ಮತ್ತೊಮ್ಮೆ ಮುಗ್ಗರಿಸಿದ ಸಿಎಸ್​ಕೆ! ಫಲಿಸಲಿಲ್ಲ ಧೋನಿ, ಕಾನ್ವೆ ಹೋರಾಟ | CSK vs PBKS

CSK vs PBKS: ಇಂದು (ಏ.08) ಚಂಡೀಗಢ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಸಿಎಸ್​ಕೆ ಮತ್ತು ಪಂಜಾಬ್ ಕಿಂಗ್ಸ್ ನಡುವಿನ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಪಂಜಾಬ್​, 20 ಓವರ್​ ಅಂತ್ಯಕ್ಕೆ 6 ವಿಕೆಟ್ ಕಳೆದುಕೊಂಡು ಬರೋಬ್ಬರಿ 219 ರನ್​ ಕಲೆಹಾಕುವಲ್ಲಿ ಯಶಸ್ವಿಯಾಯಿತು. ಈ ಗುರಿಯನ್ನು ಬೆನ್ನಟ್ಟಿದ ಸಿಎಸ್​ಕೆ ಉತ್ತಮ ಆರಂಭದ ಜತೆಗೆ ಅತ್ಯುತ್ತಮ ಇನ್ನಿಂಗ್ಸ್ ನೀಡಿದರೂ ಗೆಲುವನ್ನು ದಕ್ಕಿಸಿಕೊಳ್ಳುವಲ್ಲಿ ಮತ್ತೊಮ್ಮೆ ಎಡವಿತು.

21 ರನ್​ಗಳ ಸೋಲು

ರಚಿನ್ ರವೀಂದ್ರ ಮತ್ತು ಡಿವಾನ್​ ಕಾನ್ವೆ ಉತ್ತಮ ಆರಂಭ ನೀಡುವ ಮೂಲಕ ಪವರ್​ಪ್ಲೇನಲ್ಲಿ ಹೆಚ್ಚುವರಿ ರನ್​ ಕಲೆಹಾಕಿದರು. ಆದ್ರೆ, ಹೆಚ್ಚು ಹೊತ್ತು ಕ್ರೀಸ್​ಗೆ ಅಂಟದ ರಚಿನ್, ವಿಕೆಟ್​ ಕಳೆದುಕೊಂಡರು. ರುತುರಾಜ್​ ಗಾಯಕ್ವಾಡ್​, ಶಿವಂ ದುಬೆ ನಂತರ ಕಣಕ್ಕಿಳಿದ ಮಹೇಂದ್ರ ಸಿಂಗ್ ಧೋನಿ, 12 ಎಸೆತಗಳಲ್ಲಿ 27 ರನ್ ಸಿಡಿಸುವ ಮೂಲಕ ಗೆಲುವಿನ ಭರವಸೆ ನೀಡಿದರು. ಆದರೆ, ಕೊನೆ ಕ್ಷಣಗಳಲ್ಲಿ ಚಹಲ್​ಗೆ ಕ್ಯಾಚ್ ನೀಡುವ ಮೂಲಕ ಸೋಲು ಖಚಿತ ಎಂಬುದನ್ನು ಹೇಳಿ ಹೋದರು.

ಇದು ಸಿಎಸ್​ಕೆ ಅಭಿಮಾನಿ ಬಳಗಕ್ಕೆ ಭಾರೀ ನಿರಾಶೆ ಮೂಡಿಸಿತು. ಸತತವಾಗಿ ನಾಲ್ಕು ಪಂದ್ಯಗಳಲ್ಲಿ ಸೋಲುಂಡ ಚೆನ್ನೈ ಪಡೆಗೆ ಗೆಲುವಿನ ಹಪಾಹಪಿ ಶುರುವಾಗಿದೆ. ಆರಂಭದಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧ ಗೆದ್ದಿದ್ದು ಬಿಟ್ಟರೆ, ಉಳಿದೆಲ್ಲ ಪಂದ್ಯಗಳಲ್ಲಿಯೂ ಭಾರೀ ಮುಖಭಂಗವನ್ನು ಅನುಭವಿಸಿದೆ.