಕ್ರಿಶ್ಚಿಯಾನೊ ರೊನಾಲ್ಡೊ ಖಾತ್ರಿಪಡಿಸಿದ್ದಾರೆ. ಸ್ಲೊವೇನಿಯಾ ವಿರುದ್ಧ ಗೆಲುವಿನ ಬಳಿಕ ಮಾತನಾಡಿದ ರೊನಾಲ್ಡೊ, ನಿಸ್ಸಂದೇಹವಾಗಿ, ಇದು ನನ್ನ ಕೊನೆಯ ಯುರೋಪಿಯನ್ ಚಾಂಪಿಯನ್ಷಿಪ್ ಆಗಿದೆ. ಆದರೆ ಇದರ ಬಗ್ಗೆ ಹೆಚ್ಚು ಭಾವನಾತ್ಮಕವಾಗಿಲ್ಲ ಎಂದಿದ್ದಾರೆ. ಯುರೋ ಕಪ್ನಲ್ಲಿ ಗರಿಷ್ಠ ಗೋಲು ದಾಖಲಿಸಿರುವ ರೊನಾಲ್ಡೊ ಹಾಲಿ ಟೂರ್ನಿಯಲ್ಲಿ ಆಡಿದ 4 ಪಂದ್ಯಗಳಲ್ಲಿ ಇದುವರೆಗೆ ಒಂದೂ ಗೋಲು ದಾಖಲಿಸಿಲ್ಲ. ಪಂದ್ಯದ ಹೆಚ್ಚುವರಿ ಸಮಯದಲ್ಲಿ ಸಿಕ್ಕ ಪೆನಾಲ್ಟಿಯಲ್ಲಿ ಗೋಲು ಸಿಡಿಸಲು ವಿಲರಾದ ಬಳಿಕ 39 ವರ್ಷದ ರೊನಾಲ್ಡೊ ಅಂಗಣದಲ್ಲಿ ಭಾವುಕರಾದರು. ಆದರೆ ಸಹ ಆಟಗಾರರು ಅವರ ಹಣೆಗೆ ಚುಂಬಿಸಿ ಆತ್ಮಸ್ಥೈರ್ಯ ತುಂಬಿದರು. ಬಳಿಕ ಪೆನಾಲ್ಟಿ ಶೂಟೌನಲ್ಲಿ ಗೋಲು ದಾಖಲಿಸಿದ ರೊನಾಲ್ಡೊ, ಅಭಿಮಾನಿಗಳಿ ಕೈ ಮುಗಿಯುವ ಮೂಲಕ ಕ್ಷಮೆಯಾಚನೆ ಜತೆಗೆ ಕೋಪ, ಹತಾಶೆಯನ್ನು ಹೊರಹಾಕಿದರು.
