3ನೇ ಟೆಸ್ಟ್​ಗೆ ಮುನ್ನ 9 ದಿನಗಳ ವಿರಾಮ; ಅಬುಧಾಬಿಗೆ ಹಾರಿದ ಇಂಗ್ಲೆಂಡ್ ತಂಡ!

ವಿಶಾಖಪಟ್ಟಣ: ಭಾರತ-ಇಂಗ್ಲೆಂಡ್​ ನಡುವಿನ 2ನೇ ಟೆಸ್ಟ್​ ಪಂದ್ಯ ವಿಶಾಖಪಟ್ಟಣದಲ್ಲಿ ಒಂದು ದಿನ ಮುಂಚಿತವಾಗಿ ಮುಗಿದಿದೆ. ಇದರಿಂದ 3ನೇ ಟೆಸ್ಟ್​ಗೆ ಮುನ್ನ ಉಭಯ ತಂಡಗಳಿಗೆ 9 ದಿನಗಳ ಬಿಡುವು ದೊರೆತಿದೆ. ಇಂಗ್ಲೆಂಡ್​ ತಂಡ ಅಬುಧಾಬಿಗೆ ತೆರಳಿ ಅಲ್ಲೇ ವಿಶ್ರಾಂತಿ-ತರಬೇತಿ ಪಡೆಯಲಿದೆ. ಭಾರತ ಪ್ರವಾಸಕ್ಕೆ ಬರುವ ಮುನ್ನವೂ ಇಂಗ್ಲೆಂಡ್​ ಅಲ್ಲೇ ತರಬೇತಿ ಶಿಬಿರ ಆಯೋಜಿಸಿತ್ತು.

ಸರಣಿಯ ಉಳಿದ 3 ಪಂದ್ಯಗಳಿಗೆ ಭಾರತ ತಂಡ ಇನ್ನೂ ಪ್ರಕಟಗೊಂಡಿಲ್ಲ. ಭಾರತ ತಂಡ ಮಂಗಳವಾರ ಪ್ರಕಟಗೊಳ್ಳುವ ಸಾಧ್ಯತೆ ಇದೆ. ಆದರೆ ಫೆ. 12 ಅಥವಾ 13ರಂದು ಭಾರತ ತಂಡದ ಆಟಗಾರರು ರಾಜ್​ಕೋಟ್​ನಲ್ಲಿ ಹಾಜರಾಗುವ ನಿರೀಕ್ಷೆ ಇದೆ. ಗಾಯಗೊಂಡಿರುವ ಕೆಲ ಆಟಗಾರರ ಚೇತರಿಕೆಗೂ ಈ ಬಿಡುವು ನೆರವಾಗಲಿದೆ.

ಡಬ್ಲ್ಯುಟಿಸಿಯಲ್ಲಿ 2ನೇ ಸ್ಥಾನಕ್ಕೇರಿದ ಭಾರತ

ವಿಶಾಖಪಟ್ಟಣದಲ್ಲಿ ಸಾಧಿಸಿದ ಗೆಲುವಿನೊಂದಿಗೆ ಭಾರತ ತಂಡ ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ (ಡಬ್ಲ್ಯುಟಿಸಿ) 3ನೇ ಆವೃತ್ತಿಯ ಅಂಕಪಟ್ಟಿಯಲ್ಲಿ 2ನೇ ಸ್ಥಾನಕ್ಕೇರಿದೆ. ಮೊದಲ ಟೆಸ್ಟ್​ ಸೋಲಿನ ಬಳಿಕ 6ನೇ ಸ್ಥಾನಕ್ಕೆ ಕುಸಿದಿದ್ದ ಭಾರತ ಈಗ ಶೇ. 52.77 ಅಂಕಗಳೊಂದಿಗೆ ಅಗ್ರಸ್ಥಾನಿ ಆಸ್ಟ್ರೆಲಿಯಾದ (ಶೇ.55) ಬೆನ್ನಹಿಂದೆ ನಿಂತಿದೆ. ಮುಂದಿನ ಟೆಸ್ಟ್​ ಗೆದ್ದರೆ ಭಾರತ ಅಗ್ರಸ್ಥಾನಕ್ಕೇರಲಿದೆ. ದಕ್ಷಿಣ ಆಫ್ರಿಕಾ (ಶೇ.50) ಮತ್ತು ನ್ಯೂಜಿಲೆಂಡ್​ (ಶೇ.50) ಕ್ರಮವಾಗಿ 3 ಮತ್ತು 4ನೇ ಸ್ಥಾನದಲ್ಲಿವೆ.

https://www.vijayavani.net/davis-cup-india-blank-pakistan-4-0-seal-place-in-world-group-i