ಶೀಘ್ರದಲ್ಲಿ ಏಕದಿನಕ್ಕೆ ಧೋನಿ ವಿದಾಯ; ಕೋಚ್ ರವಿಶಾಸ್ತ್ರಿ ಮಾಹಿತಿ

ನವದೆಹಲಿ: ಎರಡು ಬಾರಿಯ ವಿಶ್ವಕಪ್ ವಿಜೇತ ಭಾರತ ತಂಡದ ನಾಯಕ ಎಂಎಸ್ ಧೋನಿ, ಶೀಘ್ರದಲ್ಲಿಯೇ ಏಕದಿನ ಕ್ರಿಕೆಟ್ ಜೀವನಕ್ಕೆ ವಿದಾಯ ಹೇಳಲಿದ್ದಾರೆ ಎಂದು ಟೀಮ್ ಇಂಡಿಯಾ ಕೋಚ್ ರವಿಶಾಸ್ತ್ರಿ ಹೇಳಿದ್ದಾರೆ. ಖಾಸಗಿ ಸಂವಾದ ಕಾರ್ಯಕ್ರಮವೊಂದರಲ್ಲಿ ಹಲವು ವಿಚಾರಗಳ ಬಗ್ಗೆ ಮಾತನಾಡಿದ ಅವರು, ಐಸಿಸಿಯ ಚತುರ್ದಿನ ಟೆಸ್ಟ್ ಪ್ರಸ್ತಾಪವನ್ನು ಮೂರ್ಖ ನಿರ್ಧಾರ ಎಂದು ಜರಿದರು.

‘ನಾನು ಧೋನಿಯೊಂದಿಗೆ ಮಾತನಾಡಿದ್ದೇನೆ. ಈಗಾಗಲೇ ಅವರು ಟೆಸ್ಟ್​ಗೆ ನಿವೃತ್ತಿ ಹೇಳಿದ್ದಾರೆ. ಶೀಘ್ರದಲ್ಲಿಯೇ ಏಕದಿನ ಮಾದರಿಗೂ ನಿವೃತ್ತಿ ಘೋಷಣೆ ಮಾಡುತ್ತಾರೆ. ಈಗಾಗಲೇ ಅವರು ಏಕದಿನ ಮಾದರಿಯ ಕ್ರಿಕೆಟ್​ನಲ್ಲಿ ತಮ್ಮ ಆಟವನ್ನು ಮುಗಿಸಿದ್ದಾರೆ’ ಎಂದರು. ಧೋನಿಯ ನಿರ್ಧಾರವನ್ನು ಎಲ್ಲರೂ ಸ್ವಾಗತಿಸಬೇಕು. ಒಂದಷ್ಟು ವರ್ಷಗಳ ಕಾಲ ನಿರಂತರವಾಗಿ ಅವರು ಎಲ್ಲ ಮಾದರಿಯ ಕ್ರಿಕೆಟ್​ನಲ್ಲೂ ಆಡಿದ್ದರು’ ಎಂದು ಹೇಳಿದ್ದಾರೆ.

ಈ ವಯಸ್ಸಿನಲ್ಲಿ ಅವರು ಒಂದೇ ಮಾದರಿಯಲ್ಲಿ ಆಡಲು ಬಯಸಿದ್ದಾರೆ. ಟಿ20 ಆಡಬೇಕು ಎನ್ನುವುದು ಅವರ ಬಯಕೆ ಆ ಮೂಲಕ ಯುವ ಆಟಗಾರರನ್ನು ಬೆಳೆಸಬೇಕು ಎನ್ನುವ ಆಸೆಯಲ್ಲಿದ್ದಾರೆ. ಐಪಿಎಲ್​ನಲ್ಲಿ ಆಡುವ ವೇಳೆ ತಮ್ಮ ದೇಹ ಕ್ರಿಕೆಟ್​ನ ಪರಿಸ್ಥಿತಿಗೆ ಹೇಗೆ ಒಗ್ಗಿಕೊಳ್ಳುತ್ತದೆ ಎನ್ನುವುದನ್ನು ಅವರು ಅಂದಾಜಿಸಬಹುದು. ಅವರು ಖಂಡಿತವಾಗಿ ಐಪಿಎಲ್​ನಲ್ಲಿ ಆಡುತ್ತಾರೆ. ಎಂದಿಗೂ ತಂಡಕ್ಕೆ ಭಾರವಾಗಿ ಇರುವುದನ್ನು ಅವರು ಬಯಸುವುದಿಲ್ಲ. ಐಪಿಎಲ್​ನಲ್ಲಿ ಅವರಿಂದ ಉತ್ತಮ ನಿರ್ವಹಣೆ ಬಂದರೆ, ಟಿ20 ವಿಶ್ವಕಪ್​ನ ತಂಡಕ್ಕೆ ಆಯ್ಕೆಯಾಗಬಹುದು ಎಂದು ಹೇಳಿದ್ದಾರೆ.

ಧೋನಿಯ ಅನುಭವವನ್ನು ನಾವು ಗಣನೆಗೆ ತೆಗೆದುಕೊಳ್ಳುತ್ತೇವೆ. 5-6ನೇ ಕ್ರಮಾಂಕದಲ್ಲಿ ಅವರು ಉತ್ತಮ ಬ್ಯಾಟ್ಸ್​ಮನ್. ಐಪಿಎಲ್​ನಲ್ಲಿ ಉತ್ತಮವಾಗಿ ಆಡಿದರೆ, ವಿಶ್ವಕಪ್ ತಂಡದ ರೇಸ್​ನಲ್ಲಿ ಇರಲಿದ್ದಾರೆ ಎಂದು ತಿಳಿಸಿದರು.