ಟೀಮ್ ಇಂಡಿಯಾದ ಡ್ರೆಸ್ಸಿಂಗ್ ರೂಮ್‌ನಿಂದ ವೈಭವ್ ಹೊರಕ್ಕೆ!.. ವಂಡರ್ ಕಿಡ್‌ಗೆ ಜಾರಿಯಾದ ಆ ಸ್ಪೆಷಲ್ ರೂಲ್ಸ್ ಏನು ಗೊತ್ತಾ..? | Vaibhav Sooryavanshi

ಒಂದು ವೇಳೆ ಈ ಸರಣಿಯಲ್ಲಿ ವೈಭವ್​ ಕಣಕ್ಕಿಳಿದರೆ, ಭಾರತದ ಪರ ಅತಿ ಕಿರಿಯ ವಯಸ್ಸಿನಲ್ಲಿ ಅಂತಾರಾಷ್ಟ್ರೀಯ ಪಾದಾರ್ಪಣೆ ಮಾಡಿದ ಕ್ರಿಕೆಟ್​ ದೇವರು ಸಚಿನ್ ತೆಂಡೂಲ್ಕರ್ ಅವರ ಸಾರ್ವಕಾಲಿಕ ದಾಖಲೆಯನ್ನು ಮುರಿಯಲಿದ್ದಾರೆ. ಇತ್ತೀಚಿನ ಐಪಿಎಲ್ ಹಾಗೂ ಕಿರಿಯರ ಕ್ರಿಕೆಟ್‌ನಲ್ಲಿ ಅಬ್ಬರದ ಬ್ಯಾಟಿಂಗ್ ಮೂಲಕ ಎಲ್ಲರ ಗಮನ ಸೆಳೆದಿರುವ ವೈಭವ್ ಸೂರ್ಯವಂಶಿ, ಸದ್ಯ ಭಾರತೀಯ ಕ್ರಿಕೆಟ್‌ನ ಭವಿಷ್ಯದ ತಾರೆ ಎಂದೇ ಗುರುತಿಸಲ್ಪಡುತ್ತಿದ್ದಾರೆ. ಆದರೆ, ಕಿರಿಯ ವಯಸ್ಸಿನ ಕಾರಣಕ್ಕಾಗಿ ಈ ಪ್ರವಾಸದಲ್ಲಿ ಅವರಿಗೆ ಕೆಲವು ಕಟ್ಟುನಿಟ್ಟಿನ ನಿಯಮಗಳನ್ನು ಜಾರಿಗೊಳಿಸಲಾಗಿದೆ.

ಕ್ರಿಕ್‌ಇನ್ಫೋ ವರದಿಯ ಪ್ರಕಾರ, ಇಂಗ್ಲೆಂಡ್ ವಿರುದ್ಧದ ಟಿ20 ಸರಣಿಯ ವೇಳೆ ವೈಭವ್ ಸೂರ್ಯವಂಶಿಗೆ ಪ್ರತ್ಯೇಕ ಡ್ರೆಸ್ಸಿಂಗ್ ರೂಮ್ ವ್ಯವಸ್ಥೆ ಮಾಡಲಾಗುತ್ತಿದೆ. ಪಂದ್ಯದ ವೇಳೆ ಹಾಗೂ ತಂಡದ ಚರ್ಚೆಗಳ ಸಮಯದಲ್ಲಿ ಅವರು ಭಾರತ ತಂಡದ ಮುಖ್ಯ ಡ್ರೆಸ್ಸಿಂಗ್ ರೂಮ್‌ಗೆ ಬರಲು ಅವಕಾಶ ಇರಲಿದ್ದು, ಅವರು ಉಳಿದುಕೊಳ್ಳಲು ಪ್ರತ್ಯೇಕ ಕೊಠಡಿಯನ್ನು ಬಳಸಬೇಕಾಗುತ್ತದೆ. 16 ವರ್ಷದೊಳಗಿನ ಆಟಗಾರರ ಸುರಕ್ಷತೆಗಾಗಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ (ICC) ಮತ್ತು ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿ (ECB) ರೂಪಿಸಿರುವ ಬಾಲ ಸಂರಕ್ಷಣಾ ನಿಯಮಗಳ ಅಡಿಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ. ಐರ್ಲೆಂಡ್ ಸರಣಿಗೂ ಇದು ಅನ್ವಯಿಸುತ್ತದೆಯೇ ಎಂಬುದು ಇನ್ನು ಸ್ಪಷ್ಟವಾಗಿಲ್ಲ.

ವೈಭವ್ ಸೂರ್ಯವಂಶಿ ವಯಸ್ಸನ್ನು ಪರಿಗಣಿಸಿ ಬಿಸಿಸಿಐ (BCCI) ವಿಶೇಷ ಅನುಮತಿಯನ್ನು ನೀಡಿದ್ದು, ಇಡೀ ಪ್ರವಾಸದುದ್ದಕ್ಕೂ ಅವರ ಪೋಷಕರು ಜೊತೆಯಲ್ಲೇ ಇರಲಿದ್ದಾರೆ. ತಂಡದ ಆಟಗಾರರು ಉಳಿದುಕೊಳ್ಳುವ ಹೋಟೆಲ್‌ನಲ್ಲೇ ವೈಭವ್ ಅವರ ಪೋಷಕರಿಗೂ ಕೊಠಡಿ ನೀಡಲಾಗಿದೆ. ಸಾಮಾನ್ಯವಾಗಿ ಹಿರಿಯರ ತಂಡದ ಪ್ರವಾಸದಲ್ಲಿ ಇಂತಹ ನಿಯಮ ಇರುವುದಿಲ್ಲ. ಆದರೆ, ಹದಿಹರೆಯದ ವೈಭವ್ ಅವರಿಗೆ ಸಂಪೂರ್ಣ ನೈತಿಕ ಬೆಂಬಲ ಮತ್ತು ಸುರಕ್ಷತೆ ಒದಗಿಸುವ ನಿಟ್ಟಿನಲ್ಲಿ ಐಸಿಸಿ ಮತ್ತು ಇಸಿಬಿ ಈ ವಿಶೇಷ ವ್ಯವಸ್ಥೆಗೆ ಒಪ್ಪಿಗೆ ಸೂಚಿಸಿವೆ. ಈ ಬಗ್ಗೆ ಈ ಹಿಂದೆಯೇ ಮಾಹಿತಿ ನೀಡಿದ್ದ ಬಿಸಿಸಿಐ ಕಾರ್ಯದರ್ಶಿ ದೇವಜಿತ್ ಸೈಕಿಯಾ, ಹಿರಿಯ ಆಟಗಾರರು ಹಾಗೂ ಹಿರಿಯ ಮ್ಯಾನೇಜ್‌ಮೆಂಟ್ ಇರುವ ವಾತಾವರಣಕ್ಕೆ ವೈಭವ್ ಸುಲಭವಾಗಿ ಹೊಂದಿಕೊಳ್ಳಲು ಮತ್ತು ಅವರು ಆರಾಮದಾಯಕವಾಗಿರಲು ಪೋಷಕರನ್ನು ಜೊತೆಗೆ ಕಳುಹಿಸುವ ನಿರ್ಧಾರ ಮಾಡಲಾಗಿದೆ. ಇದರಿಂದ ವೈಭವ್‌ಗೆ ಎದುರಾಗಬಹುದಾದ ಹಲವು ಗೊಂದಲಗಳು ನಿವಾರಣೆಯಾಗಲಿವೆ ಎಂದು ತಿಳಿಸಿದ್ದರು.

ಭಾರತ ತಂಡ ಈಗಾಗಲೇ ಯುನೈಟೆಡ್​ ಕಿಂಗ್​​ಡಮ್ ತಲುಪಿದ್ದು, ಮೊದಲು ಐರ್ಲೆಂಡ್ ವಿರುದ್ಧ ಜೂನ್ 26 ಮತ್ತು 28 ರಂದು ಬೆಲ್‌ಫಾಸ್ಟ್‌ನಲ್ಲಿ ಎರಡು ಟಿ20 ಪಂದ್ಯಗಳನ್ನು ಆಡಲಿದೆ. ತದನಂತರ ಇಂಗ್ಲೆಂಡ್ ಪ್ರವಾಸ ಕೈಗೊಳ್ಳಲಿದ್ದು, ಅಲ್ಲಿ 5 ಟಿ20 ಮತ್ತು 3 ಏಕದಿನ ಪಂದ್ಯಗಳನ್ನು ಆಡಲಿದೆ. ಜುಲೈ 1 ರಂದು ಚೆಸ್ಟರ್-ಲೆ-ಸ್ಟ್ರೀಟ್‌ನಲ್ಲಿ ಮೊದಲ ಟಿ20 ಪಂದ್ಯ ನಡೆಯಲಿದ್ದು, ನಂತರ ಜುಲೈ 4 (ಮ್ಯಾಂಚೆಸ್ಟರ್), ಜುಲೈ 7 (ನಾಟಿಂಗ್‌ಹ್ಯಾಮ್), ಜುಲೈ 9 (ಬ್ರಿಸ್ಟಲ್) ಮತ್ತು ಜುಲೈ 11 ರಂದು (ಸೌತಾಂಪ್ಟನ್) ಉಳಿದ ಟಿ20 ಪಂದ್ಯಗಳು ಜರುಗಲಿವೆ(ಏಜೆನ್ಸೀಸ್​​).