ಗಿಲ್​ ಮಾತ್ರವಲ್ಲ, 'ಕಿಂಗ್'​ದೂ ಅದೇ ಕಥೆ! ಇಂದೋರ್​ಗೆ ಲಗ್ಗೆಯಿಟ್ಟ ಬೆನ್ನಲ್ಲೇ ನೀರಿನ ಬಾಟಲಿಗಳದ್ದೇ ಸದ್ದು, ವಿಡಿಯೋ ವೈರಲ್​

ಇಂದೋರ್​: ಆತಿಥೇಯ ಭಾರತ ಮತ್ತು ಪ್ರವಾಸಿ ನ್ಯೂಜಿಲೆಂಡ್​ ವಿರುದ್ಧ ನಡೆಯುತ್ತಿರುವ ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ ಉಭಯ ತಂಡಗಳು ಒಂದೊಂದು ಪಂದ್ಯವನ್ನು ಗೆಲ್ಲುವ ಮೂಲಕ ಸರಣಿಯಲ್ಲಿ 1-1 ಅಂತರದಲ್ಲಿ ಸಮಬಲ ಕಾಯ್ದುಕೊಂಡಿದೆ. ಇನ್ನೊಂದು ನಿರ್ಣಾಯಕ ಪಂದ್ಯ ಬಾಕಿ ಉಳಿದಿದ್ದು, ಅದು ಮಧ್ಯಪ್ರದೇಶದ ಇಂದೋರ್​ನಲ್ಲಿ ಇಂದು (ಜ.18) ನಡೆಯಲಿದೆ. ಈ ಪಂದ್ಯಕ್ಕಾಗಿ ಇಂದೋರ್​ಗೆ ಬಂದಿಳಿದಿರುವ ಟೀಮ್ ಇಂಡಿಯಾ ಆಟಗಾರರು, ಅದೊಂದು ಘಟನೆಯಿಂದ ಭಯಭೀತಿಗೆ ಒಳಗಾಗಿರುವುದು ಸದ್ಯ ಹರಿದಾಡುತ್ತಿರುವ ವಿಡಿಯೋಗಳಲ್ಲಿ ಸ್ಪಷ್ಟವಾಗಿ ಕಾಣುತ್ತಿದೆ.

ಈಗಾಗಲೇ ಟೀಮ್​ ಇಂಡಿಯಾ ಇಂದೋರ್​ನಲ್ಲಿ ಬೀಡುಬಿಟ್ಟಿದ್ದು, ಅಭ್ಯಾಸವೆಲ್ಲ ಮುಗಿಸಿದೆ. ಇನ್ನೇನು ಕೆಲವೇ ಕ್ಷಣಗಳಲ್ಲಿ ಆರಂಭಗೊಳ್ಳಲಿರುವ ಸರಣಿಯ ಕೊನೆಯ ಹಾಗೂ ನಿರ್ಣಾಯಕ ಪಂದ್ಯದಲ್ಲಿ ಗೆದ್ದು ಬೀಗಲು ಟೀಮ್ ಇಂಡಿಯಾ ಎದುರುನೋಡುತ್ತಿದೆ. ಇನ್ನು ನಿನ್ನೆಯಷ್ಟೇ ಭಾರತ ತಂಡದ ಕ್ಯಾಪ್ಟನ್ ಶುಭಮನ್ ಗಿಲ್​, 3 ಲಕ್ಷ ರೂ. ಮೌಲ್ಯದ ನೀರು ಶುದ್ಧೀಕರಣ (ವಾಟರ್​ ಪ್ಯೂರಿಫಿಕೇಶನ್​) ಯಂತ್ರವನ್ನು ತಂಗಿದ್ದ ಹೋಟೆಲ್​ ರೂಮಿನಲ್ಲಿ ಅಳವಡಿಸಿಕೊಂಡಿದ್ದಾಗಿ 'ಎನ್​ಡಿಟಿವಿ' ತನ್ನ ವರದಿಯಲ್ಲಿ ಉಲ್ಲೇಖಿಸಿತು.

ಇತ್ತೀಚೆಗೆ ಕಲುಷಿತ ನೀರಿನ ವಿಚಾರಕ್ಕೆ ಇಂದೋರ್​ ದೇಶಾದ್ಯಂತ ಟೀಕೆಗೆ ಗುರಿಯಾಯಿತು. ಮಕ್ಕಳು ಸೇರಿ ಅನೇಕರ ಸಾವುಗಳು ಕಲುಷಿತ ನೀರಿನ ಕಾರಣಕ್ಕೆ ಸಂಭವಿಸಿವೆ ಎಂಬುದು ದೃಢಪಟ್ಟಿತು. ಇದರ ಪರಿಣಾಮ ಟೀಮ್​ ಇಂಡಿಯಾ ಮೇಲೂ ಆಗಬಾರದು ಎಂದು ಬಿಸಿಸಿಐ ಮುನ್ನೆಚ್ಚರಿಕೆಯನ್ನು ತೆಗೆದುಕೊಂಡಿದೆ ಎಂಬುದು ವರದಿ. ಗಿಲ್​ ವಾಟರ್​ ಪ್ಯೂರಿಫೈಯರ್​ ಹಾಕಿಸಿಕೊಂಡರೆ, ವಿರಾಟ್​ ಕೊಹ್ಲಿ ತಮ್ಮ ರೂಮಿಗೆ ಹೋಗುವ ಸಮಯದಲ್ಲಿ ಒಂದು ಬ್ಯಾಗ್​ ಪೂರ ನೀರಿನ ಬಾಟಲಿಗಳನ್ನು ಕೊಂಡೊಯ್ತಿರುವುದು ವಿಡಿಯೋದಲ್ಲಿ ಸೆರೆಯಾಗಿದೆ. ಈ ದೃಶ್ಯ ಸದ್ಯ ಸೋಷಿಯಲ್ ಮೀಡಿಯಾದಲ್ಲಿ ಸಾಕಷ್ಟು ಚರ್ಚೆಗೆ ಗ್ರಾಸವಾಗಿದೆ,(ಏಜೆನ್ಸೀಸ್).