ಎನ್​ಸಿಎಯಲ್ಲಿ ವೈದ್ಯಕೀಯ ಸಮಿತಿ ರಚನೆಗೆ ನಿರ್ಧಾರ

ನವದೆಹಲಿ: ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿಯನ್ನು (ಎನ್​ಸಿಎ) ಹೊಸದಾಗಿ ನವೀಕರಿಸುವ ಯೋಜನೆಯ ಭಾಗವಾಗಿ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ), ವೈದ್ಯಕೀಯ ಸಮಿತಿ ಹಾಗು ಸಾಮಾಜಿಕ ಜಾಲತಾಣ ವಿಭಾಗವನ್ನು ರಚಿಸಲು ಮುಂದಾಗಿದೆ. ಆಟಗಾರರ ಇಂಜುರಿ ಮ್ಯಾನೇಜ್​ವೆುಂಟ್​ನಲ್ಲಿ ಪ್ರತಿ ಬಾರಿಯೂ ಎನ್​ಸಿಎ ಟೀಕೆಗೆ ಒಳಗಾಗುತ್ತಿದ್ದು, ಬಿಸಿಸಿಐನ ವೈದ್ಯಕೀಯ ಸಮಿತಿಯ ಸಹಾಯದೊಂದಿಗೆ ಎನ್​ಸಿಎಯಲ್ಲಿ ಹೊಸ ಸಮಿತಿ ರಚಿಸುವ ಯೋಜನೆಗೆ ಮುಂದಾಗಿದೆ.

ಎನ್​ಸಿಎಯ ಇತ್ತೀಚಿನ ಸಭೆಯಲ್ಲಿ ವೈದ್ಯಕೀಯ ಸಮಿತಿಯ ರಚನೆಯ ಬಗ್ಗೆ ಚರ್ಚೆ ಮಾಡಲಾಗಿದೆ. ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ, ಎನ್​ಸಿಎ ಮುಖ್ಯಸ್ಥ ರಾಹುಲ್ ದ್ರಾವಿಡ್​ರೊಂದಿಗೆ ಬಿಸಿಸಿಐನ ಎಲ್ಲ ಅಧಿಕಾರಿಗಳು ಈ ಸಭೆಯಲ್ಲಿ ಭಾಗವಹಿಸಿದ್ದರು.

ಟೆಸ್ಟ್ ತಂಡದ ವಿಕೆಟ್ ಕೀಪರ್ ವೃದ್ಧಿಮಾನ್ ಸಾಹ ಹಾಗೂ ವೇಗಿ ಭುವನೇಶ್ವರ್ ಕುಮಾರ್ ಅವರ ಇಂಜುರಿ ಮ್ಯಾನೇಜ್​ವೆುಂಟ್​ನಲ್ಲಿ ಎನ್​ಸಿಎ ತೀವ್ರ ಮಟ್ಟದ ವೈಫಲ್ಯ ಕಂಡಿದ್ದು ವಿವಾದಕ್ಕೆ ಕಾರಣವಾಗಿತ್ತು. ಆ ಕಾರಣದಿಂದಾಗಿ ಹೊಸ ಸಮಿತಿ ರಚನೆಯ ಪ್ರಸ್ತಾಪವನ್ನು ಬಿಸಿಸಿಐ ಮುಂದಿಟ್ಟಿದೆ. ಎನ್​ಸಿಎಯಲ್ಲಿನ ಪುನಶ್ಚೇತನ ಶಿಬಿರದ ಬಗ್ಗೆ ವಿಶ್ವಾಸ ಹೊಂದಿಲ್ಲದ ಕಾರಣಕ್ಕಾಗಿ ಗಾಯಾಳುವಾಗಿದ್ದ ಅಗ್ರ ವೇಗಿ ಜಸ್​ಪ್ರೀತ್ ಬುಮ್ರಾ ಹಾಗೂ ಆಲ್ರೌಂಡರ್ ಹಾರ್ದಿಕ್ ಪಾಂಡ್ಯ ಖಾಸಗಿಯಾಗಿ ಪುನಶ್ಚೇತನ ಶಿಬಿರದಲ್ಲಿ ಭಾಗಿಯಾಗಿದ್ದರು. ಲಂಡನ್​ನ ಪ್ರಖ್ಯಾತ ಸ್ಪೋರ್ಟ್ಸ್ ಮೆಡಿಸಿನ್ ಕ್ಲಿನಿಕ್ ಫೋರ್ಟಿಯಸ್ ಜತೆ ಈ ಕುರಿತಾಗಿ ಬಿಸಿಸಿಐ ಮಾತನಾಡಲಿದ್ದು, ಎನ್​ಸಿಎಯಲ್ಲಿ ತನ್ನ ಸಮಿತಿಯನ್ನು ರಚಿಸುವ ಬಗ್ಗೆ ಕೇಳಿಕೊಳ್ಳಲಿದೆ ಎಂದು ಬಿಸಿಸಿಐ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಅದರೊಂದಿಗೆ ವೇಗದ ಬೌಲಿಂಗ್ ಕೋಚ್ ಸ್ಥಾನ ಬಹಳ ದೀರ್ಘ ಸಮಯದಿಂದ ಖಾಲಿ ಇದ್ದು, ಇದನ್ನು ಶೀಘ್ರದಲ್ಲಿಯೇ ಭರ್ತಿ ಮಾಡಲಾಗುತ್ತದೆ ಎಂದು ತಿಳಿಸಿದ್ದಾರೆ. ಎನ್​ಸಿಎಯಲ್ಲಿ ಅವರು ವೇಗದ ಬೌಲಿಂಗ್ ವಿಭಾಗದ ಸಂಪೂರ್ಣ ಜವಾಬ್ದಾರಿಯನ್ನು ನೋಡಿಕೊಳ್ಳಲಿದ್ದಾರೆ. ಅದಲ್ಲದೆ, ಬೆಂಗಳೂರು ಮೂಲಕದ ಕಂಪನಿಯ ಜತೆಗೆ ಕ್ರೀಡಾ ಪೌಷ್ಠಿಕಾಂಶದ ಕುರಿತಾಗಿ ಸೇವೆಯನ್ನು ಪಡೆದುಕೊಳ್ಳಲಿದ್ದೇವೆ ಎಂದು ವಿವರಿಸಿದ್ದಾರೆ. -ಪಿಟಿಐ

ಸಾಮಾಜಿಕ ಜಾಲತಾಣದ ಮ್ಯಾನೇಜರ್

ಎನ್​ಸಿಎಯಲ್ಲಾದ ಇತ್ತೀಚಿನ ಬೆಳವಣಿಗೆಗಳು ಅಕಾಡೆಮಿಗೆ ಹಿನ್ನಡೆ ತಂದಿವೆ. ಅದಲ್ಲದೆ, ಎನ್​ಸಿಎಯಲ್ಲಿನ ಬೆಳವಣಿಗೆಗಳ ಬಗ್ಗೆ ಮಾಹಿತಿ ನೀಡಲು ಅಲ್ಲಿ ಯಾವುದೇ ವ್ಯಕ್ತಿಗಳಿಲ್ಲ. ಇದನ್ನು ಅರಿತಿರುವ ಬಿಸಿಸಿಐ, ಎನ್​ಸಿಎಯಲ್ಲಿ ಏನಾಗುತ್ತಿದೆ ಎನ್ನುವ ಮಾಹಿತಿಗಳನ್ನು ನೀಡಲು ಸಾಮಾಜಿಕ ಜಾಲತಾಣದ ಮ್ಯಾನೇಜರ್​ಅನ್ನು ನೇಮಕ ಮಾಡುವ ಯೋಚನೆ ಮಾಡಿದೆ. ರಾಷ್ಟ್ರೀಯ ತಂಡದ ಆಟಗಾರರ ಕುರಿತಾಗಿ ಹಾಗೂ ಅವರ ಇಂಜುರಿಯ ಕುರಿತಾಗಿ ಇಲ್ಲಿ ಹೆಚ್ಚಿನ ಮಾಹಿತಿ ನೀಡಲಾಗುತ್ತದೆ. ಅದರೊಂದಿಗೆ ಡೇಟಾ ಅನಾಲಿಟಿಕ್ಸ್ ಸ್ಥಾನವನ್ನು ಭರ್ತಿ ಮಾಡಲಾಗುತ್ತದೆ.