ಚಿಕ್ಕಬಳ್ಳಾಪುರ: ಇತರ ತಾಲೂಕುಗಳಿಗೆ ಮಾದರಿಯಾಗಿ ಅಭಿವೃದ್ಧಿಯನ್ನು ಕಾಣಬೇಕಾಗಿರುವ ಇಲ್ಲಿನ ಸರ್ ಎಂ.ವಿ.ಜಿಲ್ಲಾ ಕ್ರೀಡಾಂಗಣವು, ವಿವಿಧ ಕಾರ್ಯಕ್ರಮಗಳ ಆಯೋಜನೆಯ ಸಂದರ್ಭದಲ್ಲಿ ಸಂಗ್ರಹವಾಗುವ ತ್ಯಾಜ್ಯದ ರಾಶಿಯಿಂದ ಅನೈರ್ಮಲ್ಯ ಸಮಸ್ಯೆಗೀಡಾಗುತ್ತಿದೆ.
ಹೌದು! ಕ್ರೀಡಾ ಚಟುವಟಿಕೆಗೆ ಮಾತ್ರ ಮೀಸಲಿಸಬೇಕಾಗಿರುವ ಕ್ರೀಡಾಂಗಣವು ರಾಷ್ಟ್ರೀಯ ಹಬ್ಬಗಳು, ರಾಜಕೀಯ ಸಮಾವೇಶ, ಉದ್ಯೋಗ ಮೇಳ, ವಿವಿಧ ಕಾರ್ಯಕ್ರಮಗಳಿಗೆ ಆಗಾಗ ಬಳಕೆಯಾಗುತ್ತಿರುತ್ತದೆ. ಇದೇ ವೇಳೆ ತಿಂಡಿ ತಿನಿಸು ಪೊಟ್ಟಣ, ಕುಡಿಯುವ ನೀರಿನ ಪಾಕೇಟ್, ಪ್ಲಾಸ್ಟಿಕ್ ತಟ್ಟೆ, ಲೋಟ ಸೇರಿದಂತೆ ನಾನಾ ತ್ಯಾಜ್ಯಗಳು ವಸ್ತುಗಳು ರಾಶಿಗಟ್ಟಲೇ ಬಿದ್ದಿರುತ್ತವೆ. ಇದನ್ನು ತ್ವರಿತವಾಗಿ ತೆರವುಗೊಳಿಸುವ ನಿಟ್ಟಿನಲ್ಲಿ, ಸಂಘಟಕರಿಗೆ ಸ್ವಚ್ಛತೆಯ ಬಗ್ಗೆ ಕಟ್ಟುನಿಟ್ಟಾಗಿ ಸೂಚಿಸುವುದರಲ್ಲಿ ಯುವಜನ ಸೇವಾ ಮತ್ತು ಕ್ರೀಡಾ ಇಲಾಖೆಯು ನಿರ್ಲಕ್ಷ್ಯ ತೋರಿದೆ. ಇದರಿಂದ ಕ್ರೀಡಾಪಟುಗಳು ತೊಂದರೆ ಅನುಭವಿಸಬೇಕಾಗಿದೆ.
