ಅರ್ಹತೆ ಇದ್ರೂ ಮುಂದಿನ 2 ಅಂಡರ್-19 ಏಕದಿನ ವಿಶ್ವಕಪ್ ಆಡುವಂತಿಲ್ಲ ವೈಭವ್! ಅಚ್ಚರಿಯ ಕಾರಣ ಇಲ್ಲಿದೆ... Vaibhav Sooryavanshi

Vaibhav Sooryavanshi : ಅಂಡರ್-19 ಏಕದಿನ ವಿಶ್ವಕಪ್ ಫೈನಲ್‌ ಪಂದ್ಯದಲ್ಲಿ ಟೀಮ್ ಇಂಡಿಯಾದ ಯುವ ಆಟಗಾರ ವೈಭವ್ ಸೂರ್ಯವಂಶಿ, ಬಿರುಗಾಳಿ ಸೃಷ್ಟಿಸಿದರು. ಇಂಗ್ಲೆಂಡ್​ ವಿರುದ್ಧ ನಡೆದ ಫೈನಲ್‌ನಲ್ಲಿ ಅಬ್ಬರಿಸಿ, ಬೊಬ್ಬಿರಿದ ವೈಭವ್​, ಕೇವಲ 80 ಎಸೆತಗಳಲ್ಲಿ 15 ಬೌಂಡರಿ ಹಾಗೂ 15 ಸಿಕ್ಸರ್​ ಒಳಗೊಂಡು 175 ರನ್​ ಗಳಿಸಿದರು. ತಮ್ಮ ಸೂಪರ್ ಶತಕದೊಂದಿಗೆ ಟೀಮ್ ಇಂಡಿಯಾಗೆ ಅದ್ಭುತ ಗೆಲುವು ತಂದುಕೊಟ್ಟರು. ಈ ಮೂಲಕ ಟೀಮ್​ ಇಂಡಿಯಾd ಅಂಡರ್​ 19 ತಂಡ 6ನೇ ವಿಶ್ವ ಪ್ರಶಸ್ತಿಯನ್ನು ಗೆದ್ದಿತು.

ಅಂದಹಾಗೆ, ವೈಭವ್​ ಅವರು ತಮ್ಮ ಅಬ್ಬರದ ಶತಕದೊಂದಿಗೆ ಅಂಡರ್-19 ಏಕದಿನ ವಿಶ್ವಕಪ್ ಫೈನಲ್‌ನಲ್ಲಿ ಶತಕ ಬಾರಿಸಿದ ಅತ್ಯಂತ ಕಿರಿಯ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು. ಇದಲ್ಲದೆ, ಅಂಡರ್-19 ವಿಶ್ವಕಪ್ ಫೈನಲ್‌ನಲ್ಲಿ ಅತ್ಯಂತ ವೇಗದ ಶತಕ ಗಳಿಸಿದ ಮೊದಲ ಬ್ಯಾಟ್ಸ್‌ಮನ್ ಎನಿಸಿಕೊಂಡರು. ಐಪಿಎಲ್‌ನಲ್ಲಿ ಶತಕ ಗಳಿಸಿದ ಅತ್ಯಂತ ಕಿರಿಯ ಆಟಗಾರ ಎಂಬ ದಾಖಲೆಯನ್ನೂ ಈಗಾಗಲೇ ಹೊಂದಿದ್ದಾರೆ. ವೈಭವ್ ಅವರು ತನ್ನ 14ನೇ ವಯಸ್ಸಿನಲ್ಲೇ ಈ ಸಾಧನೆಗಳನ್ನು ಮಾಡಿದ್ದಾರೆ. ವೈಭವ್​ ಅವರ ಸ್ಫೋಟಕ ಪ್ರದರ್ಶನ ನೋಡಿದ ಟೀಮ್​ ಇಂಡಿಯಾದ ಅಭಿಮಾನಿಗಳು, ವೈಭವ್​ರನ್ನು ಭಾರತದ ಹಿರಿಯರ ತಂಡದಲ್ಲಿ ಸೇರಿಸಬೇಕೆಂದು ಒತ್ತಾಯ ಮಾಡುತ್ತಿದ್ದಾರೆ.

ವೈಭವ್ ಅವರು ಯುವ ಕ್ರಿಕೆಟ್‌ನಲ್ಲಿ ಬಹುತೇಕ ಎಲ್ಲಾ ಬ್ಯಾಟಿಂಗ್ ದಾಖಲೆಗಳನ್ನು ಸಾಧಿಸಿದ್ದಾರೆ. ಉಳಿದಿರುವುದು 200 ರನ್ ಗಳಿಸುವುದು ಮಾತ್ರ. ಇದೇ ರೀತಿಯ ಫಾರ್ಮ್​ ಕಾಯ್ದುಕೊಂಡರೆ, 200 ರನ್​ ದಾಖಲಿಸುವ ಸಮಯ ದೂರವಿಲ್ಲ. 19ನೇ ವಯಸ್ಸಿನಲ್ಲಿ ಇನ್ನು ಎಷ್ಟರಮಟ್ಟಿಗೆ ಆಡಬಹುದು ಎಂಬ ಚರ್ಚೆಗಳು ಕೂಡ ಶುರುವಾಗಿವೆ. ಆದರೆ, ಅಂಡರ್​ 19 ತಂಡಕ್ಕೆ ವೈಭವ್​ ಅರ್ಹರಾಗಿದ್ದರು ಕೂಡ ಮುಂದಿನ ಎರಡು ಅಂಡರ್-19 ವಿಶ್ವಕಪ್‌ಗಳಲ್ಲಿ ಭಾಗವಹಿಸಲು ಸಾಧ್ಯವಾಗುವುದಿಲ್ಲ.

2028 ರಲ್ಲಿ ಮುಂದಿನ U-19 ವಿಶ್ವಕಪ್ ಬರುವ ಹೊತ್ತಿಗೆ, ವೈಭವ್​ಗೆ 16 ವರ್ಷ ವಯಸ್ಸಾಗಿರುತ್ತದೆ. 2030ರ ಹೊತ್ತಿಗೆ, ಅವರಿಗೆ 18 ವರ್ಷ ವಯಸ್ಸಾಗಿರುತ್ತದೆ. ಆದರೂ, ಅಂಡರ್​ 19 ವಿಶ್ವಕಪ್​ನಲ್ಲಿ ಆಡಲು ವೈಭವ್​ಗೆ ಸಾಧ್ಯವಾಗುವುದಿಲ್ಲ. ಇದಕ್ಕೆ ಕಾರಣ ಬಿಸಿಸಿಐನ ನಿಯಮ.

ವೈಭವ್ ಸೂರ್ಯವಂಶಿಗೆ ಭಾರತಕ್ಕಾಗಿ ಮತ್ತೊಂದು U19 ವಿಶ್ವಕಪ್ ಆಡಲು ಅವಕಾಶ ಸಿಗುವುದಿಲ್ಲ. ಅವರೊಬ್ಬರಿಗೆ ಮಾತ್ರವಲ್ಲ, ಅವರ ತಂಡದ ಎಲ್ಲ ಸದಸ್ಯರಿಗೂ ಆ ಅವಕಾಶ ಸಿಗುವುದಿಲ್ಲ. ಇದು ಬಿಸಿಸಿಐ ಮಾರ್ಗಸೂಚಿಗಳಿಂದಾಗಿ. ಹೌದು, ಬಿಸಿಸಿಐ ಶಿಷ್ಟಾಚಾರಗಳ ಪ್ರಕಾರ, ಒಬ್ಬ ಭಾರತೀಯ ಕ್ರಿಕೆಟಿಗ U19 ವಿಶ್ವಕಪ್‌ನ ಒಂದೇ ಆವೃತ್ತಿಯಲ್ಲಿ ಮಾತ್ರ ಭಾಗವಹಿಸಬಹುದು.

2016 ರಲ್ಲಿ ಬಿಸಿಸಿಐ, ಆಟಗಾರರು ಒಂದಕ್ಕಿಂತ ಹೆಚ್ಚು U19 ವಿಶ್ವಕಪ್ ಆಡುವುದನ್ನು ನಿಷೇಧಿಸಿದಾಗ ಈ ನಿಯಮ ಜಾರಿಗೆ ಬಂದಿತು. ಇದಕ್ಕೆ ಯಾವುದೇ ಅಧಿಕೃತ ವಿವರಣೆಯನ್ನು ಬಿಸಿಸಿಐ ನೀಡಿಲ್ಲ. ಆದಾಗ್ಯೂ, ದೇಶದಲ್ಲಿ ಜೂನಿಯರ್ ಕ್ರಿಕೆಟ್ ಮಟ್ಟದಲ್ಲಿ ಇದು ತುಂಬಾ ಸಾಮಾನ್ಯ ಅಭ್ಯಾಸವಾಗಿದೆ ಎಂದು ಹೇಳಲಾಗುತ್ತದೆ. ಭಾರತೀಯ ಕ್ರಿಕೆಟ್ ವ್ಯವಸ್ಥೆಯಲ್ಲಿನ ಭ್ರಷ್ಟಾಚಾರವನ್ನು ರಾಹುಲ್ ದ್ರಾವಿಡ್ ಬಹಿರಂಗಪಡಿಸಿದ ನಂತರ 2016 ರಲ್ಲಿ ಬಿಸಿಸಿಐ ಈ ನಿಯಮವನ್ನು ಪರಿಚಯಿಸಿತು, (ಏಜೆನ್ಸೀಸ್​).