10 ಕೋಟಿ ರೂ. + ಇಬ್ಬರು ಸ್ಟಾರ್​... ಧೋನಿ ಸ್ಥಾನ ತುಂಬಲು ಹಾರ್ದಿಕ್​ ಪಾಂಡ್ಯಗೆ ಸಿಎಸ್​ಕೆಯಿಂದ ಇದೆಂಥಾ ಬಿಗ್ ಆಫರ್​

Hardik Pandya: ಈ ವರ್ಷ ಆರ್​ಸಿಬಿ ಗೆಲುವಿನಿಂದ ಯಶಸ್ವಿಯಾಗಿ ಮುಕ್ತಾಯಗೊಂಡ ಐಪಿಎಲ್​ 19ನೇ ಆವೃತ್ತಿಯಲ್ಲಿ ಮುಂಬೈ ಇಂಡಿಯನ್ಸ್​ ಸತತ ಎರಡನೇ ಬಾರಿ ಅಂಕಪಟ್ಟಿಯಲ್ಲಿ ಕೆಳಸ್ಥಾನಕ್ಕೆ ತಲುಪುವ ಮೂಲಕ ಲೀಗ್​​ನಿಂದ ಹೊರಬಿದ್ದಿತು. ಸ್ಟಾರ್​ ಆಟಗಾರರ ಅತ್ಯಂತ ಕಳಪೆ ಪ್ರದರ್ಶನ, ಬ್ಯಾಕ್​ ಟು ಬ್ಯಾಕ್​ ಹೀನಾಯ ಸೋಲು ಮತ್ತು ನಾಯಕ ಹಾರ್ದಿಕ್​ ಮಾತು ಕೇಳಲು ಹಿರಿಯ ಕ್ರಿಕೆಟಿಗರು ತೋರಿದ ಅಸಡ್ಡೆಯೇ ಚಾಂಪಿಯನ್ಸ್ ತಂಡಕ್ಕೆ ಭಾರಿ ಮುಖಭಂಗ ತಂದೊಡ್ಡಿತು. ಆಂತರಿಕ ಸಮಸ್ಯೆ ಮತ್ತು ಸಾಲು ಸಾಲು ಟೀಕೆಗಳ ಬೆನ್ನಲ್ಲೇ ಎಂಐ ತೊರೆಯಲು ಪಾಂಡ್ಯ ನಡೆಸುತ್ತಿರುವ ತೆರೆಮರೆಯ ಕಸರತ್ತಿಗೆ ಮತ್ತೊಂದು ಬಲವಾದ ಸಾಕ್ಷಿ ಸಿಕ್ಕಿದೆ.​ ​ 

ಗುಜರಾತ್​ ಟೈಟನ್ಸ್​ ಪಡೆಗೆ ಕ್ಯಾಪ್ಟನ್ ಆಗಿದ್ದ ಸ್ಟಾರ್​ ಆಲ್​ರೌಂಡ್ ಆಟಗಾರ​ ಹಾರ್ದಿಕ್​ ಪಾಂಡ್ಯ, ತಂಡವನ್ನು ಒಂದು ಬಾರಿ ಚಾಂಪಿಯನ್​ ಪಟ್ಟಕೇರಿಸಿ, ಎರಡನೇ ಬಾರಿ ಫೈನಲ್​ವರೆಗೂ ಕೊಂಡೊಯ್ದಿದ್ದರು. ಆದರೆ, ಅದೇ ಮುಂಬೈ ಇಂಡಿಯನ್ಸ್​ಗೆ ಬಂದು ರೋಹಿತ್​ ಶರ್ಮರಿಂದ ನಾಯಕನ ಸ್ಥಾನ ಪಡೆದಿದ್ದೇ ತಡ, ಅವರ ವಿರುದ್ಧ ಸಾಲು ಸಾಲು ಟೀಕೆಗಳು ವ್ಯಕ್ತವಾಯಿತು. ಮತ್ತೊಂದೆಡೆ, ಈ ವರ್ಷದ ಐಪಿಎಲ್​ನಲ್ಲಿ ಅತ್ಯಂತ ಕಳಪೆ ಪ್ರದರ್ಶನ ತೋರಿದ ಹಾರ್ದಿಕ್​, ಬೌಲಿಂಗ್, ಬ್ಯಾಟಿಂಗ್ ಮತ್ತು ಕ್ಯಾಪ್ಟನ್ಸಿ ಯಾವುದರಲ್ಲೂ ಉತ್ತಮ ಪ್ರದರ್ಶನ ತೋರದೆ ಹೋಗಿದ್ದೇ ಫ್ರಾಂಚೈಸಿಯ ಸೋಲಿಗೆ ಮುಖ್ಯ ಕಾರಣ ಎಂದು ದೂಷಿಸಲಾಗಿದೆ.

ಐದು ಬಾರಿ ಟ್ರೋಫಿ ಎತ್ತಿಹಿಡಿದ ಚಾಂಪಿಯನ್ಸ್ ತಂಡವೇ ಪೈಪೋಟಿ ಕೊಡದೆ ಎಲಿಮಿನೇಟ್ ಆಗಿದ್ದು ಸದ್ಯ ಮುಂಬೈ ಫ್ರಾಂಚೈಸಿಯ ಅಭಿಮಾನಿಗಳನ್ನು ಕೆರಳಿಸಿದೆ. ಟೀಮ್​ನ ಸೋಲಿಗೆ ನಾಯಕ ಹಾರ್ದಿಕ್​ ಪಾಂಡ್ಯ ಕಾರಣ ಎಂಬ ಟೀಕೆ, ವ್ಯಂಗ್ಯಗಳು ಕ್ರಿಕೆಟ್​ ವಲಯದಲ್ಲಿ ಭಾರಿ ಚರ್ಚೆಯಾದ ಬೆನ್ನಲ್ಲೇ ನಾಯಕತ್ವ ಮಾತ್ರವಲ್ಲದೇ, ತಂಡದಿಂದಲೂ ದೂರ ಸರಿಯಲು ಹಾರ್ದಿಕ್​ ನಿರ್ಧರಿಸಿದ್ದಾರೆ ಎಂದು ಮೂಲಗಳು ದೃಢಪಡಿಸಿವೆ. ಈ ವಿಷಯ ಹೊರಬೀಳುತ್ತಿದ್ದಂತೆ, ಮಹೇಂದ್ರ ಸಿಂಗ್ ಧೋನಿ ಅವರ ಅಲಭ್ಯತೆಯಿಂದ ಪರದಾಡುತ್ತಿರುವ ಚೆನ್ನೈ ಸೂಪರ್ ಕಿಂಗ್ಸ್​, ತೆರೆಮರೆಯಲ್ಲಿ ಹಾರ್ದಿಕ್​ಗೆ ಮಣೆ ಹಾಕಿದೆ.  

ಮುಂಬೈ ಇಂಡಿಯನ್ಸ್​ ತಂಡದಿಂದ ಹಾರ್ದಿಕ್ ಪಾಂಡ್ಯರನ್ನು ಕಳೆದುಕೊಳ್ಳಲು ಎದುರುನೋಡುತ್ತಿರುವ ಸಿಎಸ್​ಕೆ, ನಮ್ಮ ಕಡೆಯಿಂದ 10 ಕೋಟಿ ರೂ. ಮತ್ತು ಆಯುಷ್​ ಮ್ಹಾತ್ರೆ ಬದಲಿಗೆ ಡೆವಾಲ್ಡ್ ಬ್ರೆವಿಸ್ ಮತ್ತು ಶಿವಂ ದುಬೆ ಅವರನ್ನು ಸ್ವಾಪ್​ ಮಾಡುವುದಾಗಿ ತಿಳಿಸಿದೆ. ಒಬ್ಬ ಪಾಂಡ್ಯ ಪಡೆಯಲು ಇಬ್ಬರು ಸ್ಟಾರ್​ ಆಲ್​ರೌಂಡರ್​ರನ್ನು ಎಂಐಗೆ ಟ್ರೇಡ್​ ಮಾಡಲು ಚೆನ್ನೈ ಫ್ರಾಂಚೈಸಿ ಮುಂದಾಗಿದೆ ಎಂದು ಕ್ರಿಕೆಟ್​ ವರದಿಗಳು ಸ್ಪಷ್ಟಪಡಿಸಿವೆ. 

ವರದಿಯ ಪ್ರಕಾರ, ಕಳಪೆ ಫಾರ್ಮ್​ನಲ್ಲಿದ್ದರೂ ಸ್ಟಾರ್ ಆಲ್‌ರೌಂಡರ್‌ ಹಾರ್ದಿಕ್​ಗೆ ಸಖತ್ ಡಿಮಾಂಡ್​ ಶುರುವಾಗಿದೆ. ಮುಂಬೈ ಪಾಂಡ್ಯ ಬದಲಿಗೆ ನಮಗೆ ಯುವ ಬ್ಯಾಟರ್​ ಆಯುಷ್​ರನ್ನು ಕಳುಹಿಸಿಕೊಡಿ ಎಂದು ಕೇಳಿದೆ. ಆದ್ರೆ, ಇದಕ್ಕೆ ಒಪ್ಪದ ಚೆನ್ನೈ ಸೂಪರ್ ಕಿಂಗ್ಸ್, ಅವರ ಬದಲಿಗೆ ಅನುಭವಿ ಶಿವಂ ದುಬೆ ಮತ್ತು ಬ್ರೆವಿಸ್​ ಸೇರಿ ಒಟ್ಟು ಇಬ್ಬರು ಆಲ್​ರೌಂಡರ್​ ಜತೆ 10 ಕೋಟಿ ರೂ. ಕೊಟ್ಟು ಡೀಲ್​ ಮಾಡಿಕೊಳ್ಳೋಣ ಎಂದು ಆಫರ್​ ನೀಡಿದೆ ಎನ್ನಲಾಗಿದೆ. 

ಇದೇನಾದರೂ ಅಧಿಕೃತವಾಗಿ ಘೋಷಣೆಯಾದರೆ, ಹಾರ್ದಿಕ್ ಪಾಂಡ್ಯ ಬರೋಬ್ಬರಿ 20 ಕೋಟಿ ರೂ. ಮೌಲ್ಯ ಪಡೆಯುವುದು ಖಚಿತ. ಇದರೊಟ್ಟಿಗೆ, ಸಿಎಸ್​ಕೆ ತಂಡದ ಕ್ಯಾಪ್ಟನ್ ಆಗಿಯೂ ಅವಕಾಶ ಗಿಟ್ಟಿಸಿಕೊಳ್ಳುತ್ತಾರೆ ಎಂಬುದರಲ್ಲಿ ಸಂದೇಹವಿಲ್ಲ. ಈ ವಿಚಾರಕ್ಕೆ ಸಂಬಂಧಿಸಿದಂತೆ ಇಲ್ಲಿಯವರೆಗೆ ಎರಡೂ ಫ್ರಾಂಚೈಸಿಗಳು ಯಾವುದೇ ರೀತಿಯಲ್ಲೂ ಅಧಿಕೃತವಾಗಿ ಘೋಷಣೆ ಅಥವಾ ಪ್ರತಿಕ್ರಿಯೆ ನೀಡಿಲ್ಲ ಎಂಬುದು ಇಲ್ಲಿ ಗಮನಾರ್ಹ,(ಏಜೆನ್ಸೀಸ್).