ವಿಂಬಲ್ಡನ್ ಗ್ರಾಂಡ್ ಸ್ಲಾಂ: ಈ ಬಾರಿಯ ಒಟ್ಟು ಬಹುಮಾನ ಮೊತ್ತದಲ್ಲಿ ಏರಿಕೆ, ಸೆರೇನಾ ಪುನರಾಗಮನ

ಸ್ಪೇನ್‌ನ ಯುವ ತಾರೆ ಕಾರ್ಲೋಸ್ ಅಲ್ಕರಾಜ್ ಮಣಿಕಟ್ಟಿನ ಗಾಯದ ಸಮಸ್ಯೆಯಿಂದ ಸತತ 2ನೇ ಗ್ರಾಂಡ್ ಸ್ಲಾಂ ತಪ್ಪಿಸಿಕೊಳ್ಳಲಿದ್ದಾರೆ. ಅಲ್ಕರಾಜ್ ಗೈರು ಹಾಗೂ ವೃತ್ತಿಜೀವನದ ಸಂಧ್ಯಾಕಾಲದಲ್ಲಿರುವ 24 ಗ್ರಾಂಡ್ ಸ್ಲಾಂ ವಿಜೇತ ಜೋಕೊವಿಕ್ ಫಿಟ್ನೆಸ್ ಸಮಸ್ಯೆಯ ನಡುವೆ ಇಟಲಿಯ ಸಿನ್ನರ್ ಪ್ರಶಸ್ತಿ ಉಳಿಸಿಕೊಳ್ಳುವ ನಿರೀಕ್ಷೆಯಲ್ಲಿದ್ದಾರೆ. ಕಳೆದ ಫ್ರೆಂಚ್ ಓಪನ್‌ನ ಎರಡನೇ ಸುತ್ತಿನಲ್ಲಿ ಎಡವಿದ್ದ ಸಿನ್ನರ್ ಆರಂಭಿಕ ಸುತ್ತಿನಲ್ಲಿ ಸೆರ್ಬಿಯಾದ ಮಿಯೋಮಿರ್ ಕೆಕ್ಮನೋವಿಕ್ ಸವಾಲು ಎದುರಿಸಲಿದ್ದಾರೆ.

24 ವರ್ಷದ ಸಿನ್ನರ್‌ಗೆ ಕ್ವಾರ್ಟರ್‌ ಫೈನಲ್ ನಲ್‌ನಲ್ಲಿ ರಷ್ಯಾದ ಡೇನಿಲ್ ಮೆಡ್ವೆಡೆವ್ ಎದುರಾಗುವ ಸಾಧ್ಯತೆಗಳಿವೆ. ಫ್ರೆಂಚ್ ಓಪನ್ ಪುರುಷರ ಸಿಂಗಲ್ಸ್ ಚಾಂಪಿಯನ್ 2ನೇ ಶ್ರೇಯಾಂಕಿತ ಜ್ವೆರೇವ್ ವಿಂಬಲ್ಡನ್‌ನಲ್ಲಿ ಇದುವರೆಗೆ ಕ್ವಾರ್ಟರ್‌ ಫೈನಲ್ ಹಂತ ದಾಟಿಲ್ಲ. ಆರಂಭಿಕ ಸುತ್ತಿನಲ್ಲಿ ಅವರು ಬೆಲ್ಜಿಯಂನ ಅಲೆಕ್ಸಾಂಡರ್ ಬಾಕ್ಲಾಕ್ಸ್ ವಿರುದ್ಧ ಆಡಲಿದ್ದಾರೆ. ಅಮೆರಿಕದ ಟೇಲರ್ ಫ್ರಿಟ್ಜ್, ಬೆನ್ ಶೆಲ್ಟನ್, ಫ್ರಾನ್ಸಿಸ್ ಟಿಯಾಫೊ ಅವರಿಂದ ನಿಕಟ ಪೈಪೋಟಿಯ ನಿರೀಕ್ಷೆ ಇದೆ.

ಭಾರತದ ಯೂಕಿ ಭಾಂಬ್ರಿ ಪುರುಷರ ಡಬಲ್ಸ್‌ನಲ್ಲಿ ಆಸ್ಟ್ರೇಲಿಯಾದ ಮೈಕೆಲ್ ವೀನಸ್ ಜತೆಗೂಡಿ ಆಡಲಿದ್ದು, ಎನ್. ಶ್ರೀರಾಮ್ ಬಾಲಾಜಿ ಬ್ರೆಜಿಲ್‌ನ ಮಾರ್ಸೆಲೊ ಡೆಮೊಲಿನರ್ ಜತೆಯಾಗಿ ಭಾರತದ ಸವಾಲು ಮುನ್ನಡೆಸಲಿದ್ದಾರೆ. ಸಿಂಗಲ್ಸ್‌ನಲ್ಲಿ ಭಾರತದ ಯಾವ ಆಟಗಾರರೂ ಪ್ರಧಾನ ಸುತ್ತಿಗೆ ಅರ್ಹತೆ ಪಡೆದಿಲ್ಲ.

ಈ ಬಾರಿಯೂ ಮಹಿಳಾ ಸಿಂಗಲ್ಸ್ ವಿಭಾಗದಲ್ಲಿ ಮುಕ್ತ ಸ್ಪರ್ಧೆಯ ನಿರೀಕ್ಷೆಯಿದ್ದು, ಏಳು ಬಾರಿಯ ಚಾಂಪಿಯನ್ ಸೆರೇನಾ ವಿಲಿಯ್ಸಮ್ಸ್ ಪುನರಾಗಮನ ಪ್ರಮುಖ ಆಕರ್ಷಣೆ ಎನಿಸಿದೆ. 2015-16ರಲ್ಲಿ ಸತತವಾಗಿ ಪ್ರಶಸ್ತಿ ಜಯಿಸಿದ್ದ ವೈಲ್ಡ್ ಕಾರ್ಡ್ ಎಂಟ್ರಿ ಸೆರೇನಾ ವಿಲಿಯಮ್ಸ್ ಮೊದಲ ಸುತ್ತಿನಲ್ಲಿ ಆಸ್ಟ್ರೇಲಿಯಾದ 20 ವರ್ಷದ ಮಿಯಾ ಜಾಯಿಂಟ್ ವಿರುದ್ಧ ಅಭಿಯಾನ ಆರಂಭಿಸಲಿದ್ದಾರೆ.

6 ಗ್ರಾಂಡ್ ಸ್ಲಾಂ ವಿಜೇತೆ ಇಗಾ ಸ್ವಿಯಾಟೆಕ್, ಅಮೆರಿಕದ ಟೇಲರ್ ಟೌನ್‌ಸೆಂಡ್ ಎದುರು ಪ್ರಶಸ್ತಿ ಉಳಿಸಿಕೊಳ್ಳುವ ಅಭಿಯಾನ ಆರಂಭಿಸಲಿದ್ದಾರೆ. ವಿಶ್ವ ನಂ.1 ಅರಿನಾ ಸಬಲೆಂಕಾ ಚೊಚ್ಚಲ ವಿಂಬಲ್ಡನ್ ಪ್ರಶಸ್ತಿಯ ನಿರೀಕ್ಷೆಯಲ್ಲಿದ್ದಾರೆ. ಜತೆಗೆ ಅಮೆರಿಕದ ಕೋಕೋ ಗೌಫ್, ಜಾಸ್ಮಿನ್ ಪಾವೊಲಿನಿ, ಎಲೆನಾ ರೈಬಕಿನಾ, ಫ್ರೆಂಚ್ ಓಪನ್ ಹಾಲಿ ಚಾಂಪಿಯನ್ ಮಿರ‌್ರಾ ಆಂಡ್ರೀವಾ, ಯೂಕ್ರೇನ್‌ನ ಎಲಿನಾ ಸ್ವಿಟೋಲಿನಾ ಮತ್ತು ಮಾರ್ಟಾ ಕೊಸ್ಟ್ಯುಕ್, ಕಳೆದ ವರ್ಷದ ಫೈನಲಿಸ್ಟ್ ಅಮಂಡಾ ಅನಿಸಿಮೊವಾ ನಿಕಟ ಪೈಪೋಟಿ ಒಡ್ಡುವ ನಿರೀಕ್ಷೆ ಇದೆ.

39 ವರ್ಷದ ಜೋಕೊವಿಕ್ ದಾಖಲೆಯ 25ನೇ ಗ್ರಾಂಡ್ ಪ್ರಶಸ್ತಿ ಜಯಿಸುಲ್ಲೂ ಟೂರ್ನಿ ಮತ್ತೊಂದು ಅವಕಾಶ ಎನಿಸಿದೆ. ಆದರೆ, ಯುವ ಆಟಗಾರರ ಸವಾಲನ್ನು ಎದುರಿಸುವ ಕಠಿಣ ಪರೀಕ್ಷೆಗೆ ಒಳಗಾಗಲಿದ್ದಾರೆ. 7ನೇ ಶ್ರೇಯಾಂಕಿತ ಜೋಕೊವಿಕ್, ವಿಶ್ವ ನಂ.99 ಚೀನಾದ ವು ಯಿಬಿಂಗ್ ವಿರುದ್ಧ ಆರಂಭಿಕ ಪಂದ್ಯ ಆಡಲಿದ್ದಾರೆ. ಎರಡನೇ ಸುತ್ತಿನಲ್ಲಿ ಸ್ಟೆಫಾನೋಸ್ ಸಿಸಿಪಾಸ್ ಹಾಗೂ 4ನೇ ಸುತ್ತಿನಲ್ಲಿ ಜೊವೊ ಫೋನ್ಸೆಕಾರನ್ನು ಎದುರಿಸುವ ಸಾಧ್ಯತೆ ಇದೆ.

ಫ್ರೆಂಚ್ ಓಪನ್‌ನಲ್ಲಿ ಫೋನ್ಸೆಕಾ ಎದುರು 3ನೇ ಸುತ್ತಿನಲ್ಲಿ ಜೋಕೊವಿಕ್ ಪರಾಭವಗೊಂಡಿದ್ದರು. 21ನೇ ಬಾರಿ ವಿಂಬಲ್ಡನ್ ಆಡಲಿರುವ ಜೋಕೊವಿಕ್ 2022ರಲ್ಲಿ ಕೊನೆಯದಾಗಿ ಮೇಜರ್ ಟೂರ್ನಿ ಗೆದ್ದಿದ್ದು, ಗ್ರಾಸ್ ಕೋರ್ಟ್‌ನಲ್ಲಿ ಈ ಬಾರಿ ಸೆಮೀಸ್‌ಗೇರಿದರೆ ಯಾನಿಕ್ ಸಿನ್ನರ್ ಎದುರಾಗುವ ಸಾಧ್ಯತೆಗಳಿವೆ.