ಸರಣಿಯಲ್ಲಿ ಇದುವರೆಗೆ ಸರ್ವಾಧಿಕ 655 ರನ್ ಸಿಡಿಸಿರುವ ಎಡಗೈ ಆರಂಭಿಕ ಯಶಸ್ವಿ ಜೈಸ್ವಾಲ್, ಟೆಸ್ಟ್ ಸರಣಿಯೊಂದರಲ್ಲಿ 700 ರನ್ ಬಾರಿಸಿದ 2ನೇ ಭಾರತೀಯರೆನಿಸುವ ಅವಕಾಶ ಹೊಂದಿದ್ದಾರೆ. ಸುನೀಲ್ ಗಾವಸ್ಕರ್ ಇದುವರೆಗೆ ಈ ಸಾಧನೆ ಮಾಡಿದ ಏಕೈಕ ಭಾರತೀಯರಾಗಿದ್ದು, 2 ಬಾರಿ ಈ ಸಾಧನೆ ಮಾಡಿರುವುದು ವಿಶೇಷ. 1970ರಲ್ಲಿ ವಿಂಡೀಸ್ ವಿರುದ್ಧದ ಸರಣಿಯಲ್ಲಿ ಗಾವಸ್ಕರ್ 774 ರನ್ ಬಾರಿಸಿದ್ದು ಭಾರತೀಯ ದಾಖಲೆಯಾಗಿದೆ. ನಂತರ 1978-79ರಲ್ಲಿ ಮತ್ತೆ ವಿಂಡೀಸ್ ವಿರುದ್ಧವೇ 732 ರನ್ ಸಿಡಿಸಿದ್ದರು. ಧರ್ಮಶಾಲಾದಲ್ಲಿ 120 ರನ್ ಬಾರಿಸಿದರೆ ಜೈಸ್ವಾಲ್, ಗಾವಸ್ಕರ್ರನ್ನೂ ಹಿಂದಿಕ್ಕಿ ಭಾರತ ಪರ ಸರಣಿಯೊಂದರಲ್ಲಿ ಗರಿಷ್ಠ ರನ್ ಬಾರಿಸಿದ ಬ್ಯಾಟರ್ ಎನಿಸಲಿದ್ದಾರೆ. ಅಲ್ಲದೆ, 135 ರನ್ ಗಳಿಸಿದರೆ, ಸರಣಿಯೊಂದರಲ್ಲಿ 800 ರನ್ ಬಾರಿಸಿದ ಮೊದಲ ಭಾರತೀಯ ಎನಿಸಲಿದ್ದಾರೆ. ವಿರಾಟ್ ಕೊಹ್ಲಿ ಇಂಗ್ಲೆಂಡ್ ವಿರುದ್ಧದ ಸರಣಿಯೊಂದರಲ್ಲಿ ಸರ್ವಾಧಿಕ 655 ರನ್ ಗಳಿಸಿದ ಸಾಧನೆಯನ್ನು ಜೈಸ್ವಾಲ್ ಈಗಾಗಲೆ ಸರಿಗಟ್ಟಿದ್ದಾರೆ. ಜೈಸ್ವಾಲ್ 125 ರನ್ ಗಳಿಸಿದರೆ ಭಾರತದಲ್ಲಿನ ಟೆಸ್ಟ್ ಸರಣಿಯೊಂದರಲ್ಲಿ ಸರ್ವಾಧಿಕ 779 ರನ್ ಗಳಿಸಿದ ವೆಸ್ಟ್ ಇಂಡೀಸ್ನ ಎವರ್ಟನ್ ವೀಕ್ಸ್ ಅವರ (1948-49) 75 ವರ್ಷ ಹಿಂದಿನ ದಾಖಲೆಯನ್ನೂ ಮುರಿಯಬಹುದಾಗಿದೆ.
