ಪಂಜಾಬ್ ವಿರುದ್ಧ ನಾಟಕೀಯ ಕುಸಿತ ಕಂಡು ಸಾಧಾರಣ ಮೊತ್ತವನ್ನು ಬೆನ್ನಟ್ಟಲಾಗದೆ ಎಡವಿರುವ ಡೇವಿಡ್ ವಾರ್ನರ್ ಪಡೆ ಉಳಿದ ಮೂರೂ ಪಂದ್ಯಗಳಲ್ಲಿ ಗೆದ್ದರೂ ಪ್ಲೇಆಫ್ ಸ್ಥಾನ ಖಚಿತವಿಲ್ಲ. ರನ್ರೇಟ್ ಲೆಕ್ಕಾಚಾರದಲ್ಲಿ ಮೇಲುಗೈ ಸಾಧಿಸುವ ಜತೆಗೆ ಇತರ ಪಂದ್ಯಗಳ ಫಲಿತಾಂಶವೂ ಪೂರಕವಾಗಿ ಬಂದರಷ್ಟೇ ಸನ್ರೈಸರ್ಸ್ಗೆ ಪ್ಲೇಆಫ್ ಅವಕಾಶವಿದೆ. ಒಂದು ವೇಳೆ ಸನ್ರೈಸರ್ಸ್ ಸೋತರೆ, ಇನ್ನೆರಡು ಪಂದ್ಯ ಬಾಕಿ ಇರುವಂತೆಯೇ ಟೂರ್ನಿಯಿಂದ ಹೊರಬೀಳಲಿದೆ. ಕಳೆದ ತಿಂಗಳು ನಡೆದಿದ್ದ ಉಭಯ ತಂಡಗಳ ಮೊದಲ ಮುಖಾಮುಖಿಯಲ್ಲಿ ಸನ್ರೈಸರ್ಸ್ ತಂಡ 15 ರನ್ಗಳಿಂದ ಗೆಲುವು ದಾಖಲಿಸಿತ್ತು. ಆ ಗೆಲುವು ಈಗ ಸನ್ರೈಸರ್ಸ್ಗೆ ಸ್ಫೂರ್ತಿಯಾಗಿದ್ದರೆ, ಡೆಲ್ಲಿ ತಂಡ ಸೇಡು ತೀರಿಸಿಕೊಳ್ಳುವ ಹಂಬಲದಲ್ಲಿದೆ.
