1 ರನ್​ನಲ್ಲೇ ವೈರಿಗಳಿಗೆ ಮುಟ್ಟಿ ನೋಡಿಕೊಳ್ಳುವಂತೆ ಉತ್ತರಿಸಿದ 'ಕಿಂಗ್​'! ಇದೆಲ್ಲ ಕೊಹ್ಲಿಗೆ ಮಾತ್ರ ಸಾಧ್ಯ ಅನ್ನೋದಕ್ಕೆ ಇದೇ ಸಾಕ್ಷಿ | Virat Kohli

Virat Kohli: ನಿನ್ನೆ (ಮೇ.13) ನಡೆದ ಕೋಲ್ಕತ ನೈಟ್ ರೈಡರ್ಸ್ ವಿರುದ್ಧದ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ವಿರಾಟ್​ ಕೊಹ್ಲಿ ಅವರ ಶತಕದಾಟದಿಂದ ಭರ್ಜರಿ ಜಯಗಳಿಸಿತು. ಈ ಮೂಲಕ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದೆ. 

ಕೆಕೆಆರ್​ ನೀಡಿದ 193 ರನ್​ಗಳ ಗುರಿಯನ್ನು ಬೆನ್ನತ್ತಿದ ಆರ್​ಸಿಬಿಗೆ ವಿರಾಟ್​ ಕೊಹ್ಲಿ ಮತ್ತು ಜಾಕೆಬ್​ ಬೆಥಲ್​ ಜೋಡಿಯಿಂದ ಉತ್ತಮ ಓಪನಿಂಗ್ ಬರಲಿದೆ ಎಂಬ ನಿರೀಕ್ಷೆ ದುಪ್ಪಟ್ಟಾಗಿತ್ತು. ಅಂತೆಯೇ, ಪವರ್​ಪ್ಲೇನಲ್ಲಿ ಬೆಥಲ್​ ಸ್ಫೋಟಕ ಓಪನಿಂಗ್ ನೀಡಿದ್ದೇ ಆದರೂ ಹೆಚ್ಚು ಕಾಲ ಕ್ರೀಸ್​ನಲ್ಲಿ ಉಳಿಯಲಿಲ್ಲ. ಇದರಿಂದ ಆತಂಕಕ್ಕೊಳಗಾದ ಆರ್​ಸಿಬಿ ಫ್ಯಾನ್ಸ್​, ಎರಡು ಪಂದ್ಯಗಳ ಡಕ್​ಔಟ್​ನಿಂದ ವಿರಾಟ್​ ಪಕ್ಕಾ ಹೊರಬಲಿದ್ದಾರೆ. ಅಬ್ಬರದ ಇನ್ನಿಂಗ್ಸ್ ನೀಡಲಿದ್ದಾರೆ ಎಂದೇ ಆಶಿಸಿದರು. ಕಡೆಗೂ ಅಭಿಮಾನಿಗಳ ನಿರೀಕ್ಷೆಯನ್ನು ಕೊಹ್ಲಿ ಈಡೇರಿಸಿದ್ದು ವಿಶೇಷ.   

ಕೆಕೆಆರ್​ ಬೌಲರ್​ಗಳನ್ನು ಚೆಂಡಾಡಿದ ಕೊಹ್ಲಿ, 60 ಎಸೆತಗಳಲ್ಲಿ 105 ರನ್​ ಬಾರಿಸುವ ಮೂಲಕ ಅಜೇಯರಾಗಿ ಉಳಿದರು. ಶತಕ ಬಾರಿಸಿದ ವಿರಾಟ್​, ಅಭಿಮಾನಿಗಳ ಖುಷಿಗೆ ತಕ್ಕಂತೆ ಸಂಭ್ರಮಿಸಲಿಲ್ಲ. ಕಾರಣ, ಈ ಮೊದಲೇ ಅವರು ತಮ್ಮ ವಿರುದ್ಧ ಸಾಲು ಸಾಲು ಟೀಕೆ, ಟ್ರೋಲ್​ಗಳನ್ನು ಮಾಡಿದ್ದ ಕೆಲ ವೈರಿಗಳಿಗೆ ಮೊದಲ ರನ್​ನಲ್ಲೇ ಸಂಭ್ರಮಿಸಿ, ಮುಟ್ಟಿ ನೋಡಿಕೊಳ್ಳುವಂತೆ ಉತ್ತರಿಸಿದರು. ಈ ದೃಶ್ಯ ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ. 

ಕಳೆದ ಎರಡು ಪಂದ್ಯಗಳಲ್ಲಿ ಬ್ಯಾಕ್​ ಟು ಬ್ಯಾಕ್​ ಶೂನ್ಯಕ್ಕೆ ವಿಕೆಟ್​ ಕಳೆದುಕೊಂಡ ವಿರಾಟ್​ ಕೊಹ್ಲಿ, ಸಾಮಾಜಿಕ ಜಾಲತಾಣಗಳಲ್ಲಿ ವೈರಿಗಳ ಟ್ರೋಲ್​ಗಳಿಗೆ ಗುರಿಯಾಗಿದ್ದರು. ಡಕ್​ಔಟ್​ ಆದ 'ಕೊಹ್ಲಿ ಸೀದಾ ಮನೆಗೆ', 'ಇಷ್ಟೇ ಈತನದ್ದು', 'ನಿವೃತ್ತಿ ಸಮಯ ಹತ್ತಿರ' ಎಂದೆಲ್ಲ ಕೆಲವರು ನೆಗೆಟಿವ್ ಆಗಿ ಕಾಮೆಂಟ್​ ಮಾಡಿದ್ದರು. ಇದನ್ನೆಲ್ಲ ಸೂಕ್ಷ್ಮವಾಗಿ ಗಮನಿಸಿದ್ದ ಕೊಹ್ಲಿ, ತಮ್ಮನ್ನು ಲಾಯಲ್​ ಅಭಿಮಾನಿಗಳು ಯಾಕೆ 'ಕಿಂಗ್​' ಎಂದು ಕರೆಯುತ್ತಾರೆ ಎಂಬುದನ್ನು ಮೊದಲ 1 ರನ್​ನಿಂದಲೇ ಸಾಬೀತುಪಡಿಸಿದರು.   

ಕೊಹ್ಲಿ ಅವರ ಈ ಸಂಭ್ರಮದಲ್ಲೇ ಹೇಟರ್​ಗಳಿಗೆ ಗೊತ್ತಾಯಿತು, ಇದು ನಮಗೆ ಕೊಟ್ಟ ಸಂದೇಶ ಎಂದು. ಇದರೊಟ್ಟಿಗೆ ತಾನೊಬ್ಬ ಅದ್ಭುತ ಚೇಸ್​ ಮಾಸ್ಟರ್​ ಎಂದೂ ಸಾಬೀತುಪಡಿಸಿದ ವಿರಾಟ್​, ಶತಕ ಸಿಡಿಸಿದಾಗ ಅಂತಹ ಸಂಭ್ರಮವೇನು ಮಾಡಲಿಲ್ಲ. ಇದಕ್ಕೆ ಮುಖ್ಯ ಕಾರಣವೇ ಆರಂಭದಲ್ಲೇ ಮಾಡಿದ ಒಂದು ರನ್​ ಸೆಲೆಬ್ರೆಷನ್! 3 ಸಿಕ್ಸರ್‌ ಮತ್ತು 11 ಬೌಂಡರಿಗಳನ್ನು ಬಾರಿಸಿ, ತಂಡಕ್ಕೆ ಭರ್ಜರಿ ಜಯ ತಂದುಕೊಟ್ಟ 'ಕಿಂಗ್​ ಕೊಹ್ಲಿ'ಗೆ ಆರ್​ಸಿಬಿ ಅಭಿಮಾನಿಗಳು ತಲೆಬಾಗಿದ್ದಾರೆ. 

ಟಾಸ್​ ಗೆದ್ದ ಆರ್​ಸಿಬಿ ಮೊದಲು ಬ್ಯಾಟಿಂಗ್ ಮಾಡುವಂತೆ ಕೆಕೆಆರ್​ಗೆ ಆಹ್ವಾನಿಸಿತು. ಅಂತೆಯೇ, ರಹಾನೆ ಪಡೆ 20 ಓವರ್‌ಗಳಲ್ಲಿ 4 ವಿಕೆಟ್‌ಗಳ ನಷ್ಟಕ್ಕೆ 192 ರನ್ ಗಳಿಸಿತು. ಈ ಗುರಿಯನ್ನು ಬೆನ್ನಟ್ಟಿದ ವಿರಾಟ್ ಕೊಹ್ಲಿ ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ನೀಡಿದರು. ಕೇವಲ 60 ಎಸೆತಗಳಲ್ಲಿ 105 ರನ್ ಗಳಿಸಿ ಅಜೇಯರಾಗಿ ಉಳಿದರು. 3 ಸಿಕ್ಸರ್‌ ಮತ್ತು 11 ಬೌಂಡರಿಗಳನ್ನು ಬಾರಿಸುವ ಮೂಲಕ ತಂಡದ ಗೆಲುವಿಗೆ ಕಾರಣರಾದರು. ಇನ್ನು ಕೆಕೆಆರ್​ ಪರ ಬೌಲರ್​ ಕಾರ್ತಿಕ್​ ತ್ಯಾಗಿ 3 ವಿಕೆಟ್​ಗಳನ್ನು ಪಡೆದು ಮಿಂಚಿದರು.