ಡೊಮಿನಿಕ್​ ಸಿಬ್ಲೆ - ಬೆನ್​ ಸ್ಟೋಕ್ಸ್​ ಶತಕದಾಟ, ಬಲಿಷ್ಠ ಸ್ಥಿತಿಯತ್ತ ಇಂಗ್ಲೆಂಡ್

ಮ್ಯಾಂಚೆಸ್ಟರ್​: ವೆಸ್ಟ್​ ಇಂಡೀಸ್​ ತಂಡದ ಆರಂಭಿಕ ಹೊಡೆತಕ್ಕೆ ನಲುಗಿದ್ದ ಆತಿಥೇಯ ಇಂಗ್ಲೆಂಡ್​ ತಂಡ ಎರಡನೇ ಟೆಸ್ಟ್​ ಪಂದ್ಯದಲ್ಲಿ ಪ್ರತಿಹೋರಾಟ ತೋರಲು ಯಶಸ್ವಿಯಾಗಿದೆ. ಆರಂಭಿಕ ಬ್ಯಾಟ್ಸ್​ಮನ್​ ಡೊಮಿನಿಕ್​ ಸಿಬ್ಲೆ (101ರನ್​, 316ಎಸೆತ, 4ಬೌಂಡರಿ) ಹಾಗೂ ಆಲ್ರೌಂಡರ್​ ಬೆನ್​ ಸ್ಟೋಕ್ಸ್​ (103ರನ್​, 258 ಎಸೆತ, 10 ಬೌಂಡರಿ, 1 ಸಿಕ್ಸರ್​) ಜೋಡಿ ಮುರಿಯದ 4ನೇ ವಿಕೆಟ್​ಗೆ 187 ರನ್​ ಪೇರಿಸಿದ ಫಲವಾಗಿ ತಂಡ ಬಲಿಷ್ಠ ಸ್ಥಿತಿಯಲ್ಲಿದೆ. ಓಲ್ಡ್​ ಟ್ರಾಫೋರ್ಡ್ ಮೈದಾನದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ 3 ವಿಕೆಟ್​ಗೆ 207 ರನ್​ಗಳಿಂದ 2ನೇ ದಿನದಾಟ ಆರಂಭಿಸಿದ ಇಂಗ್ಲೆಂಡ್​ ಭೋಜನ ವಿರಾಮದ ಬಳಿಕ 3 ವಿಕೆಟ್​ಗೆ 268 ರನ್​ ಕಲೆಹಾಕಿ ಬ್ಯಾಟಿಂಗ್ ಮುಂದುವರಿಸಿದೆ.

ಸಿಬ್ಲೆ-ಸ್ಟೋಕ್ಸ್​ ಅಬ್ಬರ

ಕ್ರಮವಾಗಿ 86 ಹಾಗೂ 59 ರನ್​ಗಳಿಂದ ಎರಡನೇ ದಿನದಾಟ ಆರಂಭಿಸಿದ ಡೊಮಿನಿಕ್​ ಸಿಬ್ಲೆ ಹಾಗೂ ಬೆನ್​ ಸ್ಟೋಕ್ಸ್​ ಜೋಡಿ ಒಂದು ಅವಧಿ ಪೂರ್ತಿ ಬ್ಯಾಟಿಂಗ್​ ಕಾಯ್ದುಕೊಂಡಿತು. ಮೊದಲ ದಿನದಾಟದ ಆರಂಭದಲ್ಲೇ ಮಿಂಚಿನ ದಾಳಿ ನಡೆಸಿದ ವಿಂಡೀಸ್​ ಬೌಲರ್​ಗಳು ಈ ಜೋಡಿ ಬೇರ್ಪಡಿಸಲು ವಿಫಲರಾದರು. ಮೊದಲ ದಿನದಾಟದ ಕಡೇ ಹಂತದಲ್ಲಿ ಸಿಬ್ಲೆ 68 ರನ್​ಗಳಿದ್ದ ವೇಳೆ ಗ್ಯಾಬ್ರಿಯಲ್​ ಎಸೆತದಲ್ಲಿ ಹೋಲ್ಡರ್​ ಕ್ಯಾಚ್​ ಕೈಚೆಲ್ಲಿದ್ದರು. ಇದರ ಲಾಭ ಗಿಟ್ಟಿಸಿಕೊಂಡ ಸಿಬ್ಲೆ ಟೆಸ್ಟ್​ ಕ್ರಿಕೆಟ್​ನಲ್ಲಿ 2ನೇ ಶತಕ ಸಿಡಿಸಿದರು. ಭೋಜನ ವಿರಾಮದ ಮೊದಲ ಓವರ್ ನಲ್ಲಿ ಸ್ಟೋಕ್ಸ್​ ಶತಕ ಪೂರೈಸಿದರು. ಈ ಜೋಡಿ ಬೇರ್ಪಡಿಸಲು ವಿಂಡೀಸ್​ ಬೌಲರ್​ಗಳು ವಿವಿಧ ಪ್ರಯೋಗ ನಡೆಸಿದರೂ ಪ್ರಯೋಜನವಾಗಲಿಲ್ಲ.

ಇಂಗ್ಲೆಂಡ್​: ಎರಡನೇ ದಿನದಾಟದ ಭೋಜನ ವಿರಾಮದ ನಂತರ 100 ಓವರ್​ಗಳಲ್ಲಿ 3 ವಿಕೆಟ್​ಗೆ 268 (ಡೊಮಿನಿಕ್​ ಸಿಬ್ಲೆ 101*, ಸ್ಟೋಕ್ಸ್​ 103*, ರೂಟ್​ 23, ರೋಸ್ಟನ್​ ಚೇಸ್​ 55ಕ್ಕೆ 2, ಅಲ್ಜಾರಿ ಜೋಸೆಫ್​ 63ಕ್ಕೆ 1).