ViratKohli: ಅಕಾಡೆಮಿಗೆ ಸೇರಲು ಕೊಹ್ಲಿ ತುಂಬಿದ್ದ ಅರ್ಜಿ ಈಗ ಟ್ರೆಂಡಿಂಗ್! ಇಲ್ಲಿದೆ ಆ ಅಪರೂಪದ ಚಿತ್ರ

ವೈರಲ್ ಆಗಿರುವ ಈ ನೋಂದಣಿ ಅರ್ಜಿಯು 1997ರದ್ದಾಗಿದೆ. ಅಂದರೆ ವಿರಾಟ್ ಕೊಹ್ಲಿ ಅವರಿಗೆ ಕೇವಲ 9 ವರ್ಷ ವಯಸ್ಸಾಗಿದ್ದಾಗ, ಅವರು ದೆಹಲಿಯ ಪ್ರಸಿದ್ಧ ‘ಪಶ್ಚಿಮ ದೆಹಲಿ ಕ್ರಿಕೆಟ್ ಅಕಾಡೆಮಿ’ಗೆ (West Delhi Cricket Academy) ಸೇರ್ಪಡೆಯಾಗಲು ಈ ಫಾರ್ಮ್ ಅನ್ನು ಭರ್ತಿ ಮಾಡಿದ್ದರು. ಈ ಅರ್ಜಿಯಲ್ಲಿ ಕೊಹ್ಲಿ ಅವರ ಬಾಲ್ಯದ ಬಣ್ಣದ ಭಾವಚಿತ್ರವಿದ್ದು, ಅತ್ಯಂತ ಮುದ್ದಾಗಿ ಕಾಣಿಸುತ್ತಿದ್ದಾರೆ.

ಅರ್ಜಿಯಲ್ಲಿ ವಿರಾಟ್ ಕೊಹ್ಲಿ ಅವರ ಪೂರ್ಣ ಹೆಸರು, ತಂದೆಯ ಹೆಸರು ಪ್ರೇಮ್ ಕೊಹ್ಲಿ, ಅವರ ಅಂದಿನ ದೂರವಾಣಿ ಸಂಖ್ಯೆ ಹಾಗೂ ದೆಹಲಿಯ ಉತ್ತಮ್ ನಗರದಲ್ಲಿರುವ ಅವರ ಮನೆಯ ವಿಳಾಸವನ್ನು ಕೈಬರಹದಲ್ಲಿ ಬರೆಯಲಾಗಿದೆ. ಅಷ್ಟೇ ಅಲ್ಲದೆ, ಅಕಾಡೆಮಿಯ ಕೋಚ್ ಆದ ರಾಜ್‌ಕುಮಾರ್ ಶರ್ಮಾ ಅವರ ಸಹಿ ಕೂಡ ಈ ಫಾರ್ಮ್ ಮೇಲಿದೆ. ವಿರಾಟ್ ಕೊಹ್ಲಿ ಅವರ ಕ್ರಿಕೆಟ್ ಬದುಕಿನ ಮೊದಲ ಹೆಜ್ಜೆಯ ಸಾಕ್ಷಿ ಇದಾಗಿದ್ದು, ಅಭಿಮಾನಿಗಳು ಇದನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಭಾವುಕರಾಗಿ ಹಂಚಿಕೊಳ್ಳುತ್ತಿದ್ದಾರೆ.

ಈ ವೈರಲ್ ಫಾರ್ಮ್ ನೋಡಿದ ಕ್ರಿಕೆಟ್ ಪ್ರೇಮಿಗಳು ವಿವಿಧ ರೀತಿಯಲ್ಲಿ ಕಾಮೆಂಟ್ ಮಾಡುತ್ತಿದ್ದಾರೆ. "9 ವರ್ಷದ ಈ ಪುಟ್ಟ ಬಾಲಕ ಮುಂದೊಂದು ದಿನ ಜಗತ್ತಿನ ಶ್ರೇಷ್ಠ ಕ್ರಿಕೆಟರ್ ಆಗುತ್ತಾನೆ ಮತ್ತು ಸಚಿನ್ ತೆಂಡೂಲ್ಕರ್ ಅವರ ದಾಖಲೆಗಳನ್ನೇ ಮುರಿಯುತ್ತಾನೆ ಎಂದು ಅಂದು ಯಾರು ತಾನೇ ಊಹಿಸಿದ್ದರು!" ಎಂದು ನೆಟ್ಟಿಗರು ಕೊಂಡಾಡುತ್ತಿದ್ದಾರೆ. ಅಂದಿನ ಆ ಸಣ್ಣ ಮಗುವಿನಲ್ಲಿದ್ದ ಕ್ರಿಕೆಟ್ ಮೇಲಿನ ಹಸಿವು ಇಂದಿಗೂ ಅವರಲ್ಲಿ ಹಾಗೇ ಜೀವಂತವಾಗಿದೆ ಎಂದು ಅಭಿಮಾನಿಗಳು ಅಭಿಪ್ರಾಯಪಟ್ಟಿದ್ದಾರೆ.

ಪ್ರಸ್ತುತ ರನ್‌ಗಳ ಸುರಿಮಳೆಗೈಯುತ್ತಿರುವ ವಿರಾಟ್ ಕೊಹ್ಲಿ ಅವರ ಆರಂಭಿಕ ದಿನಗಳ ಈ ಅಪರೂಪದ ದಾಖಲೆಯು, ಕಠಿಣ ಪರಿಶ್ರಮ ಮತ್ತು ಸಮರ್ಪಣಾ ಭಾವವಿದ್ದರೆ ಯಾವುದೇ ಸಾಮಾನ್ಯ ಬಾಲಕನೂ ಜಾಗತಿಕ ಮಟ್ಟದಲ್ಲಿ ತಾರೆ ತರಹ ಹೊಳೆಯಬಹುದು ಎಂಬುದಕ್ಕೆ ಅತ್ಯುತ್ತಮ ಉದಾಹರಣೆಯಾಗಿದೆ,(ಏಜೆನ್ಸೀಸ್​).