ಶ್ರೀಲಂಕಾ ವಿರುದ್ಧ ಭಾರತಕ್ಕೆ 165 ರನ್ ಜಯ: ಗಾಲೆಯಲ್ಲಿ ಭರ್ಜರಿ ಪ್ರದರ್ಶನ ಬೆನ್ನಲ್ಲೇ ಹೊರಬಿತ್ತು ಹೊಸ WTC ಅಂಕಪಟ್ಟಿ

WTC Points Table: ಗಾಲೆಯಲ್ಲಿ ಶ್ರೀಲಂಕಾವನ್ನು 165 ರನ್‌ಗಳಿಂದ ಮಣಿಸಿದ ಟೀಮ್​ ಇಂಡಿಯಾ, ವಿಶ್ವ ಟೆಸ್ಟ್‌ ಚಾಂಪಿಯನ್‌ಶಿಪ್‌ (WTC) ಅಂಕಪಟ್ಟಿಯಲ್ಲಿ ತನ್ನ ಸ್ಥಿತಿಯನ್ನು ಕೊಂಚ ಬಲಪಡಿಸಿಕೊಂಡಿದೆ. ಈ ಗೆಲುವಿನೊಂದಿಗೆ ಭಾರತದ ಪಾಯಿಂಟ್ಸ್‌ ಶೇಕಡವಾರು 48.15ರಿಂದ 53.33ಕ್ಕೆ ಏರಿದೆ. ಆದರೆ, ಪಾಯಿಂಟ್ಸ್​ ಟೇಬಲ್​ನಲ್ಲಿ ಭಾರತ ಇನ್ನೂ 5ನೇ ಸ್ಥಾನದಲ್ಲೇ ಉಳಿದಿರುವುದು ಇಲ್ಲಿ ಗಮನಾರ್ಹ.

ಮೊದಲ ಇನ್ನಿಂಗ್ಸ್‌ನಲ್ಲಿ 462 ರನ್‌ ಗಳಿಸಿದ ಭಾರತ, ಶ್ರೀಲಂಕಾ ಎದುರು ಬೃಹತ್ ಮೊತ್ತ ಕಲೆಹಾಕಿತು. ದೇವದತ್ ಪಡಿಕ್ಕಲ್‌ 167 ರನ್‌ ಹಾಗೂ ಕೆ.ಎಲ್. ರಾಹುಲ್‌ ಸಿಡಿಸಿದ 82 ರನ್‌ ತಂಡದ ಒಟ್ಟು ಮೊತ್ತಕ್ಕೆ ದೊಡ್ಡ ಕೊಡುಗೆ ನೀಡಿತು. ಇದಕ್ಕೆ ಉತ್ತರವಾಗಿ ಶ್ರೀಲಂಕಾ 284 ರನ್‌ ಗಳಿಸಿತು. ಹೀಗಾಗಿ ಭಾರತಕ್ಕೆ ಮೊದಲ ಇನ್ನಿಂಗ್ಸ್‌ನಲ್ಲಿ 178 ರನ್‌ಗಳ ಮುನ್ನಡೆ ಸಿಕ್ಕಿತು. ಇನ್ನು, ದ್ವಿತೀಯ ಇನ್ನಿಂಗ್ಸ್‌ನಲ್ಲಿ ರಿಷಭ್ ಪಂತ್‌ ಬಾರಿಸಿದ ವೇಗದ 66 ರನ್‌ ಸೇರಿ ಭಾರತ 193 ರನ್‌ ಗಳಿಸಿ ಶ್ರೀಲಂಕಾಗೆ 372 ರನ್‌ಗಳ ಬೃಹತ್​ ಗುರಿಯನ್ನು ನೀಡಿತು.

ಈ ಗುರಿ ಬೆನ್ನತ್ತಿದ ಶ್ರೀಲಂಕಾ ಬ್ಯಾಟಿಂಗ್‌ ಪಡೆಗೆ ಭಾರತದ ಎಡಗೈ ಸ್ಪಿನ್ನರ್‌ ಮಾನವ್ ಸುತ್ತಾರ್‌ ಬಿಗ್ ಶಾಕ್​ ನೀಡಿದರು. ಅಂತಿಮ ಇನ್ನಿಂಗ್ಸ್‌ನಲ್ಲಿ 6 ವಿಕೆಟ್‌ ಕಬಳಿಸಿದ ಸುತ್ತಾರ್‌, ಪಂದ್ಯದಲ್ಲಿ ಒಟ್ಟು 10 ವಿಕೆಟ್‌ ಪಡೆದು ಟೀಮ್ ಇಂಡಿಯಾದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದರು. ಶ್ರೀಲಂಕಾ 206 ರನ್‌ಗಳಿಗೆ ಆಲೌಟ್‌ ಆಗಿ 165 ರನ್‌ಗಳಿಂದ ಹೀನಾಯ ಸೋಲು ಅನುಭವಿಸಿತು.

ಗೆಲುವಿನ ಬಳಿಕವೂ ಭಾರತ 5ನೇ ಸ್ಥಾನದಲ್ಲೇ ಇದ್ದರೂ, ಶೇ.53.33ರಷ್ಟು ಅಂಕಗಳ ಮೂಲಕ ಫೈನಲ್‌ ರೇಸ್‌ನಲ್ಲಿ ತನ್ನ ಅವಕಾಶವನ್ನು ಇನ್ನೂ ಜೀವಂತವಾಗಿ ಇರಿಸಿಕೊಂಡಿದೆ. ಶ್ರೀಲಂಕಾ ಶೇ.33.33 ಪಿಸಿಟಿಯೊಂದಿಗೆ 6ನೇ ಸ್ಥಾನದಲ್ಲಿದ್ದರೆ, ಆಸ್ಟ್ರೇಲಿಯಾ ಶೇ.77.78ಯಿಂದ ಅಗ್ರಸ್ಥಾನದಲ್ಲಿದೆ. ಇನ್ನು, ಬಾಂಗ್ಲಾದೇಶ ಭಾರತಕ್ಕಿಂತ ಒಂದು ಸ್ಥಾನ ಮೇಲಿರುವುದರಿಂದ ಸ್ಪರ್ಧೆ ಇನ್ನಷ್ಟು ಕಠಿಣ ಎಂಬುದಂತು ಸ್ಪಷ್ಟ,(ಏಜೆನ್ಸೀಸ್).