'ಯೂನಿವರ್ಸ್​ ಬಾಸ್'​​ ಹಿಂದಿಕ್ಕಿದ 'ಬೇಬಿ ಬಾಸ್​'! ಅದೊಂದು ಶತಕದಿಂದ ದೈತ್ಯ ಬ್ಯಾಟರ್​ ದಾಖಲೆ ಮುರಿದ ವೈಭವ್​​ | Vaibhav Sooryavanshi​

Vaibhav Sooryavanshi: ನಿನ್ನೆ (ಏ.25) ಜೈಪುರದಲ್ಲಿ ನಡೆದ ಐಪಿಎಲ್​ 19ನೇ ಆವೃತ್ತಿಯ ಪಂದ್ಯದಲ್ಲಿ ಸನ್​ರೈಸರ್ಸ್​ ಹೈದರಾಬಾದ್​ 5 ವಿಕೆಟ್​ಗಳ ರೋಚಕ ಜಯ ಸಾಧಿಸಿತು. ಈ ಮ್ಯಾಚ್​ನಲ್ಲಿ ರಾಜಸ್ಥಾನ ರಾಯಲ್ಸ್ ಪರ ವೈಭವ್ ಸೂರ್ಯವಂಶಿ ಸ್ಫೋಟಕ ಶತಕ ದಾಖಲಿಸಿದ್ದೇ ಆದರೂ ತಂಡಕ್ಕೆ ಗೆಲುವು ಸಿಗದೆ ಹೋಯಿತು. ಆದರೆ, ಈ ಬಾರಿಯ ಐಪಿಎಲ್​ನಲ್ಲಿ ಎರಡನೇ ಶತಕದಾಟದ ಮೂಲಕ ವೈಭವ್​ ಕ್ರಿಕೆಟ್​ ದೈತ್ಯ, ದಿಗ್ಗಜ ಆಟಗಾರ ಕ್ರಿಸ್​ ಗೇಲ್​ ಅವರ ದಾಖಲೆಯನ್ನು ಸರಿಗಟ್ಟಿದ್ದಾರೆ.

15 ವರ್ಷಕ್ಕೆ ಅಂತಾರಾಷ್ಟ್ರೀಯ ಮತ್ತು ಅನುಭವಿ ಬೌಲರ್​ಗಳನ್ನು ತನ್ನ ಬ್ಯಾಟ್​ನಿಂದ ಬೆಂಡೆತ್ತುತ್ತಿರುವ ವೈಭವ್ ಸೂರ್ಯವಂಶಿಯ ಐಪಿಎಲ್ ಸಾಹಸಗಳು ಎಂದಿನಂತೆ ಮುಂದುವರೆದಿವೆ. ಇದು ಕ್ರಿಕೆಟ್​ ಪ್ರೇಮಿಗಳಿಗೆ ರೋಮಾಂಚಕ ಅನುಭವ ಮತ್ತು ಹುಬ್ಬೇರಿಸುತ್ತಿರುವುದು ಗಮನಾರ್ಹ. 15 ಎಸೆತಗಳಲ್ಲಿ ಅರ್ಧಶತಕ ಗಳಿಸಿದ ಈ ಯುವ ಆಟಗಾರ, 36 ಬಾಲ್​ಗಳಲ್ಲಿ ಸ್ಫೋಟಕ ಶತಕವನ್ನು ಬಾರಿಸಿದರು. ಇದರಲ್ಲಿ 5 ಬೌಂಡರಿ ಮತ್ತು 12 ಸಿಕ್ಸರ್‌ಗಳು ಸೇರಿವೆ.

278.38 ಸ್ಟ್ರೈಕ್ ರೇಟ್​ನಲ್ಲಿ ಬಿರುಗಾಳಿ ಬ್ಯಾಟಿಂಗ್ ಮಾಡಿದ ವೈಭವ್​ಗೆ ಇದು ಐಪಿಎಲ್‌ನಲ್ಲಿ ಎರಡನೇ ಶತಕ. ಕುತೂಹಲಕಾರಿ ಸಂಗತಿ ಏನೆಂದರೆ, ಐಪಿಎಲ್ ಇತಿಹಾಸದಲ್ಲಿ 40ಕ್ಕಿಂತ ಕಡಿಮೆ ಎಸೆತಗಳಲ್ಲಿ ಎರಡು ಶತಕಗಳನ್ನು ಗಳಿಸಿದ ಮೊದಲ ಬ್ಯಾಟ್ಸ್‌ಮನ್ ಆಗಿ ವೈಭವ್​ ಹೊರಹೊಮ್ಮಿದ್ದಾರೆ. 2025ರಲ್ಲಿ ಗುಜರಾತ್ ಟೈಟಾನ್ಸ್ ವಿರುದ್ಧ 35 ಎಸೆತಗಳಲ್ಲಿ ಶತಕ ಗಳಿಸುವ ಮೂಲಕ ಐಪಿಎಲ್‌ನಲ್ಲಿ ಭಾರೀ ಸದ್ದು ಮಾಡಿದ ಯುವ ಬ್ಯಾಟರ್, ಈ ಸೀಸನ್​ನಲ್ಲಿ ಮೊದಲ ಸೆಂಚುರಿ ದಾಖಲಿಸುವ ಮೂಲಕ ಮಾಜಿ ಆರ್​ಸಿಬಿ ಬ್ಯಾಟರ್​ ಅವರನ್ನು ಹಿಂದಿಕ್ಕಿದ್ದಾರೆ.

ಐಪಿಎಲ್ ಇತಿಹಾಸದಲ್ಲಿ, ಕ್ರಿಸ್ ಗೇಲ್ ಅವರ ದಾಖಲೆಗೆ ಸೂರ್ಯವಂಶಿ ಬಹಳ ಹತ್ತಿರದಲ್ಲಿದ್ದಾರೆ. ಇದೇ ಗೇಲ್​ ಅವರು ದಾಖಲಿಸಿದ ವೇಗದ ಶತಕ 30 ಎಸೆತಗಳಲ್ಲಿ (ರಾಯಲ್ ಚಾಲೆಂಜರ್ಸ್ ಬೆಂಗಳೂರು vs ಪುಣೆ ವಾರಿಯರ್ಸ್, 2013). ಆದಾಗ್ಯೂ, ಐಪಿಎಲ್‌ನಲ್ಲಿ ಅವರ ಎರಡನೇ ವೇಗದ ಶತಕ 46 ಎಸೆತಗಳಲ್ಲಿ ಬಂದಿತು. ಅದೇ ಸೂರ್ಯವಂಶಿ, ಇಲ್ಲಿಯವರೆಗೆ, ಐಪಿಎಲ್‌ನಲ್ಲಿ 40ಕ್ಕಿಂತ ಕಡಿಮೆ ಎಸೆತಗಳಲ್ಲಿ ಎರಡು ಸೆಂಚುರಿ ಬಾರಿಸಿದ್ದಾರೆ. ಐಪಿಎಲ್​ ಇತಿಹಾಸದಲ್ಲಿ 40ಕ್ಕಿಂತ ಕಡಿಮೆ ಬಾಲ್​ನಲ್ಲಿ ಎರಡು ಶತಕಗಳನ್ನು ಬಾರಿಸಿದ ಏಕೈಕ ಬ್ಯಾಟರ್​ ವೈಭವ್​​. ಈ ಮೂಲಕ 'ಯೂನಿವರ್ಸ್​ ಬಾಸ್'​ ದಾಖಲೆಯನ್ನು 'ಬೇಬಿ ಬಾಸ್'​ ಮುರಿದಿರುವುದು ನಿಜಕ್ಕೂ ಗಮನಾರ್ಹ.