ಕೇವಲ 15ನೇ ವಯಸ್ಸಿನಲ್ಲಿ ದಾಖಲೆ ಬರೆದ ವೈಭವ್: ದುಲೀಪ್​ ಟ್ರೋಫಿಯ 57 ವರ್ಷಗಳ ಹಳೆಯ ದಾಖಲೆ ಧೂಳೀಪಟ! Vaibhav Sooryavanshi

ನವದೆಹಲಿ: ವಯಸ್ಸು ಅನ್ನೋದು ಕೇವಲ ಒಂದು ಸಂಖ್ಯೆ ಮಾತ್ರ ಎಂಬುದನ್ನು ಬಿಹಾರದ ಯುವ ಕ್ರಿಕೆಟಿಗ ವೈಭವ್ ಸೂರ್ಯವಂಶಿ ( Vaibhav Sooryavanshi ) ಮತ್ತೊಮ್ಮೆ ಸಾಬೀತುಪಡಿಸಿದ್ದಾರೆ. ಕೇವಲ 15ನೇ ವಯಸ್ಸಿನಲ್ಲಿ ವಿಶೇಷ ದಾಖಲೆ ಬರೆದಿರುವ ಈ ಪ್ರತಿಭಾನ್ವಿತ ಆಟಗಾರ, ಬರೋಬ್ಬರಿ 57 ವರ್ಷಗಳ ಹಳೆಯ ದಾಖಲೆಯನ್ನು ಧೂಳೀಪಟ ಮಾಡುವ ಮೂಲಕ ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲಿ ಹೊಸ ಮೈಲಿಗಲ್ಲು ಸ್ಥಾಪಿಸಿದ್ದಾರೆ.

ಪ್ರಸ್ತುತ ನಡೆಯುತ್ತಿರುವ ದುಲೀಪ್ ಟ್ರೋಫಿ ಸೆಮಿಫೈನಲ್ ಪಂದ್ಯದಲ್ಲಿ ಪೂರ್ವ ವಲಯ ತಂಡದ ಪರ ಕಣಕ್ಕಿಳಿದಿರುವ ಯುವ ಆರಂಭಿಕ ಬ್ಯಾಟರ್ ವೈಭವ್ ಸೂರ್ಯವಂಶಿ, ಹಾಲಿ ಚಾಂಪಿಯನ್ ಸೆಂಟ್ರಲ್ ವಲಯ ವಿರುದ್ಧದ ಪಂದ್ಯದಲ್ಲಿ ಈ ಐತಿಹಾಸಿಕ ಸಾಧನೆ ಮಾಡಿದ್ದಾರೆ.

ಟೂರ್ನಿಯ ಇತಿಹಾಸದಲ್ಲೇ ಅತ್ಯಂತ ಕಿರಿಯ ವಯಸ್ಸಿನಲ್ಲಿ ಅರ್ಧಶತಕ ಸಿಡಿಸಿದ ಬ್ಯಾಟರ್ ಎಂಬ ಕೀರ್ತಿಗೆ ಭಾಜನರಾಗಿರುವ ಇವರು, ಕೇವಲ 8 ರನ್‌ಗಳ ಅಂತರದಿಂದ ಶತಕ ವಂಚಿತರಾದರೂ ತಮ್ಮ ಸಾಹಸದಿಂದ ಎಲ್ಲರ ಹುಬ್ಬೇರಿಸುವಂತೆ ಮಾಡಿದ್ದಾರೆ.

ಪಂದ್ಯದ ಮೊದಲ ದಿನದಾಟದಲ್ಲಿ ವೇಗಿಗಳಾದ ಮುಖೇಶ್ ಕುಮಾರ್ (3/56) ಮತ್ತು ಅಭಿಜಿತ್ ಸರ್ಕಾರ್ (3/38) ಅವರ ತಲಾ ಮೂರು ವಿಕೆಟ್‌ಗಳ ಅಮೋಘ ದಾಳಿಯ ನೆರವಿನಿಂದ ಸೆಂಟ್ರಲ್ ವಲಯ ತಂಡವನ್ನು 266 ರನ್‌ಗಳಿಗೆ ಆಲೌಟ್ ಮಾಡಲಾಯಿತು. ಪೂರ್ವ ವಲಯದ ನಾಯಕ ಇಶಾನ್ ಕಿಶನ್ ಮೊದಲು ಬೌಲಿಂಗ್ ಆಯ್ಕೆ ಮಾಡಿಕೊಂಡ ನಿರ್ಧಾರವು ಸಂಪೂರ್ಣ ಯಶಸ್ವಿಯಾಯಿತು. ಆದರೆ, ಮೈದಾನದಲ್ಲಿದ್ದಾಗ ಕೈಗೆ ಪೆಟ್ಟು ಮಾಡಿಕೊಂಡ ಇಶಾನ್ ಕಿಶನ್ ಸ್ವಲ್ಪ ಕಾಲ ವಿಶ್ರಾಂತಿ ಪಡೆಯಬೇಕಾಯಿತು.

ಈ ಅದ್ಭುತ ಇನ್ನಿಂಗ್ಸ್ ಮೂಲಕ ವೈಭವ್, 1969ರಲ್ಲಿ ಲಕ್ಷ್ಮಣ್ ಸಿಂಗ್ ನಿರ್ಮಿಸಿದ್ದ 16 ವರ್ಷ 23 ದಿನಗಳ ದಾಖಲೆಯನ್ನು ಮುರಿದರು. ಅಂದು 16 ವರ್ಷದವರಾಗಿದ್ದ ಲಕ್ಷ್ಮಣ್ ಸಿಂಗ್ ಅವರ ಅರ್ಧ ಶತಕದ ದಾಖಲೆಯನ್ನು ಮುರಿದ ವೈಭವ್, ತಮ್ಮ 15 ವರ್ಷ 157 ದಿನಗಳ ವಯಸ್ಸಿನಲ್ಲೇ ಈ ಸಾಧನೆ ಮಾಡಿ ಅಗ್ರಸ್ಥಾನಕ್ಕೇರಿದ್ದಾರೆ.

1. ವೈಭವ್ ಸೂರ್ಯವಂಶಿ: 15 ವರ್ಷ 157 ದಿನಗಳು

2. ಲಕ್ಷ್ಮಣ್ ಸಿಂಗ್ (1969): 16 ವರ್ಷ 23 ದಿನಗಳು

3. ಪಿಯೂಷ್ ಚಾವ್ಲಾ (2025): 16 ವರ್ಷ 307 ದಿನಗಳು

ಇನ್ನೂ ಕಿರಿಯ ವಯಸ್ಸಿನಲ್ಲೇ ನಾಯಕತ್ವದ ಜವಾಬ್ದಾರಿಯನ್ನೂ ಅಚ್ಚುಕಟ್ಟಾಗಿ ನಿರ್ವಹಿಸಿ ದಾಖಲೆ ಬರೆದಿರುವ ಈ ಯುವ ಆಟಗಾರನಿಗೆ ಕ್ರಿಕೆಟ್ ದಿಗ್ಗಜರಿಂದ ವ್ಯಾಪಕ ಪ್ರಶಂಸೆ ವ್ಯಕ್ತವಾಗುತ್ತಿದೆ, (ಏಜೆನ್ಸೀಸ್​).