Cricket: ಶಿಖರ್​ ಧವನ್​ರನ್ನು 'ಮಿಸ್ಟರ್​ ಐಸಿಸಿ' ಎಂದೇಕೆ ಕರೆಯುತ್ತಿದ್ದರು ಗೊತ್ತೇ?

ನವದೆಹಲಿ: ಭಾರತೀಯ ಕ್ರಿಕೆಟ್​ ಕಂಡ ಅತ್ಯುತ್ತಮ ಎಡಗೈ ಆರಂಭಿಕರಲ್ಲಿ ಒಬ್ಬರಾದ ಶಿಖರ್​ ಧವನ್​ ಅಂತಾರಾಷ್ಟ್ರೀಯ ಮತ್ತು ದೇಶೀಯ ಕ್ರಿಕೆಟ್​ಗೆ ಶನಿವಾರ ವಿದಾಯ ಘೋಷಿಸಿದರು. ಟೀಮ್​ ಇಂಡಿಯಾ ಪರ ಕೊನೇ ಪಂದ್ಯ ಆಡಿ ಸುಮಾರು ಎರಡು ವರ್ಷಗಳು ಕಳೆದ ಬಳಿಕ 38 ವರ್ಷದ ಧವನ್​ ಸಾಮಾಜಿಕ ಜಾಲತಾಣದಲ್ಲಿ ನಿವೃತ್ತಿ ನಿರ್ಧಾರವನ್ನು ಪ್ರಕಟಿಸಿದರು. ಧವನ್​ ದ್ವಿಪಕ್ಷೀಯ ಸರಣಿಗಳಲ್ಲಿ ಗಳಿಸುತ್ತಿದ್ದ ರನ್​ಗಳದ್ದು ಒಂದು ತೂಕವಾದರೆ, ಐಸಿಸಿ ಟೂರ್ನಿಗಳಲ್ಲಿ ಅವರು ಗಳಿಸುತ್ತಿದ್ದ ರನ್​ಗಳದ್ದು ಬೇರೆಯದ್ದೇ ತೂಕವಾಗಿರುತ್ತಿತ್ತು. ಇದಕ್ಕಾಗಿಯೇ ಅವರನ್ನು "ಮಿಸ್ಟರ್​ ಐಸಿಸಿ' ಎಂದು ಅಭಿಮಾನಿಗಳು ಬಣ್ಣಿಸುತ್ತಿದ್ದರು.

ಐಸಿಸಿ ಟೂರ್ನಿಯಲ್ಲಿ ಅವರ ರನ್​ ಸರಾಸರಿ (65.15) ವಿಶ್ವದ ಉಳಿದೆಲ್ಲ ಬ್ಯಾಟರ್​ಗಳಿಗಿಂತ ಮಿಗಿಲಾದುದು. ಅದರಲ್ಲೂ ಪ್ರಮುಖವಾಗಿ ಐಸಿಸಿ ಚಾಂಪಿಯನ್ಸ್​ ಟ್ರೋಫಿ ಧವನ್​ ಪಾಲಿಗೆ ನೆಚ್ಚಿನ ಟೂರ್ನಿಯಾಗಿತ್ತು. 2013ರ ಚಾಂಪಿಯನ್ಸ್​ ಟ್ರೋಫಿಯಲ್ಲಿ ಗರಿಷ್ಠ 363 ರನ್​ ಸಿಡಿಸಿ ಭಾರತದ ಪ್ರಶಸ್ತಿ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸುವ ಮೂಲಕ ಸರಣಿಶ್ರೇಷ್ಠರಾಗಿದ್ದರು. 2017ರ ಆವೃತ್ತಿಯಲ್ಲೂ ಗರಿಷ್ಠ 338 ರನ್​ ಸಿಡಿಸಿದ್ದರು.

2015ರ ಏಕದಿನ ವಿಶ್ವಕಪ್​ಗೆ ಮುನ್ನ ಫಾರ್ಮ್​ ಕಳೆದುಕೊಂಡು ಪರದಾಡಿದ್ದ ಧವನ್​, ಬಳಿಕ ವಿಶ್ವಕಪ್​ನಲ್ಲಿ ಭಾರತ ಪರ ಗರಿಷ್ಠ 412 ರನ್​ ಸಿಡಿಸಿ ಮಿಂಚಿದ್ದರು. ಗಾಯದಿಂದಾಗಿ 2019ರ ಏಕದಿನ ವಿಶ್ವಕಪ್​ನಲ್ಲಿ ಕೇವಲ 2 ಪಂದ್ಯ ಆಡಿದ್ದರು. ಐಸಿಸಿ ಟೂರ್ನಿಗಳಲ್ಲಿ 20 ಇನಿಂಗ್ಸ್​ಗಳಲ್ಲೇ 6 ಶತಕ ಸಿಡಿಸಿದ್ದ ಧವನ್​, ಅತಿವೇಗದ ಸಾವಿರ ರನ್​ ಸಾಧಕರೂ ಆಗಿದ್ದಾರೆ.

https://www.vijayavani.net/olympics-ring-ban-in-paris-paralympics-this-is-because