ಸರಣಿ ಗೆದ್ದ ಕಿವೀಸ್, ಟೆಸ್ಟ್ ವಿಶ್ವಕಪ್ ಫೈನಲ್‌ಗೆ ಮುನ್ನ ನಂ. 1 ಪಟ್ಟ ಕಳೆದುಕೊಂಡ ಭಾರತ

ಬರ್ಮಿಂಗ್‌ಹ್ಯಾಂ: ಬೌಲರ್‌ಗಳ ಬಿಗಿ ದಾಳಿಯ ನೆರವಿನಿಂದ ನ್ಯೂಜಿಲೆಂಡ್ ತಂಡ ಆತಿಥೇಯ ಇಂಗ್ಲೆಂಡ್ ವಿರುದ್ಧದ 2ನೇ ಹಾಗೂ ಅಂತಿಮ ಟೆಸ್ಟ್ ಪಂದ್ಯದಲ್ಲಿ 8 ವಿಕೆಟ್‌ಗಳಿಂದ ಸುಲಭ ಗೆಲುವು ದಾಖಲಿಸಿದೆ. ಈ ಮೂಲಕ 2 ಪಂದ್ಯಗಳ ಸರಣಿಯನ್ನು 1-0ಯಿಂದ ಗೆದ್ದ ಕಿವೀಸ್ ತಂಡ, ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್ ಫೈನಲ್‌ಗೆ ಮುನ್ನ ಭಾರತ ತಂಡಕ್ಕೆ ಎಚ್ಚರಿಕೆಯ ಗಂಟೆ ರವಾನಿಸಿದೆ.

ಭಾನುವಾರ 9 ವಿಕೆಟ್‌ಗೆ 122 ರನ್‌ಗಳಿಂದ 4ನೇ ದಿನದಾಟ ಆರಂಭಿಸಿದ ಇಂಗ್ಲೆಂಡ್, ಮೊದಲ ಎಸೆತದಲ್ಲೇ ಇನಿಂಗ್ಸ್ ಮುಗಿಸಿತು. ಇದರಿಂದ ಕೇವಲ 38 ರನ್ ಸವಾಲು ಪಡೆದ ಕಿವೀಸ್ ತಂಡ, 2 ವಿಕೆಟ್‌ಗೆ 41 ರನ್ ಗಳಿಸಿ ಜಯಿಸಿತು. ಹಂಗಾಮಿ ನಾಯಕ ಟಾಮ್ ಲಾಥಮ್ (23*) ತಂಡವನ್ನು ಗೆಲುವಿನ ದಡ ಸೇರಿಸಿದರು. ನಾಯಕ ಕೇನ್ ವಿಲಿಯಮ್ಸನ್ ಸಹಿತ ಕೆಲ ಆಟಗಾರರ ಗಾಯದ ಸಮಸ್ಯೆ ಮತ್ತು ಪ್ರಮುಖ ಬೌಲರ್‌ಗಳಿಗೆ ವಿಶ್ರಾಂತಿ ನೀಡಿದ ನಡುವೆಯೂ ಕಿವೀಸ್ ತಂಡ ಆಂಗ್ಲರೆದುರು ಜಯಿಸಿರುವುದು ಗಮನಾರ್ಹ.

ಇದನ್ನೂ ಓದಿ: ಕ್ರೆಜ್‌ಸಿಕೋವಾಗೆ ಫ್ರೆಂಚ್ ಓಪನ್ ಕಿರೀಟ, ಜೆಕ್ ಆಟಗಾರ್ತಿಗೆ ಚೊಚ್ಚಲ ಗ್ರಾಂಡ್ ಸ್ಲಾಂ ಗರಿ

ನ್ಯೂಜಿಲೆಂಡ್ 1999ರ ಬಳಿಕ ಮೊದಲ ಬಾರಿಗೆ ಇಂಗ್ಲೆಂಡ್‌ನಲ್ಲಿ ಸರಣಿ ಗೆದ್ದರೆ, ಇಂಗ್ಲೆಂಡ್ ತಂಡ ಜೋ ರೂಟ್ ಸಾರಥ್ಯದಲ್ಲಿ ಮೊದಲ ಬಾರಿಗೆ ತವರಿನಲ್ಲಿ ಸರಣಿ ಸೋತಿತು. ಕಳೆದ 7 ವರ್ಷಗಳಲ್ಲಿ ಇಂಗ್ಲೆಂಡ್‌ಗೆ ತವರಿನಲ್ಲಿ ಇದು ಮೊದಲ ಸರಣಿ ಸೋಲಾಗಿದೆ.

ಇಂಗ್ಲೆಂಡ್: 303 ಮತ್ತು 41.1 ಓವರ್‌ಗಳಲ್ಲಿ 122 (ಸ್ಟೋನ್ 15, ಬೌಲ್ಟ್ 34ಕ್ಕೆ 2, ಹೆನ್ರಿ 36ಕ್‌ಎಕ 3, ವ್ಯಾಗ್ನರ್ 18ಕ್ಕೆ 3, ಅಜಾಜ್ 25ಕ್ಕೆ 2), ನ್ಯೂಜಿಲೆಂಡ್: 388 ಮತ್ತು 10.5 ಓವರ್‌ಗಳಲ್ಲಿ 2 ವಿಕೆಟ್‌ಗೆ 41 (ಲಾಥಮ್ 23*, ಕಾನ್‌ವೇ 3, ಯಂಗ್ 8, ಬ್ರಾಡ್ 13ಕ್ಕೆ 1, ಸ್ಟೋನ್ 5ಕ್ಕೆ1). ಪಂದ್ಯಶ್ರೇಷ್ಠ: ಮ್ಯಾಟ್​ ಹೆನ್ರಿ, ಸರಣಿಶ್ರೇಷ್ಠ: ಡೆವೊನ್​ ಕಾನ್​ವೇ, ರೋರಿ ಬರ್ನ್ಸ್​​.

ಭಾರತದ ನಂ. 1 ಪಟ್ಟ ಕಸಿದ ಕಿವೀಸ್

ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್‌ಷಿಪ್ ಫೈನಲ್ ಪಂದ್ಯಕ್ಕೆ ಮುನ್ನ ಐಸಿಸಿ ಟೆಸ್ಟ್ ರ‌್ಯಾಂಕಿಂಗ್‌ನಲ್ಲಿ ಭಾರತ ತಂಡದ ನಂ. 1 ಪಟ್ಟವನ್ನು ನ್ಯೂಜಿಲೆಂಡ್ ಕಸಿದುಕೊಂಡಿದೆ. ಭಾರತ ಈಗ 121 ಅಂಕದೊಂದಿಗೆ 2ನೇ ಸ್ಥಾನಕ್ಕೆ ಕುಸಿದಿದ್ದರೆ, ನ್ಯೂಜಿಲೆಂಡ್ 123 ಅಂಕದೊಂದಿಗೆ ನಂ. 1 ಪಟ್ಟಕ್ಕೇರಿದ್ದು, ಡಬ್ಲ್ಯುಟಿಸಿ ಫೈನಲ್‌ಗೆ ವಿಶ್ವಾಸದಿಂದ ಸಜ್ಜಾಗಿದೆ. ಸರಣಿ ಸೋತ ಇಂಗ್ಲೆಂಡ್ ತಂಡ 4ನೇ ಸ್ಥಾನಕ್ಕೆ ಕುಸಿದಿದ್ದರೆ, ಆಸ್ಟ್ರೇಲಿಯಾ 3ನೇ ಸ್ಥಾನಕ್ಕೇರಿದೆ.

https://www.vijayavani.net/euro-cup-football-tournament/