ಟಿ20 ವಿಶ್ವಕಪ್​ ಗೆದ್ದ ತಂಡಕ್ಕೆ 125 ಕೋಟಿ ರೂ. ಬಹುಮಾನ ಹಂಚಿಕೆ: ಮೀಸಲು ಆಟಗಾರರಿಗೂ ಒಲಿದ ಲಕ್​

ಮುಂಬೈ: ಟೀಮ್​ ಇಂಡಿಯಾ 17 ವರ್ಷಗಳ ಟಿ20 ವಿಶ್ವಕಪ್​ ಗೆದ್ದ ನಂತರ ಬಿಸಿಸಿಐ ಕಾರ್ಯದರ್ಶಿ ಜಯ್​ ಷಾ ಅವರು ವಿಶ್ವಕಪ್​ ವಿಜೇತ ತಂಡದ ಎಲ್ಲ ಆಟಗಾರರು ಹಾಗೂ ತರಬೇತಿ ಬಳಗಕ್ಕೆ ಒಟ್ಟು 125 ಕೋಟಿ ರೂಪಾಯಿ ಬಹುಮಾನ ಘೋಷಿಸಿದ್ದರು. ಆದರೆ ಬಹುಮಾನ ಮೊತ್ತ ಆಟಗಾರರು ಮತ್ತು ತರಬೇತಿ ಸಿಬ್ಬಂದಿಗೆ ಹೇಗೆ ಹಂಚಲಾಗುತ್ತದೆ ಎಂಬುದನ್ನು ಭಾರತೀಯ ಕ್ರಿಕೆಟ್​ ಮಂಡಳಿ ಸ್ಪಷ್ಟಪಡಿಸಿಲ್ಲ. ಆದರೆ ಮೂಲಗಳ ಪ್ರಕಾರ ಒಂದೂ ಪಂದ್ಯವನ್ನು ಆಡದ ಸಂಜು ಸ್ಯಾಮ್ಸನ್​ ಮತ್ತು ಯುಜುವೇಂದ್ರ ಚಾಹಲ್​ ಸೇರಿ ಭಾರತ ತಂಡದ ಎಲ್ಲ 15 ಆಟಗಾರರು ತಲಾ 5 ಕೋಟಿ ಹಾಗೂ ಮುಖ್ಯಕೋಚ್​ ರಾಹುಲ್​ ದ್ರಾವಿಡ್​ 2.5 ಕೋಟಿ ರೂ. ಪಡೆಯಲಿದ್ದಾರೆ ಎನ್ನಲಾಗಿದೆ. ಮೀಸಲು ಆಟಗಾರರು ಬಹುಮಾನ ಪಡೆಯಲು ಅರ್ಹರೆನಿಸಿದ್ದಾರೆ.

ವೆಸ್ಟ್​ ಇಂಡೀಸ್​ ಹಾಗೂ ಆಮೆರಿಕ ಆತಿಥ್ಯದಲ್ಲಿ ನಡೆದ ಟಿ20 ವಿಶ್ವಕಪ್​ ಟೂರ್ನಿಯಲ್ಲಿ ಕೋಚ್​ ರಾಹುಲ್​ ದ್ರಾವಿಡ್​ ಮಾರ್ಗದರ್ಶನದಲ್ಲಿ ರೋಹಿತ್​ ಶರ್ಮ ಪಡೆ ಚಾಂಪಿಯನ್​ ಎನಿಸಿ, 11 ವರ್ಷಗಳ ಐಸಿಸಿ ಟ್ರೋಫಿ ಗೆಲುವಿನ ಕನಸು ನನಸಾಗಿಸಿತ್ತು. ಟ್ರೋಫಿ ಗೆದ್ದ ಮರು ದಿನವೇ ಬಿಸಿಸಿಐ ಕಾರ್ಯದರ್ಶಿ ಜಯ್​ ಷಾ ಟಿ20 ವಿಶ್ವಕಪ್​ ವಿಜೇತ ಭಾರತ ತಂಡದ ಎಲ್ಲ ಆಟಗಾರರು, ತರಬೇತಿ ಸಿಬ್ಬಂದಿಗೆ ಬಹುಮಾನ ಘೋಷಿಸಿದ್ದರು. ಟೀಮ್​ ಇಂಡಿಯಾದ ಪ್ರಧಾನ ತಂಡದಲ್ಲಿದ್ದ ಎಲ್ಲ ಆಟಗಾರರ ಜತೆಗೆ ಮೀಸಲು ಆಟಗಾರರಾಗಿದ್ದ ರಿಂಕು ಸಿಂಗ್​, ಶುಭಮಾನ್​ ಗಿಲ್​, ಆವೇಶ್​ ಖಾನ್​ ಮತ್ತು ಖಲೀಲ್​ ಅಹ್ಮದ್​ ತಲಾ 1 ಕೋಟಿ ರೂ. ಬಹುಮಾನ ಪಡೆಯಲಿದ್ದಾರೆ.

ತರಬೇತಿ ಸಿಬ್ಬಂದಿ ಕೋಚ್​ ರಾಹುಲ್​ ದ್ರಾವಿಡ್​ ಸೇರಿ ಬ್ಯಾಟಿಂಗ್​ ಕೋಚ್​ ವಿಕ್ರಮ್​ ರಾಥೋರ್​, ಫೀಲ್ಡಿಂಗ್​ ಕೋಚ್​ ಟಿ.ದಿಲೀಪ್​ ಮತ್ತು ಬೌಲಿಂಗ್​ ಕೋಚ್​ ಪಾರಸ್​ ಮಹಾಂಬ್ರ್ರೆ ತಲಾ 2.5 ಕೋಟಿ ರೂ. ಪಡೆಯಲಿದ್ದಾರೆ. ಇದರೊಂದಿಗೆ ರಾಷ್ಟ್ರೀಯ ಆಯ್ಕೆ ಸಮಿತಿ ಮುಖ್ಯಸ್ಥ ಅಜಿತ್​ ಅಗರ್ಕರ್​ ಸೇರಿ ಆಯ್ಕೆ ಸಮಿತಿಯ ಎಲ್ಲ 5 ಸದಸ್ಯರು ತಲಾ 1 ಕೋಟಿ ರೂ ಪಡೆಯಲಿದ್ದಾರೆ.

ಟೀಮ್​ ಇಂಡಿಯಾ ಸಹಾಯಕ ಸಿಬ್ಬಂದಿಯ ಕಮಲೇಶ್​ ಜೈನ್​, ಯೋಗೇಶ್​ ಪರ್ಮಾರ್​, ತುಳಸಿ ರಾಮ್​ (ಫಿಸಿಯೋಥೆರಪಿಸ್ಟ್​ ), ರಾವೇಂದ್ರ ದ್ವಿಗಿ, ನುವಾನ್​ ಉದೆನೆಕೆ, ದಯಾನಂದ್​ ಗರಾನಿ (ಥ್ರೋ ಡೌನ್​ ತಜ್ಞರು), ರಾಜೀವ್​ ಕುಮಾರ್​, ಅರಣ್​ ಕಾನಡೆ (ಮಸಾಜ್​) ಹಾಗೂ ಸೋಹಮ್​ ದೇಸಾಯಿ (ಸ್ಟ್ರೆಂತ್​ ಮತ್ತು ಕಂಡೀಷನಿಂಗ್​) ತಲಾ < 2 ಕೋಟಿ ಬಹುಮಾನ ಪಡೆಯಲಿದ್ದಾರೆ. ಆಟಗಾರರು, ತರಬೇತುದಾರರು, ಸಹಾಯಕ ಸಿಬ್ಬಂದಿ ಹಾಗೂ ಆಯ್ಕೆ ಸಮಿತಿ ಹೊರತುಪಡಿಸಿ ವಿಡಿಯೋ ವಿಶ್ಲೇಷಕರು, ಬಿಸಿಸಿಐ ಸಿಬ್ಬಂದಿ ಸದಸ್ಯರು, ಮಾಧ್ಯಮ ಅಧಿಕಾರಿಗಳು ಹಾಗೂ ಲಾಜಿಸ್ಟಿಕ್ಸ್​ ಮ್ಯಾನೇಜರ್​ಗಳಿಗೂ ಸಹ ಬಹುಮಾನ ನೀಡಲಾಗುವುದು.ಆಟಗಾರರು ಸೇರಿ 42 ಸದಸ್ಯರ ತಂಡ 2024ರ ಟಿ20 ವಿಶ್ವಕಪ್​ ಟೂರ್ನಿಗೆ ತೆರಳಿತ್ತು ಎನ್ನಲಾಗಿದೆ.