ಟೆಸ್ಟ್ ಕ್ರಿಕೆಟ್ ಅನ್ನು 2 ಡಿವಿಷನ್ಗಳಲ್ಲಿ ವಿಂಗಡಿಸುವುದು ಹೊಸ ಯೋಚನೆ ಏನಲ್ಲ. 2016ರಲ್ಲೇ ಐಸಿಸಿ ಮಟ್ಟದಲ್ಲಿ ಇಂಥದ್ದೊಂದು ಚಿಂತನೆ ನಡೆದಿತ್ತು. ಆದರೆ ಆಗ ಬಿಸಿಸಿಐಯೇ ಇದನ್ನು ಪ್ರಮುಖವಾಗಿ ವಿರೋಧಿಸಿತ್ತು. ಸಣ್ಣ ಟೆಸ್ಟ್ ದೇಶಗಳ ಮಾತನ್ನು ಕೇಳಿದ್ದ ಬಿಸಿಸಿಐ, ಐಸಿಸಿ ಈ ಹೆಜ್ಜೆ ಇಡುವುದಕ್ಕೆ ಅಡ್ಡಗಾಲು ಹಾಕಿತ್ತು. ಬಿಸಿಸಿಐ ಜತೆಗೆ ಶ್ರೀಲಂಕಾ, ಬಾಂಗ್ಲಾದೇಶ, ಜಿಂಬಾಬ್ವೆ ಕ್ರಿಕೆಟ್ ಮಂಡಳಿಗಳೂ ಈ ಪ್ರಸ್ತಾಪವನ್ನು ವಿರೋಧಿಸಿದ್ದವು. ಆಗ ಆಸೀಸ್, ಇಂಗ್ಲೆಂಡ್, ದ. ಆಫ್ರಿಕಾ, ನ್ಯೂಜಿಲೆಂಡ್, ಪಾಕಿಸ್ತಾನ, ವೆಸ್ಟ್ ಇಂಡೀಸ್ ಮಂಡಳಿಗಳಷ್ಟೇ ಬೆಂಬಲ ಸೂಚಿಸಿದ್ದವು. "ಟೆಸ್ಟ್ ಕ್ರಿಕೆಟ್ಅನ್ನು 2 ವಿಭಾಗ ಮಾಡಿದರೆ ಸಣ್ಣ ದೇಶಗಳಿಗೆ ಹೆಚ್ಚಿನ ನಷ್ಟವಾಗುತ್ತದೆ. ಇದಕ್ಕೆ ಬಿಸಿಸಿಐ ಅವಕಾಶ ಕೊಡುವುದಿಲ್ಲ' ಎಂದು ಆಗಿನ ಬಿಸಿಸಿಐ ಅಧ್ಯಕ್ಷ ಅನುರಾಗ್ ಠಾಕೂರ್ ಹೇಳಿದ್ದರು.
