ವಡೋದರದಲ್ಲಿ ಇಂದು ಕಿವೀಸ್​ ವಿರುದ್ಧ ಮೊದಲ ಏಕದಿನ; 2026ರಲ್ಲಿ ಶುಭಾರಂಭದ ಹಂಬಲದಲ್ಲಿ ಭಾರತ

ಕಳೆದ ವರ್ಷಾಂತ್ಯದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಟಿ20 ಸರಣಿ ಆಡಿದ್ದ ಭಾರತ ತಂಡ ನಂತರ 22 ದಿನಗಳ ಬಿಡುವಿನ ಬಳಿಕ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ಮರಳುತ್ತಿದೆ. ಈ ಸಮಯದಲ್ಲಿ ತಂಡದ ಬಹುತೇಕ ಆಟಗಾರರು ವಿಜಯ್​ ಹಜಾರೆ ಟ್ರೋಫಿ ದೇಶೀಯ ಏಕದಿನ ಕ್ರಿಕೆಟ್​ ಟೂರ್ನಿಯಲ್ಲಿ ಕನಿಷ್ಠ 2 ಪಂದ್ಯಗಳನ್ನು ಆಡಿದ್ದು, ಉತ್ತಮ ಲಯದಲ್ಲಿದ್ದಾರೆ. ಸದ್ಯ ಏಕದಿನ ಕ್ರಿಕೆಟ್​ಗೆ ಸೀಮಿತವಾಗಿರುವ ಅನುಭವಿ ಬ್ಯಾಟರ್​ಗಳಾದ ರೋಹಿತ್​ ಶರ್ಮ ಮತ್ತು ವಿರಾಟ್​ ಕೊಹ್ಲಿ, ದೇಶೀಯ ಕ್ರಿಕೆಟ್​ನಲ್ಲೂ ಭರ್ಜರಿ ಶತಕ ಸಿಡಿಸಿ ಫಾರ್ಮ್​ ಕಾಯ್ದುಕೊಂಡಿದ್ದಾರೆ. 

ಕಿವೀಸ್​ ತಂಡಕ್ಕೆ ಕಾಯಂ ನಾಯಕ ಮಿಚೆಲ್​ ಸ್ಯಾಂಟ್ನರ್​ ಗಾಯದ ಸಮಸ್ಯೆಯಿಂದಾಗಿ ಏಕದಿನ ಸರಣಿಗೆ ಅಲಭ್ಯರಾಗಿದ್ದು, ಮೈಕೆಲ್​ ಬ್ರೇಸ್​ವೆಲ್​ ಹಂಗಾಮಿ ನಾಯಕರಾಗಿದ್ದಾರೆ. ಟಾಮ್​ ಲಾಥಮ್​ 3ನೇ ಮಗುವಿನ ನಿರೀಕ್ಷೆಯಲ್ಲಿ ಮತ್ತು ಕೇನ್​ ವಿಲಿಯಮ್ಸನ್​ ದಕ್ಷಿಣ ಆಫ್ರಿಕಾದ ಟಿ20 ಲೀಗ್​ನಲ್ಲಿ ಆಡುತ್ತಿರುವ ಕಾರಣ ಗೈರಾಗಿದ್ದಾರೆ. ಟಿ20 ವಿಶ್ವಕಪ್​ಗೆ ಪೂರ್ವಭಾವಿಯಾಗಿ ರಚಿನ್​ ರವೀಂದ್ರ, ಮ್ಯಾಟ್​ ಹೆನ್ರಿ, ಜೇಕಬ್​ ಡಫಿಗೆ ವಿಶ್ರಾಂತಿ ನೀಡಲಾಗಿದೆ. ಕಿವೀಸ್​ ತಂಡದ 15ರ ಪೈಕಿ 8 ಆಟಗಾರರಿಗೆ ಇದು ಮೊದಲ ಭಾರತ ಪ್ರವಾಸವಾಗಿದೆ. ಹೀಗಾಗಿ ಅನನುಭವಿ ಪ್ರವಾಸಿ ತಂಡ ಆತಿಥೇಯರಿಗೆ ಸುಲಭ ತುತ್ತಾಗುವ ನಿರೀಕ್ಷೆ ಇದೆ.

ಗಿಲ್​ಗೆ ಸವಾಲಿನ ಸರಣಿ: ಟಿ20 ವಿಶ್ವಕಪ್​ಗೆ ಕಡೆಗಣಿಸಲ್ಪಟ್ಟಿರುವ ಶುಭಮಾನ್​ ಗಿಲ್​ಗೆ ನಾಯಕರಾಗಿ ಏಕದಿನ ಕ್ರಿಕೆಟ್​ ದಾಖಲೆ ಸುಧಾರಿಸಿಕೊಳ್ಳಲು ಇದು ಉತ್ತಮ ಅವಕಾಶವೆನಿಸಿದೆ. ಏಕದಿನ ನಾಯಕರಾಗಿ ಕಳೆದ ಆಸ್ಟ್ರೆಲಿಯಾ ಪ್ರವಾಸದ ಮೊದಲ ಸವಾಲಿನಲ್ಲಿ ಅವರು ಸರಣಿ ಸೋಲು ಕಂಡಿದ್ದರು. ವಿಜಯ್​ ಹಜಾರೆ ಟ್ರೋಫಿಯಲ್ಲಿ ಅನಾರೋಗ್ಯದಿಂದ ಒಂದು ಪಂದ್ಯ ತಪ್ಪಿಸಿಕೊಂಡಿದ್ದ ಅವರು, ಇನ್ನೊಂದು ಪಂದ್ಯದಲ್ಲಿ ಬೇಗನೆ ಔಟಾಗಿದ್ದರು. ಹೀಗಾಗಿ ಬ್ಯಾಟಿಂಗ್​ನಲ್ಲೂ ಅವರು ಶ್ರೀ ಲಯಕ್ಕೆ ಮರಳಬೇಕಿದೆ.

ಮುಂದಿನ ವರ್ಷದ ಏಕದಿನ ವಿಶ್ವಕಪ್​ ಟೂರ್ನಿಗೆ ಸಿದ್ಧತೆ ಮತ್ತು ಬಲಿಷ್ಠ ತಂಡ ಕಟ್ಟುವ ನಿಟ್ಟಿನಲ್ಲಿ ಭಾರತಕ್ಕೆ ಇದು ಮಹತ್ವದ ವರ್ಷವಾಗಿದೆ. ಹಾಲಿ ವರ್ಷ ಭಾರತ ತಂಡ ಕನಿಷ್ಠ 18 ಏಕದಿನ ಪಂದ್ಯಗಳನ್ನು ಆಡಲಿದೆ. ಸೆಪ್ಟೆಂಬರ್​ನಲ್ಲಿ ಬಾಂಗ್ಲಾದೇಶದಲ್ಲೂ 3 ಏಕದಿನ ಪಂದ್ಯ ಆಡಬೇಕಿದ್ದರೂ, ಪ್ರಸಕ್ತ ರಾಜತಾಂತ್ರಿಕ ಬಿಕ್ಕಟ್ಟಿನಿಂದಾಗಿ ಈ ಸರಣಿ ನಡೆಯುವ ಸಾಧ್ಯತೆ ಕ್ಷೀಣವಾಗಿದೆ. ಉಳಿದಂತೆ ಭಾರತ ತಂಡ ಅಫ್ಘಾನಿಸ್ತಾನ, ಇಂಗ್ಲೆಂಡ್​, ವೆಸ್ಟ್​ ಇಂಡೀಸ್​, ನ್ಯೂಜಿಲೆಂಡ್​ (2 ಬಾರಿ), ಶ್ರೀಲಂಕಾ ವಿರುದ್ಧ ತಲಾ 3 ಏಕದಿನ ಪಂದ್ಯಗಳ ಸರಣಿ ಆಡಲಿದೆ. ಹಾಲಿ ವರ್ಷದ ಟಿ20 ವಿಶ್ವಕಪ್​ ಮತ್ತು ಐಪಿಎಲ್​ ನಂತರವಂತೂ ಭಾರತದ ಸಂಪೂರ್ಣ ಗಮನ ಏಕದಿನ ವಿಶ್ವಕಪ್​ ಸಿದ್ಧತೆಯ ಮೇಲಿರಲಿದೆ. 

ಭಾರತ: ಈಗಾಗಲೆ ವಿಜಯ್​ ಹಜಾರೆ ಟ್ರೋಫಿಯಲ್ಲಿ ಆಡಿ ಫಿಟ್ನೆಸ್​ ಸಾಬೀತುಪಡಿಸಿರುವ ಉಪನಾಯಕ ಶ್ರೇಯಸ್​ ಅಯ್ಯರ್​, ಮೂರು ತಿಂಗಳ ಬಳಿಕ ಭಾರತ ತಂಡದ ಪರ 4ನೇ ಕ್ರಮಾಂಕದಲ್ಲಿ ಆಡಲಿದ್ದಾರೆ. ದಣ ಆಫ್ರಿಕಾ ಎದುರು ತಾನಾಡಿದ ಕೊನೇ ಏಕದಿನದಲ್ಲಿ ಶತಕ ಸಿಡಿಸಿದ್ದರೂ ಯಶಸ್ವಿ ಜೈಸ್ವಾಲ್​ ಈ ಬಾರಿ ಗಿಲ್​ಗೆ ಸ್ಥಾನ ಬಿಟ್ಟುಕೊಡಬೇಕಿದೆ. ಜಸ್​ಪ್ರೀತ್​ ಬುಮ್ರಾ ಗೈರಿನಲ್ಲಿ ಮೊಹಮದ್​ ಸಿರಾಜ್​ ವೇಗದ ಬೌಲಿಂಗ್​ ವಿಭಾಗವನ್ನು ಮುನ್ನಡೆಸಲಿದ್ದಾರೆ. ಅರ್ಷದೀಪ್​ 2ನೇ ವೇಗಿಯಾಗಿದ್ದರೆ, 3ನೇ ವೇಗದ ಬೌಲರ್​ ಸ್ಥಾನಕ್ಕೆ ಹರ್ಷಿತ್​ ರಾಣಾ ಜತೆ ಆಲ್ರೌಂಡರ್​ ನಿತೀಶ್​ ಕುಮಾರ್​ ರೆಡ್ಡಿ ಪೈಪೋಟಿಯಲ್ಲಿದ್ದಾರೆ. ಕನ್ನಡಿಗ ಪ್ರಸಿದ್ಧಕೃಷ್ಣ 11ರ ಬಳಗದಿಂದ ಹೊರಗುಳಿಯಲಿದ್ದಾರೆ.

ಸಂಭಾವ್ಯ ತಂಡ: ಶುಭಮಾನ್​ ಗಿಲ್​ (ನಾಯಕ), ರೋಹಿತ್​ ಶರ್ಮ, ವಿರಾಟ್​ ಕೊಹ್ಲಿ, ಶ್ರೇಯಸ್​ ಅಯ್ಯರ್​, ಕೆಎಲ್​ ರಾಹುಲ್​ (ವಿ.ಕೀ), ವಾಷಿಂಗ್ಟನ್​ ಸುಂದರ್​, ರವೀಂದ್ರ ಜಡೇಜಾ, ಹರ್ಷಿತ್​ ರಾಣಾ/ನಿತೀಶ್​ ಕುಮಾರ್​ ರೆಡ್ಡಿ, ಕುಲದೀಪ್​ ಯಾದವ್​, ಅರ್ಷದೀಪ್​ ಸಿಂಗ್​, ಮೊಹಮದ್​ ಸಿರಾಜ್​.

ನ್ಯೂಜಿಲೆಂಡ್​: ಇತ್ತೀಚೆಗೆ ತವರಿನಲ್ಲಿ ವೆಸ್ಟ್​ ಇಂಡೀಸ್​ ವಿರುದ್ಧದ ಏಕದಿನ ಸರಣಿಯಲ್ಲಿ ಆಡಿದ ತಂಡಕ್ಕಿಂತ ಬಹುತೇಕ ಬದಲಾದ ಆಡುವ 11ರ ಬಳಗವನ್ನು ನ್ಯೂಜಿಲೆಂಡ್​ ಕಣಕ್ಕಿಳಿಸಲಿದೆ. ಎಡಗೈ ಆರಂಭಿಕ ಡೆವೊನ್​ ಕಾನ್​ವೇ ಮೊದಲ ಬಾರಿಗೆ ಏಕದಿನ ಕ್ರಿಕೆಟ್​ನಲ್ಲಿ ವಿಕೆಟ್​ ಕೀಪಿಂಗ್​ ಕೂಡ ನಿರ್ವಹಿಸುವ ನಿರೀೆ ಇದೆ. ಅವರಿಗೆ ಕೀಪಿಂಗ್​ ಜವಾಬ್ದಾರಿ ನೀಡದಿದ್ದರೆ, ತಜ್ಞ ಕೀಪರ್​ ಮಿಚೆಲ್​ ಹೇ ಕಣಕ್ಕಿಳಿಯಲಿದ್ದಾರೆ. 

ಸಂಭಾವ್ಯ ತಂಡ: ಡೆವೊನ್​ ಕಾನ್​ವೇ (ವಿ.ಕೀ), ನಿಕ್​ ಕೆಲ್ಲಿ, ವಿಲ್​ ಯಂಗ್​, ಡೆರಿಲ್​ ಮಿಚೆಲ್​, ಹೆನ್ರಿ ನಿಕೋಲ್ಸ್​, ಗ್ಲೆನ್​ ಫಿಲಿಪ್ಸ್​, ಮೈಕೆಲ್​ ಬ್ರೇಸ್​ವೆಲ್​ (ನಾಯಕ), ಜಾಕ್​ ಫೌಲ್ಕ್ಸ್​​, ಕೈಲ್​ ಜೇಮಿಸನ್​, ಮೈಕೆಲ್​ ರೇ, ಆದಿತ್ಯ ಅಶೋಕ್​. 

*8: ಭಾರತದಲ್ಲಿ ನ್ಯೂಜಿಲೆಂಡ್​ ತಂಡಕ್ಕೆ ಇದು 8ನೇ ದ್ವಿಪಯ ಏಕದಿನ ಸರಣಿ ಆಗಿದೆ. ಹಿಂದಿನ 7ರಲ್ಲೂ ಭಾರತವೇ ಸರಣಿ ಜಯಿಸಿದೆ. 

ಕಳೆದ ವರ್ಷ ಐಸಿಸಿ ಚಾಂಪಿಯನ್ಸ್​ ಟ್ರೋಫಿ ಫೈನಲ್​ನಲ್ಲಿ ಭಾರತದ ವಿರುದ್ಧ ಸೋತ ನಂತರ ಕಿವೀಸ್​ ತಂಡ ಸತತ 9 ಏಕದಿನ ಪಂದ್ಯ ಗೆದ್ದ ಸಾಧನೆ ಮಾಡಿದೆ. ವಡೋದರದಲ್ಲೂ ಗೆದ್ದರೆ ಕಿವೀಸ್​ ತಂಡ 2015 ಮತ್ತು 2021ರಲ್ಲಿ ಸತತ 10 ಏಕದಿನ ಪಂದ್ಯ ಗೆದ್ದ ತನ್ನ ದಾಖಲೆಯನ್ನು ಸರಿಗಟ್ಟಲಿದೆ.

ವಿರಾಟ್​ ಕೊಹ್ಲಿ ವರ್ಷಾರಂಭದಲ್ಲೇ ದಾಖಲೆಯೊಂದನ್ನು ಬರೆಯುವ ನಿರೀೆಯಲ್ಲಿದ್ದಾರೆ. ಅವರಿನ್ನು 25 ರನ್​ ಗಳಿಸಿದರೆ ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ 28 ಸಾವಿರ ರನ್​ ಪೂರೈಸಿದ ವಿಶ್ವದ 3ನೇ ಬ್ಯಾಟರ್​ ಎನಿಸಲಿದ್ದಾರೆ. ಟೆಸ್ಟ್​, ಏಕದಿನ, ಟಿ20ಯಲ್ಲಿ ಅವರು ಇದುವರೆಗೆ 623 ಇನಿಂಗ್ಸ್​ಗಳಲ್ಲಿ 27,975 ರನ್​ ಗಳಿಸಿದ್ದಾರೆ. ಅಲ್ಲದೆ ಅವರು 42 ರನ್​ ಗಳಿಸಿದರೆ ಶ್ರೀಲಂಕಾದ ಕುಮಾರ್​ ಸಂಗಕ್ಕರರನ್ನು (28,016) ಹಿಂದಿಕ್ಕಿ ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ 2ನೇ ಗರಿಷ್ಠ ರನ್​ಸ್ಕೋರರ್​ ಎನಿಸಲಿದ್ದಾರೆ. ದಿಗ್ಗಜ ಸಚಿನ್​ ತೆಂಡುಲ್ಕರ್​ (34,357) ಅಗ್ರಸ್ಥಾನದಲ್ಲಿದ್ದಾರೆ.

ಕೋಟಂಬಿ ಸ್ಟೇಡಿಯಂನಲ್ಲಿ ಇದು ಮೊಟ್ಟಮೊದಲ ಪುರುಷರ ಅಂತಾರಾಷ್ಟ್ರೀಯ ಕ್ರಿಕೆಟ್​ ಪಂದ್ಯವಾಗಿದೆ. ಸದ್ಯ ಇಲ್ಲಿನ 25 ಡಿಗ್ರಿ ಸೆಲ್ಸಿಯಸ್​ ಸಮೀಪದಲ್ಲಿದ್ದು, ಇಬ್ಬನಿ ಸಮಸ್ಯೆ ಕಾಡುವ ಸಾಧ್ಯತೆ ಇದೆ. ಹೀಗಾಗಿ ಟಾಸ್​ ಗೆದ್ದ ತಂಡ ಚೇಸಿಂಗ್​ಗೆ ಆದ್ಯತೆ ನೀಡುವ ನಿರೀಕ್ಷೆ ಇದೆ.